2
1 Abele gerger thri, nerute ispilu Kana Galilaiem; a Iesu ra apu pedali:
2 Uiaba Iesu a abara kaimeg giz taraisare abele aspirem.
3 Uaina eseamulu, Iesu ra apu abi detager, kega, Uiaba nole uaina kak.
4 Iesu abi detager, kega, Kosker, nako ma karim? kara kerker nole uatabaruk.
5 Abara apu, uiabim gaire memeg le, daratagerare, kega, Abele mer E uabi detagereda, ikerare.
6 Peike sikis gaire baker tarpor, namer ko dirup irmili Iudaia le la tonar, tu me thri bathi absaimarsaimar.
7 Iesu uiabi detagereda, kega, Tedarakeusarare abele gaire tarpor niu. Uiaba tedarakeusarare mitkarem uadarabuerare.
8 E uiabi detagereda, kega, Ge tigrare, a ekadarare abim uetpur ra opole. Ege uiaba ekadarare.
9 Emetu uetpur ra opole tepdeskerare abele ni, depegemelu uaina, a nole umer kak nagelam, (gaire memeg le umele uiabi atatkolam,) uetpur ra opole le ispilu ereretikri,
10 A abi detager, Tonar gaire le uridili ko kekiam debe uaina dersemrare; a emetu au kase ereare, ege kebi debe uaina nakuarare: ma mena debe uaina edagili, a peirdi.
11 Abele degraretelu gaire Iesu ra adigir, E ikerare abele Kana ge Galilaia, a abi zorom etomelu; abara kaimeg giz abi odaratarare.
12 Abele baruk E Kaperenaumem bakeamulu, Iesu, a abara keimer giz, a abara kaimeg giz: uiaba nole dordor gerger ab ged ge bamer.
13 Iudaia ra paseka maike, a Iesu bakeamulu Ierusalamem.
14 E nardarare gaire le zogo meta ge, uiaba kau, a mamoe, a dibadiba eraplare, a gaire le mani eraplare emereder.
15 E dordor kebi lager iskapsir, a uiabi adem mamuare zogo metalam, mamoe kem, a kau kem; a gaire le ra mani darapaitare, a gaire uiaba laulau dararaskilare.
16 A gaire le dibadiba eraplare, E daratagerare, kega, Taisare abele gaire lu; nole ikerare kara Aba ra meta lu garap meta.
17 Abara kaimeg giz dikiaporare abele mer emeret ge detarer, kega, Au laglag abele mara meta kari irmida.
18 Gaire Iudaia le natkartare, a abi detagerare, kega, Nalu atamelam ma keribi detomertare mama ikeli abele gaire lu?
19 Iesu uiabim etkalu, a detaut, kega, Eogerdi abele meta, kaka iako ikeli thri gerger.
20 Gaire Iudaia le detagereda, kega, Fote sikis gaire urut abele meta ikeli, nako ma ko ikeli thri gerger ge?
21 Ege Iesu de detaut taba gem ra meta.
22 E emetu eded akaida eudelam, abara kaimeg giz dikiaporare abele mer E uiabi daratagerare: uiaba odaratarare abele Zogo mer detarer, gako nerute mer Iesu de detauter.
23 E Ierusalema ge abele uetpur ge paseka, abele gerger ge, gaire le abara nei odaratarare, abelelam uiaba dasmerare gaire abara atamelam E ikeli.
24 Iesu nole tababu bamerik uiabim, abelelam E umele gaire le uridili,
25 A abelelam nole abi abkoreb nerute le ko etomereti nerute le la tonar; abelelam E umele abele gaire lu muige le la nerkep ge.