EUANGELIA
IOANE DETARER.
1
1 Abele Logo degraret, Ade dog abele Logo, a Ade Logo,
2 E ko Ade dog degraret.
3 E ge gaire lu detagem eseamulu; a nole nerute lu, E nole atagem kak.
4 Eded abi dog; a eded gaire le daratkeda.
5 Abele be de daratkeda muige kupkupi ge; a kupkup nole arpeir kak.
6 Ege nerute le tabaruk, Ade de temariklu, nei atker Ioane.
7 E dali tabaruk ageakarem, abele lugem ko datki ageakarem, epe gaire le uridili odaratare abielam.
8 E dali nole abele datki, E tabaruk ko ageakarem datki penoka ekas.
9 Abele datki kar, ko daratkeare gaire le uridili, sepem tabarkare.
10 E geseb ge, a geseb abi atagemlam, a geseb nole abi ardar kak.
11 E abara boai tabaruk, a abara boai nole abi agaret kak.
12 Ui uridili abi egardare, a odaratarare abi nei de, E uiabim adigir nakuarare ko Ade ra omasker:
13 Uiaba nole mamlam aosos, a nole gem ra lag, a nole le ra lag, epe Adelam.
14 Logo depeger le gem ise, a E meribi dog emrilu, (a keriba abara zorom dasmerare, zorom mokakalam Aba ra Uerem netat,) mitkar omare, a ageakar.
15 Ioane abi ageakarem, a ereretikri, kega, Idali kaka detautili, kega, Nerute le kari sorge ikas au kale kari tumge; abelegelam E kekiam, ka keubu.
16 Meriba uridili nagri no omare tumem no omare abi mitkarlam.
17 Abele gelar Mose de dekuarare, abele omare a ageakar tonar, Iesu Kerisolam.
18 Nole le Ade asmer kak; epe abara Uerem tepteb taba Aba ra marmot, E etomeret.
19 Ge Ioane de ageakarem peik, uiabi Iudaia giz gaire zogo le a gaire Leui namarida Ierusalemlam, ko abi itmerare, kega, Ma nete?
20 E natomertare, a nole agem kak; a mamoro natomertare, kega, Kaka nole Keriso.
21 Uiaba abi itmerare, kega, Ma nete? Ma Elia ao? E etkalu, kega, Kaka nolea. Ma perofeta ao? E etkalu, Nolea.
22 Uiaba abi detagerare, kega, Ma nete? Ma natkar keribi uiabim tedautare keribi pe tedemarida. Nako mara mer marielam?
23 E detaut, kega, Kaka kodo ereretikrili soge purge, kega, Barditugili Iehoua ra gab, mokakalam Isaia perofeta detauter.
24 Uader Faresaio taramarkare.
25 Uiaba abi itmerare, a abi detagerare, kega, Nalugem ma bapataiso, ese ma nole Keriso, a nole Elia, a nole nerute perofeta?
26 Ioane uiabim etkalu, kega, Kaka bapataiso ni de; nerute uabi eipu ekuei uaba asmer kak,
27 E dali kari sorge ikas au kale kari tumem, kaka nole abkoreb ko detue abara teter gab mukub.
28 Abele gaire lu Bethabara ge ikerare, Ioridano ge sager pek, ge abele uteb ge Ioane de bapataiso.
29 Iuoakaer, Ioane de Iesu dasmer abim tabakeam, a E detager, kega, A ma dasmer Ade ra Arenio, ko adem dikri gaire geseb uit!
30 E dali kari atautelam, kega, Nerute le kari sorge ikas au kale kari tumge; abelelam E kekiam, ka keubu.
31 Kaka nole abi ardar kak; debele abi etomer Isaraela ibim, abelelam kaka tabaruk ko bapataiso ni de.
32 Ioane de ageakarem, a detager, kega, Kaka Lamar Zogo dasmer kotorlam tepelu dibadiba ise, a abi kerem ge egimulu.
33 Kaka nole abi ardar kak: epe E dali kari taramarida ko bapataiso ni de, E kari natager, kega, Abele le ma dasmer Lamar Zogo ueeperoa abi kerem ge ueegimurua, E dali bapataiso Lamar Zogo de.
34 Kaka dasmer, a kaka ageakarem, kega, Ade ra Uerem pedali.
35 Iako iuaokaer, Ioane ekueilu, a neis abara kaimeg giz;
36 E Iesu dasmer, ekasereder, E daratager, kega, Ua dasmeram Ade ra Arenio!
37 Abele neis kaimeg abara mer aserei, ui darali Iesu irmilei.
38 Iesu egreemalu, a darasmer ui darali abi irmili, a ui darali detagerei, kega, Nalu ua deraimerei? Ui natkalei abim, kega, Rabi (tonar, Ereuer le), ma nade emri?
39 E ui darali detagerei, kega, Ua tabarkam, a dasmeram. Ui darali bakeamulei a dasmerei abara uteb, a abi kemem emrilei abele gerger ge: abelelam maike kige.
40 Nerute le uiabielam Ioane aserei, a abi irmilei, pe Anederea, Simona Peteru ra keimer.
41 E kekiam erdalu abara keimer Simona, a abi detager, kega, Ki Mesaia erdali, (tonar abele nei, Keriso.)
42 E Iesuim egaredelu. Iesu abi dasmer, a detager, kega, Ma Simona Iona ra uerem; mari nei natkeri Kefa, (tonar abele nei, Peteru.)
43 Iuaokaer, Iesu laglag Galalaiem bakeam, E Filipo erdalu, a abi detager, Kari narmili.
44 Filipo Bethesaidalam, uteb Anederea a Peteru.
45 Filipo de Nathaniela erdalu, a abi detager, kega, Keriba abi erdali Mose de abielam gelar ge, a gaire perofeta detar, Iesu Nazaretalam, Iosefa ra uerem.
46 Nathaniela de abi detager, kega, Nako, umelo nerute debe lu ua tabakeamur Nazaretalam? Filipo abi detager, Ma tabakeam dasmer.
47 Iesu Nathaniela dasmer abim tabakeam, a abi detager, kega, Dasmer, Isaraela kar, nole bes kak abi dog!
48 Nathaniela abi detager, kega, Nade ma kari nasmer? Iesu etkalu, a abi detager, kega, Kaka mari nasmeli suke mudge, a Filipo nole mari abger kak.
49 Nathaniela abim etkalu, kega, Rabi, ma Ade ra Uerem, a Isaraela ra Opole.
50 Iesu etkalu, a abi detager, kega Ma oituli abelelam kaka mari natageri, kega, Kaka mari nasmili suke mudge? mena ma keubu dasmer gaire au lu tumem abele.
51 Iesu abi detager, kega, Ageakar, ageakar kaka uabi detagereda, kega, Uarem uaba ko dasmerare kotor uanakesmur, a gaire Ade ra angela uatabatuer iako uabog tumem Le la Uerem.