5
(Zunui)
1 Nà ga lɔ nà-kpelei zu,
ee, anzalopoi, ɗɛi è ga ànza ɓeai,
gè nà-miilegi ɠula ta tufa maku nɛɛnɛgiti,
gè nà-kɔin sɛpɛgi mi, ta ma wulɔi,
gè nà-dɔɔi ta nà-nɔnɔi ɓɔle.
(Bɔɔlamaiti)
Bɔ̀ɔlaiti, à daami wo, wo ɓɔɔle.
Nɛɛbɛ nu felegɔiti, à dɔɔi ɓɔle, é wo zo.
(Anzanui)
2 Gè ɠɛa ɲiizu, kɛlɛ zìi ɠɛa ɠaazu ɠa,
gè nɛ̀ɛbɛ nui woomɛni,
é ɗa pɛlɛi laaloɠa, é ɗa ɠɛ mà:
«Pɛlɛi laalao, anzalopoi, zìima anzanui,
nà-poopo kolegi, ɗɛi è ɠaavɔnigai.
Mazɔlɔɔ nɔ̀ungi yɛɓɛa ga duɓui,
kpidi ɗɛ ɠilagilagi é ʋilɛsu,
naa nɔ̀undeɠaiti zɛɓɛa.»
3 Gè nà-seɠei ɠulaa ɠɔba,
nà too ɠale ʋolu?
Gè kɔ̀ɠɔiti maagbaa,
nà ti nɔɠɔzu ɠale ʋolu?
4 Nɛ̀ɛbɛ nui ɠa yeeleʋesu fenɛtɛlɛ laaʋɛ,
kɔɔlɛ ɓooi ɗa yei ga ze.
5 Gè wuzeɠea ga gè pɛlɛi laalao nɛ̀ɛbɛ nui ʋɛ,
miile gulɔ maku nɛɛnɛgi yeiɗa zèei ta zèeɓeɠaiti zɔɠɔzuʋɛti,
gè ɗa pɛɛ sɔɠɔgi ʋa.
6 Gè pɛlɛi laalaoga nɛ̀ɛbɛ nui luɠɔ,
kɛlɛ é lia, é la mɔ ná,
gè ɠɛ unga wuulee.
Gè ɠulani gaiziɛ vai ma, kɛlɛ gè la kaani.
Gè ta nɔ lolini, é la gòoɠaaʋoteni.
7 Gi ɠomini gá taa makɛ nuiti,
ti ɗa lati taai ma.
Ti dòɠani, ti màawana,
ti nà-pɛɛkɔmai ɠula zèa.
8 Ee, Zeluzalɛme anzalopoiti, nà wo ɠaazaɠasu:
Wa nɛ̀ɛbɛ nui ɠaana, leeni ɠa wo bosu ma?
À ɠɛ ma nɛɛbɛ zeeɓɛi ɠa é bà.
(Zeluzalɛme anzalopoiti)
9 Bo dɛɛ gi ma, ɗɛi è ʋagai anzaa zaama,
leeni ɠa é è nɛɛbɛ nui ya, é la taɠili zea?
Gaamazu, lee ɓa ka é è nɛɛbɛ nui ya, é la taɠili zea,
è gi ɠaazaɠasu ga niima laali?
(Anzanui)
10 Nɛ̀ɛbɛ nui lɔtɔʋɛ, kɛdɛgɛ,
ʋili nɔpɛ ge la ma,
anɛɛ nu waapuugɔ (10.000) zaama.
11 Nɔungi ɠulaʋɛ ga zanu kitei,
nɔundeɠai ʋɛɛni ma fɛlɛɓɛɓɛ,
nɔundeɠa lɛiɗai eɠɛ kalawɔni.
12 Gaazuɠɛzɛiti kulaʋɛ ga poopo kolegiti ti ziɛi laaʋɛ,
ti ɗa maagba ga nɔnɔi,
ti ɗa ɲi kpɛtɛi zaama.
13 Komagiti kɛɛʋɛ eɠɛ tufa maku nɛɛnɛ kpelei,
ti-maku nɛɛnɛgi ɗa ɠula.
Dakɔlɔgiti ta ga bulɛgiti,
ʋɛ miilegi ɠulazu ná.
14 Zeeɓeɠaiti kɛɛʋɛ eɠɛ zanu balaɠaegiti,
daavegai ga kɔtu zɔngɔ ɓaagiti.
Kpusɛi ɠɛ eɠɛ see ɲiiga zɛpɛgi,
nii doungai ga kɔtu ɓiinii.
15 Kɔɠɔiti kulaʋɛ ga kɔtu ɠole kpɛdɛgi,
nii kpadɔai zanugi ma.
Maayikiai eɠɛ Liɓan ɠize ɲɛkpɛi,
sulogai eɠɛ sɛdele guluiti.
16 Daa ɠoozuʋɛ nɛɛʋɛ gola,
kpusɛi pɛ ge ɛ̀nɛkɛga.
Ee, Zeluzalɛme anzalopoiti,
gaamazu, ʋele ɠana nɛ̀ɛbɛ nui la,
ʋele ɠana zìima nui la.