Si-nu̱guanꞌ Yanꞌanj Xa̱ngaꞌ San Juan 11

Muerte de Lázaro

1 Hué dan ni̱ hua ꞌngo̱ tsínj aꞌnanꞌ gu̱ꞌnaj síꞌ Lázaro. Ni̱ nne síꞌ xumanꞌ Betania huin xánj yunꞌunj gu̱ꞌnaj María nga̱ xugüij únꞌ Marta. 2 (Ni̱ xicaꞌuij Lázaro huin María. Hué únꞌ huin si gayanj nnee quinꞌ da̱j dacój Jesús. Ni̱ naco̱ dacój síꞌ, guiꞌyaj únꞌ nga̱ hueé chra̱ únꞌ.) 3 Ngaa ni̱ gaꞌníj nu̱ngüej xicaꞌuij Lázaro ꞌngo̱ nuguanꞌ rian Jesús, gataj nu̱ngüej unj:

―Axa̱ꞌ tsínj ꞌi̱ ruhuá re̱ꞌ, sani̱ aꞌnanꞌ sij, Señor. ―Daj gataj nuguanꞌ gaꞌníj nu̱ngüej unj rian Jesús.

4 Ni̱ ngaa gunun Jesús nuguanꞌ daj, ni̱ gataj síꞌ:

―Sé si ga̱huiꞌ sij, gui̱ꞌyaj xiꞌi̱ da mánj. Sani̱ guiranꞌ sij sisi̱ ga̱ꞌmi sa̱ꞌ ni ngüi̱ xiꞌīj huīnj daꞌníj Yanꞌanj nej. ―Daj gataj Jesús gunun ni tsínj nataꞌ nuguanꞌ daj rian sij.

5 Ni̱ ꞌi̱ ruhua Jesús niꞌyaj síꞌ Marta nga̱ María nga̱ xicaꞌuij nu̱ngüej únꞌ Lázaro. 6 Sani̱ gunáj síꞌ yahuij güi rian nne síꞌ ngaa gunun síꞌ sisi̱ aꞌnanꞌ Lázaro. 7 Ngaa síj ni̱ gataj Jesús gunun ni tsínj nicoꞌ sij:

―Ga̱nꞌanj ru̱huaꞌ yún néꞌ estado Judea aj. ―Daj gataj Jesús.

8 Ni̱ gataj ni tsínj nicoꞌ Jesús:

―Rabí, cuanj ni̱ gahuin ruhua ni tsínj israelita ma̱n yuꞌuj daj ga̱ꞌuiꞌ ni sij yej manꞌán re̱ꞌ. Ni̱ u̱n sin huin ni̱ huin ruhuá re̱ꞌ ga̱nꞌanj ru̱huaꞌ yún re̱ꞌ yuꞌuj daj únj. ―Daj gataj ni sij gunun Jesús.

9 Ngaa ni̱ gataj Jesús:

―Sé si xa̱ngaꞌ sisi̱ xu̱huij hora nicaj güi a̱ꞌ. Ni̱ sisi̱ chéj néꞌ ne̱ꞌ guniꞌyanj, ni̱ si̱ natuj néꞌ mánj. Daj si xigui̱n yanꞌa̱n xataꞌ aj. 10 Sani̱ sisi̱ chéj néꞌ ne̱ꞌ ni̱, ni̱ na̱tuj néꞌ xiꞌí si nitaj yanꞌa̱n xigui̱n mánj. ―Daj gataj Jesús.

11 Ngaa guisíj gaꞌmi Jesús daj, ni̱ gataj ru̱huaꞌ yún sij:

―Atoj Lázaro tsínj nicaj dugüiꞌ nga̱ néꞌ. Ga̱nꞌān ga̱nꞌanj jnanun ruhuāj sij. ―Daj gataj Jesús.

12 Yuꞌuj daj gataj ni tsínj nicoꞌ Jesús:

―Señor, sisi̱ atoj sij, ni̱ ga̱nahuin sa̱ꞌ sij aj. ―Daj gataj ni sij.

13 Ni̱ daꞌngaꞌ daj gataj Jesús si hua niꞌi síꞌ si Lázaro hua gahuiꞌ. Sani̱ gani ruhua ni tsínj nicoꞌ Jesús sisi̱ yya atoj Lázaro, gataj Jesús, ruhua ni sij. 14 Ngaa ni̱ gaꞌmi ni̱ca Jesús rian ni sij. Ni̱ gataj síꞌ:

―Hua gahuiꞌ Lázaro aj. 15 Ni̱ huin nia̱ꞌ ruhuāj sisi̱ nun ganēj yuꞌuj daj ngaa gahuiꞌ síꞌ. Xiꞌí si gahuiꞌ síꞌ, ni̱ gu̱xuman doj ruhua á re̱ꞌ ni̱ꞌyaj á re̱ꞌ manꞌānj. Sani̱ ga̱nꞌanj néꞌ rian ngaj sij aj. ―Daj gataj Jesús gunun ni sij.

16 Ngaa ni̱ gataj tsínj gu̱ꞌnaj Tomás, huin tsínj gu̱ꞌnaj Dídimo nej gunun ango ni tsínj nicoꞌ Jesús:

―Ga̱nꞌanj néꞌ ni̱ ga̱huiꞌ nu̱guanꞌan néꞌ nga̱ sij. ―Daj gataj Tomás.

Jesús, la resurrección y la vida

17 Ni̱ ngaa guisíj Jesús yuꞌuj daj, ni̱ gataj ni ngüi̱ gunun sij sisi̱ guisíj ga̱nꞌanj güi gachinꞌ ni sij níman daj. 18 Ni̱ ni̱chrunꞌ ꞌngo̱ si hua̱ꞌnij kilómetro duꞌua xumanꞌ Betania ngaj xumanꞌ Jerusalén. 19 Ni̱ ganꞌanj ni̱ꞌyaj nico ni ngüi̱ israelita rian nne Marta nga̱ María sisi̱ na̱huin nia̱ꞌ ruhua nu̱ngüej xugüiꞌij unj. Daj si nani ruhua nu̱ngüej unj xiꞌí xicaꞌuij unj gahuiꞌ.

20 Ni̱ ngaa gunun Marta sisi̱ ꞌna̱ꞌ gui̱sij Jesús, ni̱ gahui unj na̱huin raꞌa unj Jesús. Sani̱ gunáj María chruhua hueꞌ. 21 Ngaa ni̱ gataj Marta gunun Jesús:

―Señor, sisi̱ nun gané re̱ꞌ cuanj, ni̱ si̱ gahuiꞌ xicaꞌuī sa mánj. 22 Sani̱ niꞌīnj yya̱j sisi̱ daranꞌ si achínj jniꞌyáj re̱ꞌ rian Yanꞌanj, ni̱ ri̱qui Yanꞌanj anj. ―Daj gataj Marta.

23 Ngaa ni̱:

―Ga̱naꞌnij xicaꞌuíj re̱ꞌ aj. ―Gataj Jesús.

24 Ni̱:

―Niꞌīnj sisi̱ ga̱naꞌnij sij ngaa ga̱naꞌnij ni níman güi ga̱nahuij xungüi̱ aj. ―Gataj Marta gunun Jesús.

25 Ngaa ni̱ gataj Jesús:

―Huēj gui̱ꞌyaj si ga̱naꞌnij ni níman. Ni̱ ga̱ ni̱ꞌnaꞌ ni̱ganj ni sij nga̱ Yanꞌanj, gui̱ꞌyā. Ni̱ nu̱nj si hua gahuiꞌ ꞌngo̱ tsínj xuman ruhua niꞌyaj manꞌānj, sani̱ ga̱naꞌnij sij, gui̱ꞌyā aj. 26 Ni̱ daranꞌ ni ngüi̱ hua ni̱ꞌnaꞌ mán, ni̱ nitaj a̱man ga̱huiꞌ niman ni sij sisi̱ xuman ruhua ni sij niꞌyaj ni sij manꞌānj. Xuman ruhuá re̱ꞌ nuguanꞌ nan níꞌ. ―Daj gataj Jesús gunun Marta.

27 Ngaa ni̱ gataj Marta:

―Xuman ruhuāj sisi̱ hué re̱ꞌ huin Cristo daꞌníj Yanꞌanj. Ni̱ gaꞌnáꞌ re̱ꞌ chruhua xungüi̱ nan, Señor. ―Daj gataj Marta.

Jesús llora ante la tumba de Lázaro

28 Ngaa guisíj gaꞌmi unj nuguanꞌ nan, ni̱ ganꞌanj ga̱quinj unj xugüiꞌij unj, María. Ni̱ gataj hui̱ unj gunun María:

―Niquinꞌ Maestro aquínj sij manꞌán re̱ꞌ aj. ―Daj gataj Marta gunun María.

29 Ni̱ ngaa gunun María nuguanꞌ daj, ni̱ naxu̱man yoo̱ unj ganꞌanj ni̱ꞌyaj unj rian niquinꞌ Jesús. 30 Sani̱ nun güin gahuin gatúj Jesús xumanꞌ daj. Hua gue̱ niquinꞌ sij rian nariꞌ Marta sij.

31 Ngaa ni̱ ni ngüi̱ israelita ma̱n chruhua hueꞌ, ni̱ ngüi̱ aꞌmi nga̱ María xiꞌí niman gahuiꞌ, ni̱ guiniꞌi ni sij sisi̱ naxu̱man yoo̱ únꞌ ganꞌanj únꞌ. Ni̱ gani ruhua ni sij sisi̱ ganꞌanj únꞌ ga̱co únꞌ, ruhua ni sij. Ni̱ guinicoꞌ ni sij ru̱cu únꞌ ganꞌanj ni sij.

32 Ni̱ ngaa guisíj María rian niquinꞌ Jesús, ni̱ guiniꞌi únꞌ manꞌan síꞌ. Ngaa ni ganiquinꞌ ráj da̱coj únꞌ rian síꞌ. Ni̱ gataj únꞌ:

―Señor, sisi̱ nun gané re̱ꞌ nan cuanj, ni̱ si̱ gahuiꞌ xicaꞌuī sa mánj. ―Gataj María gunun Jesús.

33 Ni̱ ngaa guiniꞌi Jesús sisi̱ aco María nga̱ ni ngüi̱ israelita gaꞌna̱ꞌ nga̱ únꞌ, ni̱ ducu ganani ruhua síꞌ. 34 Ngaa ni̱ gataj síꞌ:

―Ni̱ a gachinꞌ ni é re̱ꞌ únj. ―Daj gataj Jesús.

Ngaa ni̱:

―Gu̱nꞌ ni̱ꞌyáj re̱ꞌ, Señor. ―Gataj ni sij.

35 Ngaa ni̱ gaco Jesús aj. 36 Yuꞌuj daj gataj ni ngüi̱ israelita:

―Ni̱ꞌyaj á re̱ꞌ si ducu ꞌi̱ ruhua sij niꞌyaj sij tsínj gahuiꞌ daj. ―Daj gataj ni sij.

37 Sani̱ gataj go̱ꞌngo ni sij:

―Hué tsínj nan guiꞌyaj naxíꞌnij rian ꞌngo̱ tsínj duri. Ni̱ sisi̱ hué daj nucuaj sij, ni̱ u̱n sin huin ni̱ gaꞌninꞌ ruhua sij sisi̱ gahuiꞌ Lázaro únj. ―Daj gataj ni sij.

Resurrección de Lázaro

38 Ngaa ni̱ ducu ganani ruhua Jesús. Ni̱ gahuin ni̱chrunꞌ sij rian gachinꞌ ni sij Lázaro huin ꞌngo̱ huej. Ni̱ hua ránj ꞌngo̱ yej xa̱chij rian yuꞌuj. 39 Ngaa ni̱:

―Gu̱xun a ni é re̱ꞌ yej aj. ―Gataj Jesús.

Ngaa ni̱ gataj Marta xicaꞌuij tsínj gahuiꞌ daj gunun Jesús:

―Señor, sani̱ ga guinꞌ riꞌyuj sij si guisíj ga̱nꞌanj güi ngaj sij aj. ―Daj gataj Marta.

40 Ngaa ni̱ gataj Jesús gunun unj:

―Hua gatā gunún re̱ꞌ sisi̱ gu̱xuman ruhuá re̱ꞌ ni̱ꞌyaj re̱ꞌ manꞌānj, ngaa ni̱ gui̱niꞌí re̱ꞌ sisi̱ nucuaj gui̱ꞌyaj Yanꞌanj anj. ―Daj gataj Jesús.

41 Ngaa ni̱ guxun ni sij yej rian gachinꞌ ni sij níman. Ni̱ guiniꞌyaj Jesús xataꞌ, ni̱ gataj síꞌ:

―Tata chréꞌ, guruhuá re̱ꞌ si gunún re̱ꞌ si-nu̱guanꞌānj. 42 Niꞌīnj sisi̱ ni̱ganj unún re̱ꞌ nuguanꞌ aꞌmī. Sani̱ aꞌmī nuguanꞌ nan sisi̱ gu̱nun ni ngüi̱ mán yuꞌuj nan ngāj sisi̱ gu̱xuman ruhua ni sij si hué re̱ꞌ huin si gaꞌníj gaꞌnāj chruhua xungüi̱ nan. ―Daj gataj Jesús gunun Yanꞌanj.

43 Ngaa guisíj gataj Jesús nuguanꞌ daj, ni̱ nucuaj gaguáj sij. Ni̱ gataj sij:

―Lázaro, ga̱hui so̱ꞌ ga̱ꞌnaꞌ so̱ꞌ aj. ―Daj gataj Jesús gaguáj sij.

44 Ngaa ni̱ gahui tsínj gahuiꞌ daj. Ni̱ anumi raꞌa sij nga̱ dacój sij atsij da gahui sij. Ni̱ hua ránj rian sij ꞌngo̱ paño. Ngaa ni̱ gataj Jesús:

―Na̱chi a ni é re̱ꞌ atsij, ni̱ ga̱ꞌue ga̱nꞌanj sij aj. ―Daj gataj Jesús.

El complot para matar a Jesús

45 Ni̱ guiniꞌi ni ngüi̱ israelita ni ngüi̱ gaꞌna̱ꞌ nga̱ María si guiꞌyaj Jesús. Xiꞌí daj guxuman ruhua nico ni sij guiniꞌi ni sij Jesús. 46 Sani̱ ganꞌanj na̱taꞌ ango daꞌaj ni sij rian ni tsínj fariseo si guiꞌyaj Jesús. 47 Ngaa ni̱ nahuin yuꞌ ni tsínj fariseo nga̱ ni chrej aꞌninꞌ rian ni chrej, guiꞌyaj ni sij ꞌngo̱ junta. Ni̱ gataj ni sij:

―Ni̱ u̱n sin gui̱ꞌyaj néꞌ ruhua á re̱ꞌ únj. Daj si tsínj daj ꞌyaj nico si sa̱ꞌ digyán sij rian ni ngüi̱ aj. 48 Sisi̱ ga̱ꞌninꞌ ruhua néꞌ, ni̱ gu̱xuman ruhua daranꞌ ni ngüi̱ gui̱niꞌyaj ni sij síꞌ. Hué dan ni̱ ga̱ꞌnaꞌ ni tsínj nicaj sun ni tsínj romano, ni̱ du̱guane ni sij si-nuhui néꞌ. Ni̱ jna̱hui ni sij xánj néꞌ nej. ―Daj gataj ni sij gunun ni dugüiꞌ ni sij.

49 Sani̱ gaꞌmi ꞌngo̱ dugüiꞌ ni sij huin tsínj gu̱ꞌnaj Caifás, huin síꞌ chrej huin rian ni̱nꞌ yoꞌ daj. Ni̱ gataj síꞌ:

―Nun niꞌi a ni é re̱ꞌ mánj. 50 Ni̱ nitaj si acaj ni é re̱ꞌ cuenta sisi̱ sa̱ꞌ ga̱huiꞌ urin tsínj daj xiꞌí ni ngüi̱. Ngaa ni̱ sé daranꞌ néꞌ ni tsínj israelita ga̱nahuij mánj. ―Daj gataj Caifás gunun ni sij.

51 Sani̱ nun gataj Caifás nuguanꞌ daj güenda manꞌan sij. Sani̱ ri̱an huin síꞌ chrej huin rian ni̱nꞌ yoꞌ daj, ni̱ gaꞌmi síꞌ si-nu̱guanꞌ Yanꞌanj sisi̱ ga̱huiꞌ Jesús xiꞌí ni ngüi̱ israelita. 52 Ni̱ sé xiꞌí urin ni ngüi̱ israelita huin ga̱huiꞌ Jesús mánj. Sani̱ ga̱huiꞌ sij sisi̱ na̱huin chreꞌ daranꞌ ni ngüi̱ huin daꞌníj Yanꞌanj huin ni ngüi̱ gaxaꞌni̱ chruhua xungüi̱, gui̱ꞌyaj sij.

53 Ngaa ni̱ asi̱j güi daj, ni̱ dagaꞌmi dugüiꞌ ni sij sisi̱ da̱gahuiꞌ ni sij Jesús. 54 Hué dan ni̱ nun ga̱che re̱ngaꞌ Jesús scanij ni ngüi̱ israelita ga̱ mánj. Sani̱ gahui sij estado Judea ganꞌanj sij ꞌngo̱ yuꞌuj ngaj ni̱chrunꞌ quij guiꞌyanj na̱co ꞌngo̱ xumanꞌ gu̱ꞌnaj Efraín. Ni̱ yuꞌuj daj gunáj sij nga̱ ni tsínj nicoꞌ sij.

55 Ngaa ni̱ gahuin ni̱chrunꞌ guiꞌyanj pascua guiꞌyaj ni tsínj israelita. Ni̱ gahui ni ngüi̱ mán go̱ꞌngo ni xumanꞌ ganꞌanj ni sij xumanꞌ Jerusalén. Daj si huin ruhua ni sij na̱guiꞌyaj sa̱ꞌ ni sij manꞌan ni sij rian Yanꞌanj da̱j rúnꞌ ataj si-ley Moisés ngaa achin ga̱huin guiꞌyanj pascua. 56 Ni̱ achéj ni sij nanoꞌ ni sij Jesús. Ni̱ nachínj snanꞌanj ni sij ni dugüiꞌ ni sij mán ni sij chruhua nuhui. Ni̱ gataj ni sij:

―Da̱j ani ruhua ni é re̱ꞌ únj. Ga̱ꞌnaꞌ sij guiꞌyanj nan níꞌ, asi̱ si̱ gaꞌna̱ꞌ sij sa̱ꞌ. ―Daj gataj ni sij.

57 Ni̱ hua gaꞌninꞌ ni tsínj fariseo nga̱ ni chrej aꞌninꞌ sun rian ni ngüi̱. Ni̱ gataj snanꞌanj ni sij rian ni síꞌ sisi̱ gui̱niꞌi ni síꞌ ni̱ a nne Jesús, ni̱ ga̱nꞌanj na̱taꞌ ni síꞌ rian ni sij. Ngaa ni ga̱ꞌue gui̱daꞌa ni sij Jesús, ruhua ni sij.