Sofoni
Ná-Sɛʋɛi
Wooi lɔɔzeizuʋɛ
GALA goo wo nui Sofoni, ná-tɛnɛ gooi woni kona undɔzita (600) aisa Yesu Kilista ʋa zɔlɔɔ eteai zu, aisa Aɓakuke ʋa ná-tɛnɛgi wo. Siɛgi zu é ɠɛni tɛnɛgi wosu da, masagi Zɔziase la ɠɛni dɛ GALA fi ma valibo fai zeini kpasu (2Ma 23:1-28) ta Zuda masadai ɠɛni faazupui laawu ma yeeɠɛɠalai. GALA keelai ɠa naati gooɠaaʋotesu, zɔiti ti ɠisiɛzu ga GALA maavaa ɠa nɛi nuɓusɛiti ba, ta faiti ta nɛi ɠɛɛzu zeema? Toɠa GALA tosuʋɛ lɛɛzu faa mɔinmɔin su: GALA ka ʋa é Zuda nuiti ta Zeeluzalɛme nuiti tukpɔɠaaleʋe (1:1--2:3), toɠa Zuda maaɠoolii ma nuɓusɛiti koloɠolo (2:4-15), naa ʋoluma, toɠa Zeeluzalɛme niinɛ ʋolu, kpega ʋoluma ga faa ɲɔi ma zapei pɛ tɔɔɠula, é nuɓusɛiti zei naa, ti ga unmaayei nuiti, ti ʋalagai, nii a kɛ, ti nuɓusɛi pɛ siɛ ʋelei maavalibo (3:1-20).
Sofoni ɠa bosu é kole, ga GALA ná-nuɓusɛiti ti la zooga ti yɔɠɔzuʋɛ ʋa ɠole ta GALA, ni naama nuɓusɛiti ti la ɠulani ná mɛtu, niiti ti ti ya ɓɔɠɔi nɔ ta-lɔnɔgi ɠaiziɛzu, é leʋe GALAGI nɔnɔi ʋa. Kɛlɛ toɠa zeele wooi wosu ga, GALA ka ɠaaɓaazu yɛ naati ma, niiti ti zooi zu ga ɓɔɠɔmaayei nuɓusɛiti (2:3; 3:12).
1
Wooi niiti ka Ɠɔoɠɔ GALAGI ti woni Sofoni ma, Zuda masagi Zɔziase, Amon ná-doun zunui, ná-yeeɠɛɠalai zu. Sofoni ɠɛni ga Kusi ná-doun zunui, naa kɛɛɠɛ ɠɛ ga Gedalia, naa kɛɛɠɛ ɠɛ ga Amalia, naa kɛɛɠɛ ɠɛ ga Ezeekiase.
Eteai pɛ tukpɔɠaaleʋe vai
Ɠɔoɠɔ GALAGI wooi ɠaa:
«Nà ʋaazu anii kpein suwuɠaaleʋezu,
niiti ti yɛnvuzu eteai zu.
Nà nuɓusɛi pɛ koloɠolosu ta suaiti,
gè wɔniiti pɛ koloɠolo ta kaleiti pɛ,
gè naa ɠoloɠolo, nii é nu ɲɔiti kɔɠɔziɠazu.
Nà nu vului ma zuwu ɠaaleʋezu eteai zu.»
Ɠɔoɠɔ GALAGI wooi ɠana.
Fai é kɔɔɠɔ gani kɔɔ nuiti daalɔɠɔma
«Nà yeewuzeɠezu Zuda nuɓusɛiti daalɔɠɔma,
Zeeluzalɛme nuiti kpein daalɔɠɔma,
gè Ɓaale lɛbi nui mɔtaiti pɛ suwuɠaaleʋe adaʋɛ tɔna ba,
ta zɔiti ti botii ɠɛɛzu bɛ,
ti pɛ ʋɔɔma ta zalaɠa ɠula nuiti.
Nà naati pɛ koloɠolo, niiti ti lɛɛzu pɛlɛ ɠɔmaʋɛ,
ti ɗa nɔkɔ ná aniiti pɛ bu, ti volozu geeɠɔlɔgi zu,
ta zɔiti ti nɔkɔsu bù, ti ɗa ɠona mà, nɛ̀i gè ga Ɠɔoɠɔ GALAGI,
ti lati ti ɗa minazeɠegiti bo ta-ɠalagi Mɔlɔke ʋɛ.
Nà naati koloɠolo, zɔiti ti ʋoluavegai bà, nɛ̀i gè ga Ɠɔoɠɔ GALAGI,
ta zɔiti ti la gàiziɛzu,
ti la wɔinni ti ʋa nà-kpɔba zɔlɔɔ, ɓa ti ʋa gàazaɠa.»
Fai é nu wolaiti daalɔɠɔma
À maaɠɛ kpɔ, Maliɠii Ɠɔoɠɔ GALAGI ɠaazu,
mazɔlɔɔ Ɠɔoɠɔ GALAGI ná-foloi maaɓuɠaa!
Mazɔlɔɔ Ɠɔoɠɔ GALAGI zalaɠai ɠɛʋele ɓɛtɛʋɛ,
é naati gba, zɔiti é ti loligai.
Ɠɔoɠɔ GALAGI ɠɛ ma: «Tama, nà-zalaɠa ɠula voloi,
nà laalɛ kundiɠiiti bu, ta masa dointi,
ta niiti kpein ti wɛɛinti ta-maaɠilii ma zii wosu.
Naama volo ná, nà vɔɔɠu naati ba,
zɔiti ti ɓudɛzu GALA sei ʋɛlɛi ma ɓofalagi maazu, eɠɛ zii ɠiligiti,
ti ti-maliɠii ná-pɛlɛi wuulaave ga naavoloi, sɔlɔɔgai toomai zu ta yaavai.»
Fai é wosu yaaɠoiti daalɔɠɔma
10 Ɠɔoɠɔ GALAGI wooi ɠaa:
«Tama, naama volo ná,
ta kpee woo wolai mɛni Kale ziɠidaʋɛ,
ta zɔngɔ wooi Koi Niinɛi zu ʋele,
ta ani ɠolo lu golai gizeiti ma.
11 À kpeei loo, Buu Ʋele Ɠoizu nuiti,
mazɔlɔɔ yaaɠoiti pɛ ta zaazu,
wali ɠaiziɛ nuiti pɛ ti zuwuɠaa ɠa leʋezu.»
Fai é wosu kibɔɔlɔma nuiti daalɔɠɔma
12 «Naa zu, nà Zeeluzalɛme zuvɛɠɛlɛfɛɠɛlɛ ga fitinai,
nà vɔɔɠu zunuiti pɛ ba,
ti zeini su kpɛ, eɠɛ dɔɔi buuʋɛai,
ti ɗa bo yiimaʋɛ ga:
‹Ɠɔoɠɔ GALAGI la faa nɔpɛ kɛa,
ma ʋagɔ ɓaa ma ɲɔu!›
13 Toosui ɠa wo ga ta-naavoloiti,
ta-ʋɛlɛiti ta ɠoloɠolo.
Ta pɛlɛiti to, kɛlɛ ti la ɲia ti wu,
ti leezɛn ɓeleiti da, kɛlɛ ti la ma lɔɔi ta ɓɔlea.»
Ɠɔoɠɔ GALAGI ná-foloi
14 Ɠɔoɠɔ GALAGI ná-folo wolai maaɓuɠaa,
maaɓuɠaa, gaazuvilɛʋɛ é ɗa ʋa,
kpee ɲɔi ɠa é loozu Ɠɔoɠɔ GALAGI ná-foloi,
salaʋusui ziilogai ti pɛ ba, naa ɓɔɠɔi ɠa kpee wolai loo.
15 Toɠa ɠɛ ga ziiɠaawana voloi,
kidaaʋili foloi ta koozuʋiligi,
faa zuɠoloɠolo foloi ta faaɠaaʋalabai.
Foloi naa ɠa ɠɛ ga kpidii, é ɠɛ ga kpidi ɓɔii,
foloi naa ɠa ɠɛ ga tonaɓiingi ta ɓumugi.
16 Naama volo ná, salaʋusuiti ta puʋugi vɛ,
ti kɔɔ ɓeei loo taa wolaiti daalɔɠɔma siɠigi ti ma,
ta ti zu ʋɛlɛ ɠaaɠoozagiti daalɔɠɔma.
17 «Nà nuɓusɛiti dɔ kidaaʋiligi zu,
ta ziɛ eɠɛ gaazuɠole nuiti, ti ɗa yeeʋɛɛ mɛmɛ,
mazɔlɔɔ ti kotoi ɠɛa dàalɔɠɔma, nɛ̀i gè ga Ɠɔoɠɔ GALAGI.
Ti-ma ɲamai ɠa ʋu adaʋɛ pɛ eɠɛ fufiligi,
ti-ma ʋoomaiti ta luula eɠɛ kaʋai.»
18 Ta-waliiti ta zanugi ti ti ya
naati ti la zooga ti ʋa ti ɠizo
Ɠɔoɠɔ GALAGI ná-ziiɠaawana voloi.
Ná-ziiɠaawana abui ɠa eteai pɛ koloɠolo.
Gaamazu, naa maa ɠa yiki,
toɠa eteai zu nuɓusɛiti pɛ suwuɠaaleʋe.