96
Eteai Ɠɔoɠɔ GALAGI lɛbi,
nii é ga ná-masagi
1 À guye niinɛi loo Ɠɔoɠɔ GALAGI ʋɛ!
Eteai zu nuɓusɛiti kpein, à guyei loo Ɠɔoɠɔ GALAGI ʋɛ!
2 À guyei loo Ɠɔoɠɔ GALAGI lɛbi vai ma,
folo-o-folo, à ná-kizo fai ma woo niinɛ ʋagɔi laazeeli!
3 À ná-lɛbiyai ɠula kɛlɛma ziiti saama,
ta kɛɛwoti maayikiaiti nuɓusɛiti saama!
4 Mazɔlɔɔ Ɠɔoɠɔ GALAGI wɔɔlɔʋɛ, tɔ ɠa maamusɛi kpein soloogai ma,
maayikiʋɛ é leʋe gala kiligiti ba.
5 Mazɔlɔɔ nuɓusɛiti ta-ɠalagiti pɛ ta ga zɛɛ ɠalagiti,
kɛlɛ Ɠɔoɠɔ GALAGI ɠa é geeɠɔlɔgi ɓɛtɛni.
6 Toɠa volozu ná-bɔɔlɔi ta ná-maayikii zu,
zobogi ta padai ta seizu ɲadegai.
7 Nuɓusɛiti kpein zooi ɠa, à Ɠɔoɠɔ GALAGI maamusɛ,
wo ná-lɛbiyai ta ná-zɛbɛi ɠula kɛlɛma.
8 À lɛbiyai ve Ɠɔoɠɔ GALAGI laasei golai ʋɛ!
À ʋa ga vebɛaniiti, wo lɛ ná-koizuʋɛ!
9 À ʋilɛ ɲiibiɠa, wo nɔkɔ Ɠɔoɠɔ GALAGI wu, ná-ɲadedai ma voloi zu.
Eteai zu nuɓusɛiti kpein, à ɓali gaazu.
10 À dɛɛ ga zii ɠiligiti pɛ ga Ɠɔoɠɔ GALAGI ɠa masadai ɠɛɛzu!
Eteai ɠa loni kpaan, é la ɲiikpiga.
GALA ka etea nuɓusɛiti tukpɔɠaaleʋezu ga sɔledai.
11 Geeɠɔlɔgiti ti ɠoozunɛ, eteai ɠɛ koozunɛ wolai zu,
kpoloɗɛi zikɔ, ta bu aniiti kpein.
12 Dɔɓɔi ɠoozunɛ, ta su aniiti kpein!
Dɔɓɔzu wuluiti kpein ti wooɠula ga koozunɛɛi
13 Ɠɔoɠɔ GALAGI ɠaazu!
Mazɔlɔɔ toɠa ʋaazu,
toɠa ʋaazu é eteai lukpɔɠaaleʋe.
Toɠa eteai lukpɔɠaaleʋe ga telebodai,
toɠa nuɓusɛiti tukpɔɠaaleʋe ga gaamai.