2
Toligi é wosu ɓɔɠɔmaayei vai zu
À ɠaalɛ ba, wo maaɓɔ,
wɔi wo ga zii, unfe ge la wo ma,
aisa deve zɛʋɛi ʋa ɠula,
foloi ʋa leʋe eɠɛ molo ɓooloi,
aisa Ɠɔoɠɔ GALAGI ná-ziiɠaawana ʋa zeeli wo ma,
aisa Ɠɔoɠɔ GALAGI ná-ziiɠaawana voloi ʋa zeeli!
 
À Ɠɔoɠɔ GALAGI ɠaiziɛ, wɔi wo ga ɓɔɠɔmaayei nuiti zooi zu,
wo ɠolozu ná-deveiti bɛ!
À telebodai ɠaiziɛ ta ɓɔɠɔmaayeii.
Tanisu toɠa wo yɛ ná Ɠɔoɠɔ GALAGI ná-ziiɠaawana voloi.
Nimizai ɠa folo liizu ʋele nuiti tuɠɔ
Kulaai ɠa wo Gaza ʋa tɛtɛ,
Asekalɔn ɠoloɠolo,
Asedɔde nuiti ti ɓɛ ná, ga folo gaalɔgai kpekpe,
Ekelɔn nuiti ti ɠula ná ʋa.
Maanɔɠɔi ɠa wo ʋɛ, Kelɛte nuiti, kpoloɗɛi ɠoba zei wo nuiti!
GALA ná-tukpɔi ɠa wo laalɔɠɔma, é ɠɛ ma:
«Kanaan, é ga Filiseti nuiti ta-yooi,
nà è ɠoloɠolosu, nu vulu nɔpɛ la mɔ ɠɛa ná.
Ɗa-yooi, kpoloɗɛi laaʋɛ,
miná ɠa valibo ga togani laamiizuʋɛ,
zooi baala makɛ nuiti ta ɠɛ ɓizɛzu su,
ti ɗa baalagiti ta-zasai lo ná.»
Kpoloɗɛi laaʋɛ tɔna ka ɠɛ ga Zuda nuɓusɛi mɔtaiti tɔnɔ.
Ta ɠɛ liizu ga ta-loganiiti ná, ti ɗa laami.
Kpɔkɔi, ti ɗa looɠo Asekalɔn ʋɛlɛiti bu,
mazɔlɔɔ Ɠɔoɠɔ GALAGI, ta-ƓALAGI ɠa ti maalobo,
é ta-vai valibo ga pagɔ.
Nimizai ɠa folo ɠulazu ʋele nuiti tuɠɔ
«Gè Moaɓe nuiti ta-ʋoomu gooiti mɛnini,
ta woo ɲɔi Amɔn nuiti ti boni,
ti ɓaaɠulani nà-nuɓusɛiti ma,
ti ɗa ta-yooi zuwɔɔlɔ ga naati ta-yooi, ti ɠɛni seɠezu.»
Ɠɔoɠɔ GALAGI Fai-Pɛ-Maliɠii Izelayɛle ná-GALAGI wooi ɠaa:
«Naa ɠa é ba, eɠɛʋelei gè vulua la ga ɠite,
Moaɓe ɠa ɠɛ ga Sɔdɔme ɠɛʋele,
Amɔn nuiti ti ɠɛ ga Gɔmɔɔl ɠɛʋele,
tufa ɲɔi letele nɔ ɠa a ɠɛ ʋɔnɔsu náʋɛ,
kpolo ɠula yeɠei nɔ ɠɛ ná, zooi ɠoloɠolo mɛtu eyɛsu ɠɔ.
Nà-nuɓusɛi mɔtaiti ta loo ti zu,
nà-zooi zu nuiti ta yɛ ná, naati ta naa zeɠe ga tɔnɔ.»
10 Naa ɠa zeelizu ti ma ga ta-wasogi ma zalai,
tɔɔzei ti ɓaaɠulani Ɠɔoɠɔ GALAGI, Fai-Pɛ-Maliɠii, ná-nuɓusɛiti ma,
ti ta-vaiti gaawɔɔlɔ, naati ti loo bu.
11 Ɠɔoɠɔ GALAGI ɠa ná-maayikii lɛ ga tiye,
mazɔlɔɔ toɠa eteai ná-galagiti kpein koloɠolo.
Naazu, anɛɛ zii niiti ti maaɠoozaai,
ti pɛ ta lɛbiyai ve bɛ,
ɛsɛ gilagilagi ɠa naa ɠɛ tɔ ɓɔɠɔi zeizuʋɛ.
Nimizai ɠa lɛkpɛma ʋelei nu yeezazuʋɛ nuiti tuɠɔ
12 Etiyɔpi nuɓusɛiti ɓalaa,
nà-boɠa zɔkpɔi ɠa ti zuɓota.
Nimizai ɠa lɛkpɛma ʋelei nu ɠɔʋɛzuʋɛ nuiti tuɠɔ
13 Ɠɔoɠɔ GALAGI ɠa yeewuzeɠe
nu ɠɔʋɛzu ʋele yooi laalɔɠɔma,
toɠa Asiili undaaʋili,
é Ninive ɠoloɠolo,
naa ɠɛ ga zou vɔɔi eɠɛ teʋebai.
14 Taai ʋuuzuʋɛ ɠa, toganiiti ta ɠɛ ʋɛɛzu ná,
ta suai ma ziiti kpein,
buungiti ta dɛvɛiti ta ɠɛ zɛlɛsu ma ɓɛdɛgiti ba kpidii.
Nu ɗa wɔniiti goomɛni pɛlɛiti ma venɛtɛlɛiti da,
nu ɠa yɛsu kpofalagi nɔ ma, è pɛlɛi wuuɠoloɠologai ɠa,
sɛdele dakaiti ta ɠula ná.
15 Wɛlɛ lɛɛ taa wolai ʋa, koozunɛɛi ɠɛni su,
su nuɓusɛiti ti ɠɛni kaazu ga ta zeini ziilɛigi zu,
ti ɗa ɠisiɛ ga ti ɠɛɠala la ná.
É woloa, é ɠɛa ga dɔɓɔ zuaiti pɛɛzuʋɛ!
Zɔiti dɔin ti leʋesu ná
ta foei vɛɛzu, ti yeeʋɛɛ la.