4
Jaꞌ liꞌ yaloj ti ichꞌbil o ta mucꞌ tey ta vinajel ti Rioxe
1 Tsꞌacal to iquil noxtoc ti jamal jun tiꞌna ta vinajele. Ti Cajvaltic Jesuse ti baꞌyi liscꞌopone, ti coꞌol xchiꞌuc corneta cꞌalal icꞌopoje, jaꞌ yech liyalbe chac liꞌi:
―Muyan tal. Chcacꞌ avil ti cꞌusitic chlaj taluc ta tsꞌacale ―xiyut.
2 Ta syuꞌel ti Chꞌul Espíritue tey vaꞌalon ta vinajel cꞌalal icaꞌie. Iquil jcot mucꞌta chotlebal, leclec sba meltsanbil. Jaꞌ tey chotol ta spas mantal ti Rioxe.
3 Ti Rioxe oy xojobal coꞌol xchiꞌuc xojobal jaspe-ton xchiꞌuc cornalina-ton, tsojtsojtic li xojobale. Yoꞌ bu li mucꞌta chotlebale oy meꞌqꞌuinubal, pero naca yox li xojobale. Coꞌol xchiꞌuc xojobal esmeralda-ton.
4 Ta sjoyob li mucꞌta chotlebale iquil ti oy tey veinticuatro chotlebale. Tey chotajtic veinticuatro moletic. Naca sac scꞌuꞌic. Slapoj scoronaic coꞌol xchiꞌuc oro yilel.
5 Yoꞌ bu chotol ti Rioxe xleblajet chlocꞌ chavuc. Oy cꞌusi yan xal tajmec icaꞌi noxtoc. Ta yichon ti Rioxe oy tey vucub cꞌocꞌ. Li vucub cꞌoqꞌue jaꞌ seña ti Chꞌul Espíritu ta vucub jteclume.
6 Ta yichon ti Rioxe iquil noxtoc ti oy cꞌusi teye, coꞌol xchiꞌuc mar yilel, xlebebet tajmec, coꞌol xchiꞌuc li nene.
Ta spat xocon li mucꞌta chotlebale oy tey chanvoꞌ ti ep ta pꞌej sate. Oy sat ta spat sjolic noxtoc.
7 Li june coꞌol xchiꞌuc león. Li june coꞌol xchiꞌuc becerro. Li june coꞌol xchiꞌuc sat crixchano li sate. Li june coꞌol xchiꞌuc xic, chvil xa yilel.
8 Oy vaquib xicꞌ jujun. Oy satic noxtoc ta sjunlej li spat xoconique, xchiꞌuc ta xiqꞌuic. Oy sat ta yolon li xiqꞌuique xchiꞌuc ta sba. Ta cꞌacꞌal acꞌubal jaꞌ yech chalic chac liꞌi:
Stuc noꞌox lec li Cajvaltique, mu snaꞌ saꞌel smul.
Stuc noꞌox oy syuꞌel.
Tey onox ti cꞌalal ipas li vinajel balamile,
cuxul lavie, cuxul ta sbatel osil,
xiic yoꞌ bu ti Rioxe.
9-10 Ti cꞌalal chichꞌic ta mucꞌ ti Rioxe ti cuxul oe, ti jaꞌ tspas mantal ta sbatel osile, ti cꞌalal “colaval” xutique jaꞌo tsquejan sbaic, tsnijan sbaic ta yichon Riox li veinticuatro moletique yuꞌun chichꞌic ta mucꞌ uc. Ta slocꞌ li scoronaique, tey chaqꞌuic ta yichon ti Rioxe ti cuxul ta sbatel osile. Jaꞌ yech chalic chac liꞌi:
11 Voꞌot Cajvaloticotic, voꞌot Rioxot ti quichꞌojoticotic ta muqꞌue.
Jaꞌ yech smelol ti chaquichꞌticotic ta muqꞌue,
ti chcalticotic ti atuc noꞌox oy ayuꞌele,
yuꞌun voꞌot apasoj scotol li cꞌusitic oye
yuꞌun jaꞌ acꞌan ti oyuque,
xutic ti Rioxe.