26
Ŋeer ee ighason Maaron to ipaghazoŋaini ighe i ŋeer duduuŋa
Mbouŋ to David
O Yoova, yau naghe yo upaghazoŋai ghau ila tamtamon matazi ughe yau ŋeer duduŋag.
Pasaa, laghooŋ tsiau, yau nataghon ŋgar duduuŋa mon.
Ve naghur ilat tsio ariaaŋ. Lolog ruru payo mako. *
 
Yoova, ugabiiz ghau, ve utoov ghau.
Utiir poghania lolog ve ŋgar tsiau, ve ughita: Naduduuŋ ila yo matam, ma mako? *
 
Monmon matag iŋgalŋgal ŋgar tsio tau lolom isaghav tamtamon tsio ariaaŋ ve uluul zi.
Yo utaghon saveeŋ tsio irau saawe. Gabuam tana ipapalot ghau pa laghooŋ tsiau, tauta nataghon eez tsio. *
Yau yeŋa zeran karomŋa niluplup ghei mako.
Yes tau tipamir tauzi pa ghuruuŋ ila toozi na, yau napaak zi mako. *
 
Yau naghur koi pa yes tau tighamgham ŋgar sasaghati, ve naleep soghan pazi.
Isaav ighe zeran sasaghati tilup zi, ene irau naleep tomani zi mako.
O Yoova, yau nataghon ŋgar duduuŋa mon. Tauta namin nimag, leso itotoi ighe yau leg sosor eta mako.
Ve nalaagh livutin artaal tau tighamgham watooŋrau payo izala na, ve nasuŋsuŋ payo. *
 
Yau aat nambou mbouŋ toman lolog poia ve napait ghom,
ve navotia uraat tsio ŋgeretazi tau maata ite kat na.
Yoova, yau lolog pa rumei tsio kat. Pa ene niam to lepoogh.
Yo utotoi tapirim ve mbonarim tomania poia tsio ivotvot ta sewe. *
 
Yes tau tisosor pa eez tsio na, upasov ghau tomani zi sov.
Ve yes tau tiliŋliŋ siŋ pa tamtamon na, urav ghau namaat tomani zi sov.
 
10 Zeran tauvene, nimazi igharghaar pa ghamuuŋ ŋgar sasaghati naol.
Ve isaav ighe tighol zi to tigham ŋgar saghati eta, ene aat tiyok mon ve tighamu.
11 Eemon laghooŋ tsiau, yau nataghon ŋgar duduuŋa mon.
O Yoova, yau besooŋa tsio. Lolom isaghatin ghau ve ugham mulin ghau.
12 Yau nayooz tuŋia ila taan duduuŋa. Irau natap mako.
Tauvene saawe tau tamtamon tsio tilup zi pa suŋuuŋ, yau aat nala tomani zi, ve napait ghom pa poia tsio.
* 26:1 Mbo 7:8+ * 26:2 Mbo 139:1, 23+ * 26:3 Mbo 119:30 * 26:4 Mbo 1:1; 2Kor 6:14 * 26:6 Mbo 15:1, 24:3+ * 26:8 Igham 40:35