☰ Yuⱨanna «2» 1
Yuⱨanna «2»
1
«Rosul Yuⱨanna yazƣan ikkinqi mǝktup»
1-2 Mǝnki aⱪsaⱪaldin Huda tǝripidin tallanƣan hanimƣa wǝ uning ǝziz baliliriƣa salam! Mǝn silǝrni ⱨǝⱪiⱪǝttǝ sɵyimǝn wǝ yalƣuz mǝnla ǝmǝs, yǝnǝ ⱨǝⱪiⱪǝtni tonuƣanlarning ⱨǝmmisi bizdǝ yaxawatⱪan wǝ xundaⱪla ǝbǝdgiqǝ bizgǝ yar bolidiƣan ⱨǝⱪiⱪǝtni dǝp silǝrni sɵyidu.□
 3 Huda’atidin wǝ Atining Oƣli Rǝb Əysa Mǝsiⱨdin xapaǝt, rǝⱨim-xǝpⱪǝt wǝ hatirjǝmlik silǝrgǝ ⱨǝⱪiⱪǝt wǝ meⱨir-muⱨǝbbǝt iqidǝ bolƣay!□
4 Baliliringning arisida biz Atidin ǝmr tapxuruwalƣandǝk ⱨǝⱪiⱪǝttǝ mangƣanlarni kɵrginim üqün intayin hursǝn boldum.
 
Ⱨǝⱪiⱪǝttǝ qing turux, sahtiliⱪtin ⱨezi bolux
5 Əmdi, ⱨɵrmǝtlik hanim, mǝn sǝndin bir-birimizgǝ meⱨir-muⱨǝbbǝt kɵrsitǝyli, dǝp ɵtünimǝn. Mening sanga yezip ɵtünginim yengi bir ǝmr ǝmǝs, bǝlki dǝslǝptin tartip bizdǝ bar ǝmrdur■ 6 (meⱨir-muⱨǝbbǝt xuki, uning ǝmrlirigǝ ǝmǝl ⱪilip mengixtur). Mana bu ǝmr silǝr burundin tartip anglap keliwatⱪandǝk, uningda mengixinglar üqün silǝrgǝ tapilanƣandur.□  ■ 7 Qünki nurƣun aldamqilar dunyaning jay-jaylirida qiⱪti. Ular Əysaning dunyaƣa insaniy tǝndǝ kǝlgǝn Mǝsiⱨ ikǝnlikini etirap ⱪilmaydu. Bundaⱪlar dǝl aldamqi wǝ dǝjjaldur.□  ■ 8 Biz wǝ ɵzünglar singdürgǝn ǝjirni yoⱪitip ⱪoymay, bǝlki toluⱪ in’amƣa igǝ boluxunglar üqün, ɵzünglarƣa agaⱨ bolunglar.□ 9 Kimki Mǝsiⱨning tǝlimidin ⱨalⱪip qiⱪip, uningda qing turmisa, Huda uningƣa igǝ bolmaydu. Lekin Uning tǝlimidǝ qing turƣuqi bolsa, Ata ⱨǝm Oƣul uningƣa igǝ bolidu. □ 10 Əgǝr birsi Uning tǝlimini elip kǝlmǝy silǝrning yeninglarƣa kǝlsǝ, uni ɵyünglarƣa baxlimanglar ⱨǝm uningƣa salammu bǝrmǝnglar. □  ■ 11 Qünki undaⱪ adǝmgǝ salam bǝrgǝn kixi uning rǝzil ǝmǝllirigǝ xerik bolƣuqidur.□
12 Silǝrgǝ pütidiƣan yǝnǝ kɵp sɵzlirim bar idi; lekin ⱪǝƣǝz bilǝn siyaⱨni ixlǝtkǝndin kɵrǝ, huxalliⱪimizning tolup texixi üqün yeninglarƣa berip didar kɵrüxüp sɵzlixixni arzu ⱪilimǝn. 13 Huda tǝripidin tallanƣan ⱨǝdǝngning baliliridin sanga salam!□
□ 1:1-2 «Mǝnki aⱪsaⱪaldin (Huda tǝripidin) tallanƣan hanimƣa wǝ uning ǝziz baliliriƣa salam!» — «aⱪsaⱪal» muxu yǝrdǝ «jamaǝtning aⱪsaⱪili» yaki pǝⱪǝt «mǝn ⱪeridin...» degǝn mǝnidila ixlitilidu. «Huda tǝripidin tallanƣan hanim» — «hanim» ⱨǝⱪiⱪiy bir ayal hanimni kɵrsitixi mumkin, bolmisa mǝlum bir jamaǝtni kɵrsitiximu mumkin. «Kirix süz»imizdǝ eytⱪinimizdǝk biz uni ⱨǝⱪiⱪiy mɵtiwǝr etiⱪadqi hanimni kɵrsitidu, dǝp ⱪaraymiz. «Əziz baliliri» degǝn (1) jisamaniy baliliri; (2) «roⱨiy baliliri»; (3) ⱨǝm jismaniy ⱨǝm roⱨiy balilirini kɵrsitixi mumkin. Biz 3-pikirgǝ mayilmiz («roⱨiy baliliri» bolsa bu hanimning guwaⱨliⱪi wǝ wasitisi bilǝn Hudaning yoliƣa kirgǝnlǝrni kɵrsitidu. «Kirix sɵz»imizni, 9-ayǝtni, «3Yuⱨ. » 4-ayǝtnimu kɵrüng). «Mǝnki aⱪsaⱪaldin... salam!» — barliⱪ hǝtlirigǝ ohxax, rosul Yuⱨanna ɵzining kim ikǝnlikini biwasitǝ kɵrsǝtmǝydu. □ 1:3 «rǝⱨim-xǝpⱪǝt wǝ hatirjǝmlik silǝrgǝ ⱨǝⱪiⱪǝt wǝ meⱨir-muⱨǝbbǝt iqidǝ bolƣay!» — bǝzi kona kɵqürmilǝrdǝ «rǝⱨim-xǝpⱪǝt wǝ hatirjǝmlik bizlǝrgǝ ⱨǝⱪiⱪǝt wǝ meⱨir-muⱨǝbbǝt iqidǝ bolƣay!» dǝp pütülgǝn. ■ 1:5 Yⱨ. 13:34; 15:12; Əf. 5:2; 1Tes. 4:9; 1Pet. 4:8; 1Yuⱨa. 2:7; 3:23; 4:21. □ 1:6 «Mana bu ǝmr silǝr burundin tartip anglap keliwatⱪandǝk, uningda mengixinglar üqün silǝrgǝ tapilanƣandur» — kɵzdǝ tutulƣan ǝmr qoⱪum aldinⱪi 5-ayǝttǝ tilƣa elinƣan «bir-birimizgǝ meⱨir-muⱨǝbbǝt kɵrsitǝyli». ■ 1:6 Yⱨ. 15:10. □ 1:7 «Qünki nurƣun aldamqilar dunyaning jay-jaylirida qiⱪti» — nemixⱪa «qünki» dǝydu? Bizningqǝ 5-7-ayǝt bilǝn baƣliⱪtur. Aldamqilar, sahta tǝlim bǝrgüqilǝr wǝ sahta pǝyƣǝmbǝrlǝr tǝripidin aldinip ⱪelixining aldini elixtiki birdinbir yol 5-7-ayǝttǝ tilƣa elinƣandǝk Hudaning ⱨǝmraⱨliⱪida meⱨir-muⱨǝbbǝt iqidǝ yaxaxtur. «Ular Əysaning dunyaƣa insaniy tǝndǝ kǝlgǝn Mǝsiⱨ ikǝnlikini etirap ⱪilmaydu» — «insaniy tǝndǝ» (yaki «insan tenidǝ») grek tilida «ǝttǝ» bilǝn bildürilidu. Baxⱪa birhil tǝrjimisi: — «Ular Əysa Mǝsiⱨning dunyaƣa insan tenidǝ kǝlgǝnlikini etirap ⱪilmaydu». ■ 1:7 Mat. 24:5,24; 2Pet. 2:1; 1Yuⱨa. 4:1. □ 1:8 «Biz wǝ ɵzünglar singdürgǝn ǝjirni yoⱪitip ⱪoymay, bǝlki toluⱪ in’amƣa igǝ boluxunglar üqün, ɵzünglarƣa agaⱨ bolunglar» — «biz wǝ ɵzünglar singdürgǝn ǝjir» bǝlkim Yuⱨanna, xu hanim wǝ uning baliliri bilǝn billǝ Hudaning yolida ixlǝp, hux hǝwǝr yǝtküzüp, baxⱪilarni Hudaning yoliƣa baxlax ǝjirini kɵrsitidu. Xu sahta tǝlim bǝrgüqilǝr ularning Huda üqün qiⱪarƣan mewisini yoⱪatmaⱪqi, ǝlwǝttǝ. □ 1:9 «Kimki Mǝsiⱨning tǝlimidin ⱨalⱪip qiⱪip, uningda qing turmisa, Huda uningƣa igǝ bolmaydu» — «tǝlimdin ⱨalⱪip qiⱪip» grek tilida «ilgiri besip» degǝn bilǝn ipadilinidu. Bu bir kinayilik, ⱨǝjwiy gǝptur. Mǝsiⱨning tǝlimidin ⱨeqⱪandaⱪ sɵz-idiyilǝr «ilgiri turmaydu», ǝlwǝttǝ. Mǝsiⱨning tǝlimidin ⱨalⱪip ⱨǝrⱪandaⱪ baxⱪa sɵz-idiyilǝrgǝ ɵtüx ⱨeqⱪandaⱪ «ilgirilǝx» ǝmǝstur, ǝlwǝttǝ. «Lekin Uning tǝlimidǝ qing turƣuqi bolsa, Ata ⱨǝm Oƣul uningƣa igǝ bolidu» — «Mǝsiⱨning tǝlimi... Uning tǝlimi...» — ⱨǝm Mǝsiⱨ Ɵzi bǝrgǝn tǝlim ⱨǝm rosullar Uning toƣruluⱪ bǝrgǝn tǝlimnimu tǝng kɵrsitidu. □ 1:10 «Əgǝr birsi uning tǝlimini elip kǝlmǝy silǝrning yeninglarƣa kǝlsǝ, uni ɵyünglarƣa baxlimanglar ⱨǝm uningƣa salammu bǝrmǝnglar» — «Uning tǝlimi» grek tilida «muxu tǝlim» degǝn sɵz bilǝn ipadilinidu; u «Mǝsiⱨning tǝlimi». 9-ayǝtni kɵrüng. «uni ɵyünglarƣa baxlimanglar ⱨǝm uningƣa salammu bǝrmǝnglar» — oⱪurmǝnlǝrning esidǝ barki «salam» (ibraniy tilida «xalom», grek tilida «hair») degǝn sɵz «Sanga tinq-hatirjǝmlik tilǝymǝn» degǝn mǝnidǝ. Xunga muxundaⱪ sahta tǝlim bǝrgüqilǝrgǝ «salam» eytixⱪa bolmaydu. Yuⱨannaning bu degini ularƣa ǝdǝpsizlik ⱪilix kerǝk degǝnlik ǝmǝs, ǝlwǝttǝ, bǝlki ularƣa salam berixning orniƣa sahta tǝlimi üqün tǝnbiⱨ berixinglarƣa toƣra kelidu, degǝnliktur. ■ 1:10 Rim. 16:17; 2Tim. 3:5; Tit. 3:10. □ 1:11 «Qünki undaⱪ adǝmgǝ salam bǝrgǝn kixi uning rǝzil ǝmǝllirigǝ xerik bolƣuqidur» — «salam» toƣruluⱪ yuⱪiriⱪi izaⱨatni kɵrüng. □ 1:13 «Huda tǝripidin tallanƣan ⱨǝdǝngning baliliridin sanga salam!» — «ⱨǝdǝngning baliliri» rosul Yuⱨanna turƣan jaydiki jamaǝttiki etiⱪadqilarni kɵrsitixi mumkin.
☰