2
Mete ma hatahori kamaherek kara rakabua, ita muste tao talo bee?
1 Makasososan, au oke ei hule-haradoi fee basa hatahorir. Mete ma ei miu masare mbali Manetualain, na, moke fo Ana tulun basa hatahorir marai susa-sonak kara dale. Ma moke makasi, nahuu Ana tao malole neu sira basa sara.
2 Hule-haradoi talo naa, fee basa mane-manek kara ma basa hatahori mana toꞌu parenda boe. No dalak naa, ita basa ngga leo-laꞌo no lino-lendek ma mole-damek, tungga Manetualain hihii-nanaun. Leleo-lalaꞌok naa, nandaa no hatahori mana makaluku-makatele neun.
3 Huhule-haradoi matak leo naak naa, malole. Naa, tao namahoko Manetualain mana tao nasoi-nasoda ita.
4 Ana nau fo basa hatahorir hambu masoi-masodak, ma ralela hata fo ndoos. Ndia:
5 Manetualain naa, kada kisek.
Ma hambu kada lelete kisek fo nakadadamek Manetualain no ita hatahori dae-bafok, ndia Yesus Karistus.
Yesus naa, hatahori dae-bafo isi-isik.
6 Ana loo lima aon fo tefa-soi nala ita basa ngga numa ita sala-singgon nara mai.
Ndaa no fain, boe ma Manetualain buka no ledo-ledo hara lii malole naa ena, fo nafada neu basa hatahorir.
7 Ma Ana here nala au dadi uu Ndia nedenun ena, fo laꞌok uu afada hatahori ta Yahudir nai bee a mesan ma anori sara, mita fo ara oo ramahere neu Lamatuak Yesus ma leo-laꞌo tungga eno-dala ndoos boe. Hata fo au afadak ia, tetebes. Au ta kokolak bafa rouk.
8 Au hihiing talo ia: Nai bee a mesan, mete ma ei makabua fo hule-haradoi, na, ei dalem mara muste neulauk esa no esa. Esa boso namanasa esa. Boso mareresi lelena. Mete ma ei soꞌuk limam mara fo hule-haradoi, na, dalem mara muste lolo-laok.
9-10 Leo naak oo, inak kara boe. Au nau fo ara rafafaꞌu ao-inan nara no mandaak, ma pake bua-loꞌa randaa no dala-hadak. Ara hae heti aon nara fo hatahorir pui-pui sara, ma feo langga bulun nara mata-matak kara, do ara pake bua-loꞌa mabeli ta randaa no dala-hadak, do ara ramasosoa lena-lenak, pake lilo mbilas, lilo fulak ma poematar. Hata fo tao nala inak kara dadi manaꞌa hiek kara, na, ndia dalen nara lolo-laok ma soa tao kada neulauk. Naa, ndaa no inak mana makaluku-makatele neu Manetualain.
11 Mete ma saranik kara rakabua fo nenene nenorik, na, inak kara oo tungga hohoro-lalanek fo pasa ndiꞌi doon nara no malole boe, fo nenene tebe-tebe nenorik naa. Boso kutu-nuꞌu ma mamue.
12 Tungga au naa, inak kara ta randaa soꞌuk aon nara fo parenda touk kara ma ranori sara. Malole lenak inak kara matu-matu a leo.
13 Huu Manetualain adu nakahuluk Adam. Basa naa, dei de Hawa.
14 Ma nitu malanggan ta kedi nala Adam nakahuluk, tehuu inak. Numa faik naa mai, hatahori dae-bafok lena-langga Manetualain hohoro-lalanen.
15 Tehuu leo mae talo naa oo, inak kara bisa hambu masoi-masodak boe, nahuu ara bonggi rala anak. Sadi ara ramahere tebe-tebe neu Karistus, leo-laꞌo rasue-laik esa no esa, leo-laꞌo no dale lolo-laok ma nandaa no dala-hadak.