3
Dudu-furak soa-neu mana dadi malangga saranik
1 Memak tebe, hata fo hatahori kokolak nae, “hatahori mana nau dadi malangga saranik, naa sosoa-ndandaan, ana here nala ue-osa esa neulaun seli ena.”
2 Malangga saranik kara leleo-lalaꞌon muste leo ia: Naden lolo-laok. Dalen mahanik neu kada saok esak ka. Nanea nala aon. Mana matu-matuk. Hatahorir fee hada-horomatak neun. Uma lelesun neni soik soa-neu fuik kara. Ma ana bisa didi-bui hatahori laen.
3 Boso hatahori mana ninu mafuk, ma liman boso dai-daik neu hatahori. Hatahori mana mandaak lenak ndia: hatahori dale lilok, mana toꞌu ndolu-dalek ma ta mana dale hedi doik.
4 Ana muste nafafaꞌu nala uma-loon no malole. Anan nara oo muste fee hada-horomatak ma ramanene neun boe.
5 Mete ma hatahori naa ta bisa nafafaꞌu nala uma-loo heli-helin, na, talo bee fo ana bisa nafafaꞌu nala Manetualain saranin nara?
6 Mete ma here malangga saranik, na, malole lenak here mala hatahori fo mana nai Karistus dale dook ka ena. Boso soꞌu malangga saranik numa hatahori bei fo namahere neu Lamatuak Yesus mai. Te hatahori leo naak, neu ko ana koa ao no muda hiek. Boso losak Manetualain delun, sama leo Ana delu nitur malanggan.
7 Mete ma soꞌuk hatahori dadi malangga saranik, na, sangga hatahori fo mana naena nade malole ena. Hatahori deak kara oo muste fee hada-horomatak neu malangga saranik naa boe. No dalak naa, ana ta mae hata esa boe na. Ma nitur malanggan ta bisa ike nalolin.
Hatahori mana sou malangga saranik uen
8 Leo naak oo no hatahori mana sou malangga saranik uen boe. Sira raa, muste hatahori mana naena nade malole, ta mana puputak bafa-maan, ta mana ninu mafuk, ma boso hatahori mana hii hambu nanalak lena-lenak.
9 Dalen nara muste lolo-laok ma ara muste toꞌu rahere nenorik fo Manetualain buka natudun neu ita hatahori kamaherek kara ena.
10 Parisa matalolole sira leleo-lalaꞌon ma ue-osan nara. Mete ma hatahorir ta hambu sira salan, na, dei fo soꞌuk kasa fo sou malangga saranik uen nara.
11 Leo naak oo, sira sao inan boe. Sira raa, muste inak fo mana leo-laꞌo ndaa no dala-hadak ma naena nade malole. Boso mana tao naboboo hatahori laen naden. Ara muste rakatataak rala aon nara, ma hatahori oo bisa namahere neu sara boe.
12 Mana sou malangga saranik uen nara oo muste touk fo dalen mahanik neu kada sao inak esak ka boe. Ana oo muste nafafaꞌu nala uma-loon no malole ma muste nafafaꞌu nala anan nara boe.
13 Sira mana raono-lalau saranik kara no malole, neu ko hatahorir boe fee hada-horomatak neu sara. Ma ara boe rambarani, ta ramataꞌu kokolak laꞌe-neu sira nemeheheren neu Yesus Karistus.
Ita nemeheheren oka-huun
14-15 Timotius, ee! Au amahena ta dook ka bali, au bisa mai tiro-dangga o ena. Mete ma hambu kai-baak fo akai, na, susurak ia losa nakahuluk o limam ena. Au surak susurak ia fo nau afada o ae, Manetualain nufanelun nara muste leo-laꞌo talo bee. Boso lilii-ndondou mae, Lamatuak naa, Manetualain mana masodak. Ndia hatahorin nara sama leo uma esa fo naena batu kakalan ma dii inan matea. No dalak naa, ara muste toba rahere Manetualain nenorin fo ndoos.
16 Manetualain buka dedeꞌa nemeninok ta neni babanggak numa ita nemeheheren mai ena. Oka-huun talo ia:
Karistus mai nai dae-bafok ena,
pake hatahori dae-bafok mata-aon leo ita.
Manetualain Dula-dalen oo natudu boe nae,
Yesus naa, Hatahori dale ndoos.
Ma Manetualain atan nara marai nusa tetuk do inggu temak oo mete-ritan boe.
Manetualain soꞌuk kana neni nusa tetuk do inggu temak neu ena,
basa de nakadedemak kana.
Ndia tutuin natanggenggela ena, losa hatahori-nusa-nusak marai dae-bafok katematuan.
Nai bee a mesan nai dae-bafok ia, hatahorir ramahere neun ena.
Ita nemeheheren talo naa!