92
Pagɛ ga nu Ɠɔoɠɔ GALAGI maamusɛ
1 Guyei. Dooɠo foloi ma wuyei.
2 Pagɛ ga nu Ɠɔoɠɔ GALAGI maamusɛ,
nu è maamusɛ ga guye wooi, ɗɛi è Anii-Pɛ-Unda!
3 Pagɛ ɓalaa ga nu ɗa-nuɓɔɠɔlai laazeeli vai lɔɔzei sobui nɔ,
ta ɗa-wooɠɛɠiladai laazeeli kpɔkɔi,
4 gɛingɛin ganigi galu puugɔi ga,
ta papai, ta kɔnigi.
5 Ee, Ɠɔoɠɔ GALAGI, ɗa kòozunɛɛzu naa ʋɔ, nii è kɛɛzu!
Nà wooɠulazu ga koozunɛɛi è-yeei ná-kpɛtɛaniiti faa zu.
6 Ɗa-ɠɛɛwotiiti bɔɔlɔʋɛ, ee, Ɠɔoɠɔ GALAGI!
Ɗa-ɠisiɛiti polu ɠoozaʋɛ!
7 Nui ɠi ge la ma, é la kwɛɛ tago pa,
ɠimalala nui la ma ɠeleɠele sɔlɔɔga.
8 Anɛɛ ni nu ɲɔiti ta ʋɔnɔsu eɠɛ tufa lɛnugi,
faa ɲɔu ɠɛ nuiti ti ɗa ɓɔvɔ,
ti undaa ɠa ʋili eyɛsu ɠɔ.
9 Kɛlɛ, ee, Ɠɔoɠɔ GALAGI,
ɗa ɠa è masadai ɠɛɛzu eyɛsu ɠɔ.
10 Mazɔlɔɔ è zili nuiti pɛtɛ, ee, Ɠɔoɠɔ GALAGI!
Mazɔlɔɔ è zili nuiti pɛtɛ, ti undaa ɠa ʋilisu ɲɛgɛlɛin,
niiti kpein ti faa ɲɔi ɠɛɛzu, ta vazasu.
11 Ɗa sɛ̀bɛi wɔɔlɔzu, eɠɛ teɠui nɔnɔi,
gulɔ maku nɛɛnɛ niinɛi ɠa ziɛzu mà.
12 Gàazu logɛ zobo sɔlɔɔ fai ʋa sìli nuiti ma,
gòilogɛ nu ɲɔiti kpain gooi ma, niiti ti wuzeɠezu dàalɔɠɔma.
13 Telebo nuiti ta ʋɔnɔsu eɠɛ dɔɔ wului,
ti wuzeɠe eɠɛ Liɓan sɛdele guluiti.
14 Ti ziingɛ Ɠɔoɠɔ GALAGI ná-pɛlɛi wu,
ti ɗa wɔɔlɔ gá-ƓALAGI ná-koizuʋɛ.
15 Ta ɓuɠuzu ti wɔlɔzaɠa siɛgi zu,
ti laavegɛ ga zɛbɛi, ti-ma wundui ɠɛ ti zu,
16 ta dɛɛ ga Ɠɔoɠɔ GALAGI zɔlegɛ,
tɔ ɠa é ga nà-fasai, telebotala ɠila kpalaa ge la tɔun su.