7
(Zeluzalɛme anzalopoiti)
1 Ɠale ma, ɠale dɛɛ ma, Sulame anzanui!
Ɠale ma, è ʋa, gi è ɠa.
(Anzanui)
Lee ʋe wo wɛlɛzu Sulame anzanui ʋa,
mɛɛngai é lɛ ɠaɠogi zu?
(Zunui)
2 Ee, ɠalazogi ná-doun anzanui,
è-ɠɔɠɔiti papagɛ ti, ɗa-zaʋalagiti su!
È-zaamaʋɛ ɠiliɠiligɛ eɠɛ kɔbu anigi,
nii ɲɛɛliɠi nui kpɛtɛai.
3 È-wɔingi ɠulaʋɛ ga ziawɔ ɠiliɠiligi,
nii dɔɔ maku nɛɛnɛgi la ʋalasu su.
È-ɠogi ɠɛɛʋɛ eɠɛ molo ziɠi koi,
maaɠakugai ga bulɛgi.
4 È-ɲiimi felegɔiti kulaʋɛ ga dopa yiʋo felegɔ,
eɠɛ dopa zaai ma yiʋo felegɔ.
5 È-ɠɔgi ʋokɔɠɔgɛ see ɲiiga ziɠigi ma.
È-ɠaazuɠɛzɛiti kɛɛʋɛ eɠɛ Ɠɛsɛɓon ɓoigiti,
niiti ti Ɓate-Laɓime taa ziɠidaʋɛ.
È-zokpai ɠulaʋɛ ga Liɓan ziɠigi,
nii gwɛlɛmai ɠa ɗa wo da ga Damase ʋele.
6 Ɗɔungi ɠa loni so eɠɛ Kaalamɛle gizei.
Ɗɔundeɠai ɓɔiʋɛ, é ɗa volo,
felevelegai masa gila ma.
7 Ee, nɛ̀ɛbɛ anzai, ɗɛi è zìimai,
è ʋagɛ, zaala ɠɛ è ma.
8 È ɠaaɠoozaʋɛ eɠɛ dɔɔ wului,
è-ɲiimiiti ka ti ga ma ungi.
9 Gè ɠɛ ma:
«Nà lɛɛzu dɔɔ wului ma,
gè ma ungiti so ga zèei.»
È-ɲiimiiti ti ɠɛ bà kae eɠɛ leezɛn ɠɔpɔgiti.
È-yɛnvu viilɛi ɠugi ɠɛ sòkpai zu kae,
eɠɛ pɔmegi ɠugi.
10 Dɔɔ nɛɛnɛgi ɠula è-laaʋɛ, é sò!
(Anzanui)
Gaama ʋe, dɔɔ nɛɛnɛgi nii é ʋuuzu nɛ̀ɛbɛ nui nɔ ʋɛ,
é ɗa yei ɲiizu nuiti dakɔlɔgiti su.
11 Nɔ̀un nà nɛ̀ɛbɛ nui yeema,
tama nà ɠa gè ɛnɛkɛgai.
12 Ʋa lɛɛ mu, nɛ̀ɛbɛ nui,
de ɠula, de li dɔɓɔi zu,
de ɗa ɲi ɓalaɠaiti su.
13 Názu, sobuzobui nɔ ʋe,
de li leezɛn ɓelei zu,
de pɛtɛ ni ansaɠɔgiti ti teʋea,
ta ni ma ʋuaiti daalaoga,
ta ni ɓalaa gelenade guluiti ti teʋea.
Miná ɠa gè nà-nɛɛbɛi veezu ná è ʋɛ.
14 Gului nii daa ga mandelagɔɔl,
naati maku nɛɛnɛgi ɠa ɠulazu,
gulu waa ʋapagi ma zii kpein ka da-ʋɛlɛlaʋɛ,
gè ti pɛ makɛgɛ è ʋɛ, nɛ̀ɛbɛ nui.