30
Aguri müdrik əyitmux
1 Yak'e ğare Aguri exlətxo, şot'ay əyitmux.
Me amdaren Yet'uela, Yet'uela saal Uk'ala metəre pi:
2 Düzəl, zu bitot'uxun haq'ılsuzzu,
Amdari q'amişaksun zast'a butene.
3 Müdrikluğa tez zombake,
Nəəl Ǐvel Bakalt'ay barada sa avabaksun tezax bu.
4 Şuva göynul laśi śire?
Şina muşa iz kiyel top'p'e?
Şina xena iz paltari boş bəc'ürp'e?
Oç̌ali ç̌o çark'amin hər ganu şina yaratmişe?
Şot'ay s'i hik'ə? İz ğare s'i hik'ə?
Avanu? Avanusa, upa!
5 Buxačuğoy əyitəst'a sərf butene, şo təmize,
Şot'ay t'ǒğǒl eğalt'oğoynak' bač'an Şone.
6 Şot'ay pi əyitə hik'k'al avuzmaba,
Tenesa, va töhmətebon, vi əfçinə ç̌oyele c'evek'on.
7 Ay Buxačux, Vaxun p'ə̌ şeyez çuresa,
Heq'ədər ki bezi ömür bakale, zaxun şot'oğo kammaba:
8 Barta ams'i, əfçi əyitmux zaxun ə̌xilq'an baki.
Saal za nə kəsib, nəəl varlu ma ba,
Saycə bezi ğiluğ šuma tada.
9 Şot'aynak' ki, varlu bakayiz, "Q'ončux şuva?" pi Va bosson,
Kəsib bakayiz isə, oğriluğbi bezi Buxačuğoy s'iya ləkələyinşezbon.
10 Nökəri barada iz ağa pis əyit ma upa,
Tenesa, şot'ay q'arğiş vi loxole baron,
Ziyanal hunen zap'k'on.
11 Amdaro ki, iz baval, nanal q'arğişebsa.
12 Amdaro ki, içu təmize hesabbsa,
Ama iz murdarluğaxun tene təmizbake.
13 Amdaro ki, t'iyə̌mint'oğoy loxol həmişə alaxun oq'ane běğsa,
Gelene göynuxun taysa.
14 Amdaro ki, iz uluxxo q'ılınc k'inək' ğayine,
Çənəl q'əssəbi meyurxo k'inək'e.
Şot'in oç̌ali ç̌oyexun kəsibxo q'uc'bsun,
Amdarxoy aranexun fağırxo əfçibsune çuresa.
15 Zəlin p'ə̌ xuyəro,
"Tada! Tada!" pi harayt'unne.
Xib şeyo ki, sal sa vədə boteneşt'a,
Lap bip' şeyo, manu ki, "Bəse!" tene uk'on:
16 Gərəmzəluğ, q'ısır tapan,
Xenaxun nu boşala oç̌al,
"Bəse" nu uk'ala arux.
17 Bavay loxol lağen,
Nanay loxolal alaxun oq'a běğala pulmoğo
Dərəne bakala ğə̌ynoğone deşibon,
Q'irğin baloğone şot'oğo t'uk't'i ukon.
18 Xib şeyo ki, bez haq'ıle p'aq'est'es tez baksa.
Lap bip' şeyo ki, q'amiştez:
19 Q'irğin göynul,
Dizik'i q'ayin loxol,
Gəmin dənizi bı̌yex baksuna,
Saal işq'ari cəyil xuyəri t'ǒğǒl taysuna.
20 Əxlagsuz çuğoy yaq' metəre:
Kəyi, ǰomo təmizebon,
"K'ə pis əşez biq'e ki?" unek'on.
21 Oç̌al xib şeyaxune ǰık'esa,
Lap bip' şeyo ki, şot'o tene portbsa:
22 Nökəri padçağ baksuna,
Q'ammazi boşşamin šum uksuna,
23 Nifrətə layiğ çuğoy işq'ara taysuna,
Saal çuux nökəri iz xanımi ganu c'ovaksuna.
24 Oç̌ali ç̌oyel bip' elmuxlono ki,
Mis'ik'al bakayt'un, içoğost'a müdrikluğ gelene:
25 Xuriturxo, manu ki zorsuz sa azuk'e,
Ama içoğoy ı̌ǰenin ukuna yəynuxunt'un girbsa;
26 Buruğoy mělurxoval zorba azuk' tene,
Ama içoğoy k'ojurxo q'ayin boşt'un biq'sa;
27 Çərt'k'ənxoyal padçağ teno,
Ama tağat'an dəst'inent'un taysa;
28 Saal dereval, manu ki kiin biq'es bakala sa heyvane,
Ama şo padçaği sarayinal baneksa.
29 Xib heyvano ki, içoğoy lə̌ngbsunal gözəle,
Lap bip'ono, manu ki içoğoy taysunaxunt'un c'ək'esa:
30 Heyvanxoy ən zorba bakala,
Şuk'k'alaxun nu q'ı̌bala şir,
31 Śilluğ dadal, ərkəy keçi,
Saal iz q'oşuni běš tağala padçağ.
32 Əgər q'ammaz baksunen va ala hesabbenusa,
Vi fikirest'a pis niyət biq'est'enusa,
Vi muza girba.
33 Şot'aynak' ki, muč'anaq'a buyk'at'an c'əyin c'eğala k'inək',
Bǒxmǒğo duğat'an p'i c'eğala k'inək'
Əcuğo biq'est'at'anal davane bakon.