18
1 ʻOku valoki ʻe he ʻOtua ʻae fakatātā taʻetotonu ʻoe kālepi mahi. 5 ʻOku ne fakahā ʻae meʻa ʻoku ne fai ki he tamai ʻoku fai totonu: 10 Mo ia ʻoku fai ki he foha angahala ʻoe tamai angatonu, 14 Mo e foha angatonu ʻoe tamai angahala: 19 ʻAe tangata angahala ʻoka fakatomala: 24 ʻAe tangata fai lelei ʻoka fakaholomui. 25 ʻOku fakamatala ʻene fai totonu. 31 Ko e enginaki ki he fakatomala.
1 Naʻe toe hoko kiate au ʻae folofola ʻa Sihova, ʻo pehē,
2 “Ko e hā hono ʻuhinga ʻiate kimoutolu, ʻoku mou lea ʻaki ʻae fakatātā ki he fonua ʻo ʻIsileli, ʻo pehē, ‘Kuo kai ʻe he ngaahi tamai ʻae kālepi mahi, pea kuo maninia ʻae nifo ʻoe fānau?’
3 ʻOku pehē ʻe Sihova ko e ʻOtua, “ʻO hangē ʻoku ou moʻui, ʻe ʻikai toe ʻaonga ke mou ʻai ʻae lea fakatātā ko ia ki ʻIsileli.
4 Vakai, ʻoku ʻaʻaku ʻae laumālie kotoa pē; hangē ʻoku ʻaʻaku ʻae laumālie ʻoe tamai, ʻoku pehē foki ʻae laumālie ʻoe foha ʻoku ʻaʻaku ia: ko e laumālie ʻoku angahala ʻe mate ia.
5 “Ka koeʻuhi, kapau ʻe angatonu ha tangata,
pea ne fai ʻaia ʻoku totonu mo lelei,
6 Pea kuo ʻikai kai ia ʻi he ngaahi moʻunga,
pe hanga hono mata ki he ngaahi tamapua ʻi he fale ʻo ʻIsileli,
pe te ne tonoʻi ʻae uaifi ʻo hono kaungāʻapi,
pe te ne ofi ki ha fefine mahaki fakafefine,
7 Pea kuo ʻikai fakamālohiʻi ʻe ia ha taha,
ka kuo ne toe ʻange ʻae meʻa naʻe tuku ko e fakamoʻoni kiate ia ʻoku fai totongi,
pea ʻoku ʻikai maumauʻi ʻe ia ʻi ha fai mālohi,
kuo ne foaki ʻene mā ki he fiekaia,
pea kuo ne fakakofu ʻae telefua ʻaki ʻae kofu;
8 Ko ia ʻoku ʻikai foaki ke toe totongi mai,
pea te ne maʻu hano tupu,
pea kuo ne taʻofi hono nima mei he fai kovi,
pea kuo ne fai ʻae fakamaau totonu ʻae tangata ki he tangata,
9 Kuo ne ʻeveʻeva ʻi heʻeku ngaahi tuʻutuʻuni,
pea kuo ne fai ki heʻeku ngaahi fakamaau,
ke fai totonu;
ko ia ia ʻoku angatonu,
pea ko e moʻoni ʻe fakamoʻui ia,” ʻoku pehē ʻe Sihova ko e ʻOtua.
10 “Kapau te ne maʻu ha foha, ʻoku kaihaʻa, pea ʻoku ne lilingi ʻae toto,
ʻo ne fai ʻo tatau ki he ngaahi meʻa ni,
11 Pea ʻoku ʻikai te ne fai ha meʻa ʻi he ngaahi meʻa ʻoku totonu ni,
ka kuo ne kai ʻi he ngaahi moʻunga,
pea kuo ne tonoʻi ʻae uaifi ʻo hono kaungāʻapi,
12 Kuo ne fakamālohiʻi ʻae masiva mo e paea,
kuo ne maumauʻi ʻi he fai mālohi,
pea ʻoku ʻikai te ne toe ʻange ʻae meʻa naʻe tuku ko e fakamoʻoni,
pea kuo ne hanga hake hono mata ki he ngaahi tamapua,
pea kuo ne fai fakalielia,
13 Kuo ne ʻatu meʻa ke toe totongi mai,
pea kuo ne maʻu ʻa hono tupu:
pea ʻe moʻui ia? ʻE ʻikai te ne moʻui: kuo ne fai ʻae ngaahi fakalielia ni kotoa pē; ko e moʻoni te ne mate; ʻe ʻiate ia pe ʻa hono toto.
14 ¶ “Pea, vakai, kapau ʻe maʻu ʻe ia ha foha, ʻoku mamata ki he angahala kotoa pē kuo fai ʻe heʻene tamai, pea ʻoku ne tokanga, ka ʻoku ʻikai ke ne fai ʻo hangē ko ia,
15 ʻOku ʻikai te ne kai ʻi he ngaahi moʻunga,
pe te ne hiki hono mata ki he ngaahi tamapua ʻoe fale ʻo ʻIsileli,
pe te ne tonoʻi ʻae uaifi ʻo hono kaungāʻapi,
16 ʻOku ʻikai te ne fakamālohiʻi ha tokotaha,
pe te ne taʻofi kiate ia ʻae meʻa naʻe tuku ko e fakamoʻoni,
pe te ne maumau ʻi ha fai mālohi,
ka kuo ne foaki ʻa ʻene mā ki he fiekaia,
pea kuo ne fakakofu ʻae telefua ʻaki ʻae kofu,
17 Kuo ne taʻofi ʻa hono nima mei he masiva,
pea ʻoku ʻikai te ne maʻu ha totongi taʻetotonu, pe hano tupu,
ka kuo fai ʻeku ngaahi fakamaau,
mo ʻeveʻeva ʻi heʻeku ngaahi tuʻutuʻuni;
ʻe ʻikai mate ia koeʻuhi ko e fai kovi ʻa ʻene tamai, ko e moʻoni ʻe moʻui pe ia.
18 Ka ko ʻene tamai, koeʻuhi naʻa ne fakamālohi kakaha, ʻo ne maumau hono tokoua ʻi he fai mālohi, pea naʻa ne fai ʻaia naʻe ʻikai lelei ʻi he haʻohaʻonga ʻo hono kakai, vakai, ʻe mate moʻoni ia ʻi heʻene fai kovi.
19 ¶ “Ka ʻoku mou pehē, ‘Ko e hā? ʻIkai ʻoku fua ʻe he foha ʻae fai kovi ʻa ʻene tamai?’ ʻOka fai ʻe he foha ʻaia ʻoku lelei mo totonu, pea kuo ne tauhi ʻeku ngaahi fekau, mo ne fai ki ai, ʻe moʻui moʻoni ia.
20 Ko e laumālie ko ia ʻe angahala, ʻe mate ia. ʻE ʻikai fua ʻe he foha ʻae fai kovi ʻa ʻene tamai, pea ʻe ʻikai fua ʻe he tamai ʻae fai kovi ʻae foha: ko e māʻoniʻoni ʻae māʻoniʻoni ʻe ʻiate ia pe, pea ko e fai kovi ʻae angahala ʻe ʻiate ia pē.
21 ¶ “Ka ko eni, kapau ʻe tafoki ʻae angahala mei he angahala kotoa pē kuo ne fai, pea tauhi ʻe ia ʻeku ngaahi fekau, mo ne fai ʻaia ʻoku lelei mo totonu, ko e moʻoni ʻe fakamoʻui ia, ʻe ʻikai siʻi mate ia.
22 Ko ʻene ngaahi angahala kotoa pē ʻaia kuo ne fai, ʻe ʻikai toe lau ia kiate ia: ʻe moʻui pe ia, ko e meʻa ʻi heʻene māʻoniʻoni ʻaia kuo ne fai.
23 He ʻoku ou maʻu ha momoʻi fiemālie siʻi ʻi he mate ʻae angahala? ʻOku pehē ʻe Sihova ko e ʻOtua, ka ʻe ʻikai muʻa, ke tafoki ia mei hono hala, pea moʻui?
24 Ka ʻi he liliu ʻae māʻoniʻoni mei heʻene māʻoniʻoni mo ne fai angahala, pea ne fai ʻo tatau mo e fakalielia kotoa pē ʻaia ʻoku fai ʻe he tangata angahala, ʻe moʻui ia? Ko ʻene māʻoniʻoni kotoa pē ʻaia kuo ne fai, ʻe ʻikai ha lau ki ai: ʻi he fai kovi kuo ne fai, mo e angahala, kuo ne angahala ai, ʻe mate pe ia ʻi ai.
25 ¶ “Ka ʻoku mou pehē, ‘ʻOku ʻikai fai tatau ʻae anga ʻa Sihova.’ Ko eni, fanongo, ʻe fale ʻo ʻIsileli: ʻIkai ʻoku tatau ʻa ʻeku anga? ʻIkai ko hoʻomou anga ʻamoutolu ʻoku fai kehekehe?
26 ʻOka liliu ʻae tangata māʻoniʻoni mei heʻene māʻoniʻoni ʻo ne fai angahala, pea mate ai ia; ko ʻene angahala kuo ne fai, ko ia ia te ne mate ai.
27 Pea pehē, ʻoka liliu ʻae tangata angahala mei heʻene angahala ʻaia kuo ne fai, mo ne fai ʻaia ʻoku lelei mo totonu ʻe fakamoʻui ʻe ia ʻa hono laumālie ke moʻui.
28 Koeʻuhi kuo ne tokanga, mo liliu mai mei heʻene angahala kotoa pē ʻaia naʻa ne fai, ʻe moʻui moʻoni ia, ʻe ʻikai ʻaupito te ne mate.
29 Ka ʻoku pehē pe ʻe he fale ʻo ʻIsileli, ‘ʻOku ʻikai fai tatau ʻae meʻa ʻa Sihova.’ ʻE fale ʻo ʻIsileli, ʻIkai ʻoku fai tatau ʻa ʻeku anga? ʻIkai ko hoʻomou anga ʻamoutolu ʻoku fai kehekehe?
30 Ko ia te u fakamaau ai ʻakimoutolu, ʻe fale ʻo ʻIsileli, ʻo fakatatau ki homou hala taki taha, ʻoku pehē ʻe Sihova ko e ʻOtua. Fakatomala pea fakatafoki ʻakimoutolu mei hoʻomou ngaahi angahala; ko ia ʻe ʻikai hoko ai hoʻomou angahala ko homou ʻauhaʻanga.
31 ¶ “Liʻaki meiate kimoutolu ʻa hoʻomou angahala kotoa pē, ʻaia kuo mou fai hala ai; pea ngaohi kiate kimoutolu ʻae loto foʻou pea mo e laumālie foʻou: he ko e hā te mou fie mate ai ʻe fale ʻo ʻIsileli?
32 He ʻoku ʻikai te u fiemālie ʻi he mate ʻo ia ʻoku mate, ʻoku pehē ʻe Sihova ko e ʻOtua: ko ia fakatafoki ʻakimoutolu, pea mou moʻui.”