27
Mbouŋ to tamtamon tau iroi mako ve ighur ila to Maaron ariaaŋ
Mbouŋ to David
1 Yoova imin ghazooŋa payau, ve i Uleeŋa tsiau.
Pale naroi pa sei? Mako.
Pasaa, yau nanumeer Yoova. I imin ruum ariaaŋa to nayooŋ ila loolo.
Tauta naroi pa gabua eta mako.
2 Isaav ighe zeran sasaghati tipaburigin malmal payau,
ve koiagŋa tighe tikari ghau,
ene pale Yoova igham aghezi ilot, ve titap.
3 Isaav ighe zaaba katini tilam tilivutin ghau to tigham malmal, ene irau lolog bubu ve naroi pazi mako.
Isaav ighe malmal iburig ve koiagŋa tiŋarui ghau tilam, yau aat nanumeer Maaron ve nayooz ariaaŋ.
4 Gabua eemon geeg ta yau lolog pani kat. Tauta naghe naghason Yoova pani.
Saawe isov tau naleep izi taan, yau naghe le naleep toman Yoova ila rumei tooni loolo, ve naghita poia tooni.
Yau naghe naleep ila rumei tooni loolo, leso naghasoni to itotoi tauu ve ŋgar tooni payau.
5 Isaav ighe pataŋani tiina eta ivot payau, i aat iŋgin ghau naleep poi ila niima saamba.
I pale iŋgooz ghau ila rumei tooni loolo.
Ve i pale isur ghau nazala maetaaz ta saaŋa we, leso koiagŋa tigham gabua eta payau sov.
6 Onoon, aazne, koiagŋa timeke tilam tilivutin ghau.
Eemon naroi mako. Pasaa, Yoova pale iuul ghau ve naliiv zi.
Tauvene nayoor eeza toman tintinig.
Nagham watooŋrau pani ila rumei tooni loolo, ve nambou ve narav gita to napait eeza.
7 Yoova, ighe nataŋ rarai ghom pa uleeŋ, na ulooŋ taŋiiz tsiau.
Lolom isaghatin ghau ve uul ghau. Pa yau besooŋa tsio.
8 Yo usaav payau ughe: “Ulam usuŋ payau, leso natotoi taug payo.”
Tauta lolog naghe nalat tsio, ve upatooŋ taum payau.
9 Yau besooŋa tsio. Uŋgooz naghom payau sov.
Atem yavyav ve umbuzir payau sov.
Maaron, muuŋ ve ilam, yo mon ta Uleeŋa tsiau.
Tauvene upul ghau, ve ughur murim payau sov.
10 Isaav ighe tamaŋ ve tinaŋ tighur murizi payau,
ene pale Yoova tauu igham ghau ve iŋgin ghau.
11 Yoova, upaghazoŋai ghau pa eez tsio.
Umuuŋ payau ve utotoi ghau pa eez duduuŋa.
Pa koiagŋa katini tisasaŋan ghau.
12 Upul ghau nala nimazi sov!
Pa yes tiŋgalŋgal saveeŋ karom naol payau, ve tighamgham saveeŋ paroiŋ payau.
13 Eemon yau naghur ila naghe yes irau tivaghamun ghau mako.
Yau aat naleep matag yaryaare, ve naghita poia to Yoova.
14 Tauvene yo tau ughur ila to Yoova na, yau nasaav payo naghe: “Unumeer Yoova, ve ughur matam pani.
Uroi sov. Lolom eemon, uyooz ariaaŋ, ve usaŋan pa uleeŋ tooni.”