19
1 Ko e tēngihia ʻae houʻeiki ʻo ʻIsileli ko e meʻa ʻi he fakatātā ki he laione mo hono ʻuhiki ʻoku fakatō ki he luo, 10 Pea koeʻuhi ko Selūsalema, ʻi he fakatātā ʻoe vaine kuo mae.
1 “Ko ia foki ke ke fai ha tangilāulau koeʻuhi ko e ngaahi houʻeiki ʻo ʻIsileli.
2 Pea ke pehē, ‘Ko e hā ʻa hoʻo faʻē?
Ko e laione fefine:
naʻa ne tokoto hifo ʻi he lotolotonga ʻoe fanga laione,
naʻa ne tauhiʻi ʻa hono ʻuhiki ʻi he lotolotonga ʻoe fanga laione mui.
3 Pea naʻa ne tauhi ʻae taha ʻa hono ʻuhiki:
naʻe hoko ia ko e laione mui,
pea ne fakaʻaʻau ia ke poto ʻi he pō ʻa ʻene meʻakai;
naʻa ne kai tangata.
4 Naʻe fanongo foki ki ai ʻae ngaahi puleʻanga:
pea naʻe moʻua ia ʻi heʻenau luo,
pea naʻa nau ʻomi ia ki ʻIsipite kuo haʻisia ia ʻaki ʻae ukamea.
5 “ ‘Pea ʻi heʻene tatali ʻo mamata,
kuo mole ʻaia naʻa ne ʻamanaki ki ai,
naʻa ne hiki ki he taha kehe ʻi hono ʻuhiki
mo ne ngaohi ia ko e laione mui.
6 Pea naʻe ʻalu fano pe ia ʻi he lotolotonga ʻoe fanga laione mui,
naʻe hoko ia ko e laione mui,
mo ne poto ʻi he pō ʻa ʻene meʻakai,
pea naʻa ne kai tangata.
7 Pea naʻa ne ʻilo honau ngaahi fale fakaʻeiʻeiki naʻe maumau,
pea naʻa ne fakalala honau ngaahi kolo;
pea naʻe ngaongao ʻae fonua,
mo hono fonu ʻo ia,
ko e meʻa ʻi he ʻuʻulu ʻo ʻene tangi.
8 Pea ne toki tuʻu hake kiate ia ʻae ngaahi puleʻanga mei he potu kotoa pē ʻoe ngaahi vahe fonua,
pea naʻa nau ʻaʻau atu kiate ia ʻa honau kupenga:
pea naʻe moʻua ia ʻi heʻenau luo.
9 Pea naʻa nau fakapōpulaʻi ia ʻo haʻi ʻaki ʻae ukamea,
pea ʻomi ia ki he tuʻi ʻo Papilone: naʻa nau ʻai ia ki he ʻana,
ke ʻoua naʻa toe ongo atu ʻa hono leʻo ki he ngaahi moʻunga ʻo ʻIsileli.
10 “ ‘ʻOku tatau hoʻo faʻē mo e vaine
ʻi he ngoue vaine
ʻoku ʻi he veʻe vai:
naʻe fua ngafuhifuhi ia, pea lahi hono vaʻa, koeʻuhi ko e lahi ʻoe vai.
11 Pea naʻe ʻiate ia ʻae ngaahi vaʻa mālohi, ko e tokotoko ʻonautolu naʻe fai ʻae pule,
pea naʻe fakamāʻolunga hake ia ʻi he ngaahi vaʻa matolutolu,
pea naʻe hā mai ia, ʻa ʻene māʻolunga,
pea mo e lahi ʻo hono ngaahi vaʻa.
12 Ka naʻe taʻaki fuʻu hake ia ʻi he mālohi,
naʻe lī hifo ia ki he kelekele,
pea naʻe fakamae hono fua ʻe he matangi hahake:
naʻe mafesifesi mo fakamae hono ngaahi vaʻa mālohi:
pea ne keina ia ʻe he afi.
13 Pea ko eni, kuo tō ia
ʻi he toafa ʻi he kelekele mōmoa mo kakā.
14 Pea kuo ʻalu atu ʻae afi mei he manga ʻo hono ngaahi vaʻa,
ʻaia kuo keina ai hono fua,
ko ia ʻoku ʻikai kei ai hono vaʻa mālohi, ke hoko ko e tokotoko ke pule ʻaki.’
Ko eni ʻae meʻa ke tēngihia, pea ʻe hoko ia ko e meʻa ke tangilāulau ai.”