29
1 Töhmətxo nu běği inadkərluğ balo
Bürdən əfçinebakon iz çaral tene bə̌ğə̌yeğon.
2 Düzgün amdarxoy ooren azuk'a mǔqedon,
Pis amdarxoy kalaluğbsunen isə azuk'a ǒnenedon.
3 Müdrikluğa qə̌věğalt'in iz bava mǔqedon,
Ama tarak'ala çuğo gərbakalt'ay kiyexun iz bakal-nu bakalo c'eneğon.
4 Düzgünluğen kalaluğbala padçağen iz ölkinə möhk'əmebon,
Rüşvət ext'alt'in isə şot'o śarek'on.
5 İz ı̌šat'aynak' əfçidən muč'a muz śik'alo,
Şot'ay turin oq'axun kašk'alone.
6 Pis amdari günaxen içu təlinəne badon,
Düzgün amdar isə mǔqbaki, mə̌ğěk'on.
7 Düzgün amdaren kəsibxoy haq'q'a tanedon,
Pis amdaren isə mot'o tene ak'on.
8 Ç̌oboç̌ut'oğon şəhərə gərgürt'unbon,
Müdrik amdarxon isə əcuğo bask'est'undon.
9 Müdrik amdar q'ammaza gərbaki şot'oxun haq'q' hesab taşayin,
Axšumi q'a lağlağin gane bakon, serluğal tene ak'on.
10 Amdar besp'alxon düzgün amdara nifrətt'unbon,
Düzgün amdari elmoğo haq'sunt'un çureğon.
11 Q'ammaz hirsləyinşakat'an posp'i içuxun c'eneğon,
Müdrik amdar isə səbürlüne bakon.
12 Kalat'in əfçi əyitə ǔmǔxlaxayin,
Bütüm iz sarayi amdarxoval şərət'un tarak'on.
13 Kəsib amdar q'a zalım amdar sa şeyast'at'un suna oşq'ar:
P'rannayal piyel işiğ tadiyo Q'ončuxe.
14 Padçağen kəsibxo düzgün divanbsunen
İz taxt'a həmişəluğ möhk'əmebon.
15 T'ap'en q'a tərbiyinen müdrikluğe eçon,
Kalanut əyelen isə iz nana biyaburebon.
16 Pis amdarxoy zor gele bakat'an cinayət avuze bakon,
Ama düzgünt'oğon şot'oğoy bist'una ak'alt'un.
17 Ğara tərbiyə tada ki, vi bulal dincq'an baki,
Şot'inal va mǔqq'andi.
18 Buxačuğoxun qayeśi əyit nu bakat'an, azuk' içuxun c'eneğon.
Buxačuğoy k'anuna əməl balo isə he bəxt'əvəre!
19 K'ula saycə əyiten tərbiyə tades tene bakon,
Şot'aynak' ki, q'amişal bakayin əyitə tene běğon.
20 Fikirbinut' əyitk'alt'u ak'enu?
Şot'oxunsa q'ammaza gele umudo.
21 Ərköyün kalabakala k'ul
Axırda iz q'ončuğoynak' dərde bakon.
22 Əcuğlu amdaren davane galdon,
Usum posk'alt'inal iz günaxxone avuzbon.
23 Amdari içu ala efsunen axırda içu sanekon,
Fağır amdaren isə hörməte q'azayinşon.
24 Oğrina gərbakalo iç iz düşməne,
Elasp'iyal bakayin, divanbala gala düzə tene nex.
25 Amdaraxun q'ı̌bsunen təlinəne badon,
Ama Q'ončuğo güvəyinşakalt'aynak' q'ı̌ butene.
26 Gelet'ine kalaluğbalxoxun içeynak' haq'q' yaq'běğsa,
Ama mo saycə Q'ončuğoxune.
27 Düzgün amdarxon haq'lu nu bakalt'oğoxun,
Pis amdarxon isə düzgünt'oğoxunt'un irit'e.