97
GALAGI nii é eteai pɛ unda
1 Ɠɔoɠɔ GALAGI ɠa masadai ɠɛɛzu! Eteai ɠoozunɛ,
ziɛ zaama yooiti ti ɠoozunɛ!
2 Tonaɓiingiti ta kpidii ti ɠooliʋɛ ma.
Telebodai ta sɔledaiti ka ti ga ná-masa kpɔkpɔgi ʋoluzeigi.
3 Abui ɠa ziɛzu kakalaʋɛ,
naa ɠa é sili nuiti galazu maaɠoolii zu.
4 Ná-mainmainti ta eteai zuɠalasu,
eteai kaani, é ɓali ga duai.
5 Gizeiti gaa ɠa wuunsu eɠɛ kedoi, Ɠɔoɠɔ GALAGI ɠakala,
eteai kpein Maliɠii ɠakala.
6 Geeɠɔlɔgiti ta ná-telebodai lɛɛzu,
nuɓusɛiti pɛ ta ná-lɛbiyai ɠa.
7 Ta ɠɛ unfegi zu, niiti kpein ti nɔkɔsu vololibaiti bu,
niiti ti wasosu zɛɛ ɠalagiti ta-vaa zu, ti ti ya.
Wɔiti wo ga gala kiligiti kpein, à nɔkɔ Maliɠii wu!
8 Ma wooi ɠa mɛni Siyɔn, ti ɠoozunɛ,
Zuda laaiti kpein ta ɠɛ koozunɛɛi zu,
tɔɔzei ɗa-lukpɔɠaaleʋeiti ba, ee, Ɠɔoɠɔ GALAGI!
9 Mazɔlɔɔ, Ɠɔoɠɔ GALAGI, ɗa ɠa è Anii-Pɛ-Unda eteai kpein maazu,
è-yee ɠa gala kiligiti kpein maazu.
10 Wɔiti Ɠɔoɠɔ GALAGI nɛai wo ʋɛ, à faa ɲɔi wɔinzeɠe!
Toɠa naati zɛnvui makɛsu, niiti ti ga wooɠɛɠila nuiti bɛ,
toɠa ti unmɔɔ, é ti ɠula faa ɲɔu ɠɛ nuiti zea.
11 Wozakalagi vazagɛ telebo nui ʋɛ,
ta koozunɛɛi naati bɛ, niiti ti-yii zɔlegai.
12 Telebo nuiti, à ɠoozunɛ Ɠɔoɠɔ GALAGI ná-faa zu,
wo daasei ɲadegai maamusɛ.