91
Nu lɔɔɠuzu ʋagɔi
1 Zɔi é zeini, nii é Anii-Pɛ-Unda, naa ná-dooɠo bosuʋɛ,
naa ɠa looɠosu Zɛbɛi-Pɛ-Maliɠii ná-niinigi wu.
2 Gè ɠɛ ma: «Ɠɔoɠɔ GALAGI, ɗa ɠa è ga dɔ̀ɔɠuzuʋɛ, ta nà-siɠigi,
nà-GALAGI nii gè ɠalivaai ma!»
3 Ungo, tɔ ɠa é è unmɔɔsu, é è ɠula balii ɠa tɛai è luɠɔ,
ta ɗɔfɔ zeeɓɛi, ta ná-faa zuɠoloɠologiti.
4 Toɠa è maalɔɔɠu koʋegiti bu, ɗa lɔɔɠu kpeɠabuʋɛ,
ná-gaamai ɠa ga kɔɔɠɔ zɛpɛgi, kɔɔɠɔ zɔɔlai é è makɛsu.
5 È la lua ani nɔpɛ ba, anɛɛ kpidii zu maalua vai,
ɓaa mɛɛin nii é ɠoʋesu ga foloi,
6 anɛɛ ɗɔfɔ zeeɓɛi, nii é ziɛzu kpidii zu,
ɓaa pili ma zeeɓɛi, nii é nuiti doɠazu foloi a gaalɔna.
7 Waagila ka loo è ɠobaʋɛ,
waapuugɔ (10.000) è yeezazuʋɛ,
kɛlɛ tanɔpɛ ge la zeelia è ma.
8 Ɗa ɠaazulaalao nɔ,
è zoo è faa ɲɔu ɠɛ nuiti salai ɠa.
9 Ungo, Ɠɔoɠɔ GALAGI, ɗa ga dɔ̀ɔɠuzuʋɛ!
Nii é Anii-Pɛ-Unda, è naa ɠɛa ga è-ʋoluzeigi.
10 Faa ɲɔu nɔpɛ ge la zeelia è ma,
maanɔɠɔ nɔpɛ ge la zeelia ɗa-ʋɛlɛi ma.
11 Mazɔlɔɔ toɠa devei ve ná-geezuɠeelaiti zea ɗa-vaa zu,
ga ti ɓaa è maazu ɗa-ʋeleiti kpein su.
12 Ta è la yeezu,
nii a kɛ è-ɠɔɠɔi mina ziɠa kɔtu ʋa.
13 Ɗa ziɛ zalai ta pɛɛɠaalii ma, faa nɔpɛ ge la ɠɛa ga ɗe,
ɗa ɠɔɠɔlo zala yiʋoi ta kaali ɲɔi ma.
14 Maliɠii ɠɛ ma: «Tɔɔzei giliʋɛ nɔ̀un ba,
nà kizosu, gè makɛ ma, mazɔlɔɔ é kwɛ̀ɛ.
15 Toɠa wooɠula mà, nà gooɠaaʋote,
ungo, nà ɠɛ tɔun ba, kidaaʋiligi ma ziɛgi zu,
nà unmɔɔ, gè bɔɔlɔ.
16 Nà sii zuɠooza, daazeeli,
gè dɛɛ la, ga nà ga ná-kizo nui.»