5
Jaꞌ liꞌ yaloj cꞌu xꞌelan ti balbil vune xchiꞌuc ti coꞌol xchiꞌuc chꞌiom tot chij ti Cajvaltic Jesuse
1 Ti Riox tey chotol ta mucꞌta chotlebale, iquil ti stomoj ta sbatsꞌicꞌob jlic balbil vune, tsꞌibabil xchaꞌjotol. Oy vucub spacꞌ yoꞌ mu xjilchꞌuj o slicleje.
2 Iquil noxtoc jun anjel ti oy tajmec yipe. Iꞌavan:
―¿Muchꞌu ti naca lec cꞌusi spasoje ti jaꞌ xuꞌ stotsbe spacꞌ li vune yoꞌ xjilchꞌuj oe? ―xi.
3 Pero muc muchꞌu xuꞌ sjilchꞌun li vune, mi jaꞌuc li muchꞌutic tey ta vinajele, mi jaꞌuc li muchꞌutic liꞌ ta sba balamile, mi jaꞌuc ti muchꞌutic chamemic xae. Yechꞌo ti muc muchꞌu xuꞌ sqꞌuel cꞌusi yaloj li vune.
4 Jaꞌo lic oqꞌuicon yuꞌun muc muchꞌu lec cꞌusi spasoj ti xuꞌ sjilchꞌun li vune, ti xuꞌ sqꞌuel cꞌusi yaloje.
5 Oy jun li veinticuatro moletique jaꞌ yech liyalbe chac liꞌi:
―Mu xaꞌocꞌ. Oy muchꞌu ti oy tajmec yip chac cꞌu chaꞌal li leone. Jaꞌ jun achiꞌilic ta israelal, jaꞌ smom ti Judá ti ta más voꞌnee. Jaꞌ smom ti David ti ta voꞌnee. Jaꞌ icuch yuꞌun scotol, yechꞌo ti jaꞌ xuꞌ stotsbe svucubal spaqꞌue, jaꞌ xuꞌ sjilchꞌun li vune ―xiyut.
6 Oy tey cotol iquil jcot chꞌiom tot chij ta oꞌlol yoꞌ bu ti Rioxe, yoꞌ bu li chanvoꞌe, yoꞌ bu li veinticuatro moletique. Li chꞌiom tot chije tey seña ta spat xocon ti imilee pero ichaꞌcuxi. Jaꞌ seña ti jaꞌ ti Cajvaltic Jesuse. Oy vucub xulub, oy vucpꞌej sat, jaꞌ seña ti Chꞌul Espíritue ti itaque tal ta sjunlej balamile.
7 Li chꞌiom tot chije jaꞌ ba stsac li vune ti tey stomoj ta sbatsꞌicꞌob ti Rioxe.
8 Ti cꞌalal istsaque, li chanvoꞌe xchiꞌuc li veinticuatro moletique isquejan sbaic ta yoc li chꞌiom tot chije, jaꞌo isnijan sbaic noxtoc. Li veinticuatro moletique oy yarpaic xchiꞌuc jujun spꞌisic, naca oro yilel. Li spꞌisique noj ta becꞌtal pom. Li becꞌtal pome jaꞌ seña ti ta scꞌoponic Riox li muchꞌutic xchꞌamaltac Riox liꞌ ta sba balamile.
9 Isqꞌuevujintaic jcoj achꞌ qꞌuevuj. Jaꞌ yech chal chac liꞌi:
Jaꞌ yech smelol ti voꞌot chavichꞌ li vune,
ti chatotsbe li spaqꞌue,
yuꞌun voꞌot avacꞌ aba ta milel.
Ta achꞌichꞌel amanoticotic, voꞌoticotic ti chitunoticotic xa yuꞌun ti Rioxe,
jcotolticotic ti jaylajuntos jtsꞌunbalticotic ta sba balamile,
ti jaylajuntos jcꞌopticotique,
ti butic nacional nacaloticotique.
10 Voꞌot ta amantal ti chajchiꞌinticotic ta pasmantale,
ti chitunoticotic yuꞌun Riox chac cꞌu chaꞌal ti paleetique.
Jaꞌ tey ta jpastic mantal ta balamil,
xi li sqꞌuevujique.
11 Iquil, icaꞌi ti ep chcꞌopoj anjeletic ta sjoyob yoꞌ bu ti Rioxe, yoꞌ bu li chanvoꞌe, yoꞌ bu li veinticuatro moletique. Li anjeletique ep tajmec, mu jnaꞌtic jayib millón.
12 Iꞌavan scotolic:
Ti iyacꞌ sba ta milel li chꞌiom tot chije,
jaꞌ yech smelol ti chichꞌ tsots yabtele.
Stuc noꞌox tspas mantal.
Jaꞌ yuꞌun scotol li cꞌusitic oye.
Pꞌij tajmec, stuc noꞌox oy syuꞌel.
Ichꞌbil ta mucꞌ.
Stuc noꞌox “colaval”, xꞌutat, xiic.
13 Icaꞌi noxtoc ti icꞌopoj scotol li muchꞌutic tey ta vinajele xchiꞌuc li muchꞌutic liꞌ ta sba balamile, xchiꞌuc ti muchꞌutic mucajtic ta balamile xchiꞌuc ti muchꞌutic ichamic ta mare. Iyalic scotolic:
Oy slequilal li Rioxe ti tey chotol ta mucꞌta chotlebale, xchiꞌuc li chꞌiom tot chije.
Ch-ichꞌe ta mucꞌ ta sbatel osil.
Stuc ta spas mantal ta sbatel osil, xiic.
14 ―Toj lec ti jaꞌ yech chcꞌote ―xiic li chanvoꞌe.
Li veinticuatro moletique isquejan sbaic, isnijan sbaic ta yichon ti Rioxe ti cuxul ta sbatel osile, iyichꞌic ta mucꞌ.