6
(Zeluzalɛme anzalopoiti)
1 Bo dɛɛ gi ma kae, ɗɛi è ʋagai anzaiti pɛ saama,
mini ɠa è nɛɛbɛ nui liai ná?
Pele ungi ɓɛgele ɠa é sogai?
Gi ɓɔ è ʋa, ade gaiziɛ.
(Anzanui)
2 Nɛ̀ɛbɛ nui yeiʋɛ ná-kpelei zu,
ʋɛ é tufa maku nɛɛnɛgiti siingai ná,
nii a kɛ é ná-togani ɓulugiti kɔnɔkula kpelei zu,
ta é bulɛgi ma ʋuai ɠula.
3 Nà nɛ̀ɛbɛ nui yeema,
tɔ ɓalaa toɠa zèema.
Toɠa ná-baalagiti kɔnɔkulazu bulɛgiti saama.
(Zunui)
4 È ʋagɛ, zìima anzanui, eɠɛ Tiilesa taa ʋapagi,
è maanɛai eɠɛ Zeluzalɛme,
è maayikiai ga kɔɔʋɛbɛi ɠɛʋele a ɠɛna kɔɔlaaɠai zu.
5 Ɠaazu zeɠe bà,
tɔɔzei toɠa zìiɓalizu.
Ɗɔundeɠaiti kulaʋɛ ga boli ɓulugiti,
niiti ti yeizu Galaade ɠizei ɠɔbuʋɛ.
6 È-ɲiigaiti ta gàazu eɠɛ baala saa ɓulugi,
niiti ti maaleɠaiti gaaleʋeai nɔ feya,
ti ɗa zeɠe maagba wosuʋɛ.
Ta ʋolu ga felefele,
tanɔpɛ ge la ʋolu ɠila.
7 È-ɠomagiti kɛɛʋɛ eɠɛ gelenade gulu waa ɓɔigi ma ʋalisuiti,
ɗa-ɠaazu lɔɔɠu zeɠei ʋoluʋɛ.
8 Masagi anzai niiti é ti vuluai,
naati ta ga nu ʋuulɔzita (60),
niiti ti la vuluni ga zɔiti kɛʋele,
naati ti ɠɛ ga nu ʋuulɔsaʋa (80),
anzalopoiti nu la zooga naati gaalusu.
9 Nɔ̀un gaazu, anzanui ɠa ɠila kpe nɔ eteai zu,
nà-poopo kolegi, gaavɔnigai.
Kɛɠala la ná dee ʋɛ,
tɔ ɠa é ga naa yiima loin.
Anzalopoi zɔiti ta kaana,
ta ɗa ɠɛ ma undaanɛɛʋɛ.
Masagi anza ɠiteiti, ta zɔiti é la ti vuluni,
naati ɓalaa ta ɗa maamusɛ ɠana nɔ,
10 ti ɗa ɠɛ ma: «Anzanui ɓɛ ɠanu,
é ɠulazu eɠɛ folo lie kulazuʋɛ?
Pagai eɠɛ alugi, é volozu ga foloi ɠɛʋele?
Maayikiai ga kɔɔʋɛbɛi ɠɛʋele a ɠɛna kɔɔlaaɠai zu?»
11 Gè yeini nɔ feya gwaa wulu ɓelei zu,
ga gè wɛlɛ gulu ʋɔnɔgiti ma pɛtugi zu,
gè ka ni leezɛn ansaɠɔgiti ti zeiɗa ga,
ni gelenade guluiti ti teʋea.
12 Kɛlɛ gè la kwɛɛni, ʋelei zìima vai dàaʋiligai la,
gè ɓɔɠɔ ɠa nà-masagi ná-nuɓusɛiti ta-wotoloiti saama.