EUANGELIA
MAREKO DETARER.
1
1 Abele ditimedilu Iesu Keriso ra debe merkem, Ade ra Uerem.
2 Mokakalam gaire perofeta detali, kega, Kaka emarida karbara merkem mara op, ko paret mara gab;
3 Le kodo ereretikri soge purge, kega, Paret Iehoua ra gab, barditug abara gab giz.
4 Ioane ko bapataiso abele soge purge, a marau bapataiso ra obazgeda ko detue adud giz.
5 Iako abim bakeuare le Iudaia uridili, a uiaba Ierusalemalam, E uiabi bapataiso uridili, abele Ioridano dodo, uiaba detaut uiaba adud giz.
6 Kamela mus Ioane ra am uali, abara uak kau ra paur; E pem ereg a isas ra sumes are:
7 E marau, kega, Nerute kara sorge ekas adigir kari tumge, kaka nole abkoreb eparisili a detue abara teter gab mukub.
8 Kaka uabi bapataiso nilam; E dali uabi bapataiso Lamar Zogolam.
9 Abele kerker ge, Iesu ekasereder Nazaretalam Galilaiage, Iesu Ioane de bapataiso abele Ioridano ge.
10 E nilam ekueilu, E egremalu kotor nakesmulu, a Lamar Zogo epereda abi tumge, mokakalam dibadib:
11 Iako kodo mer uataba kotorlam, kega, Mama kara Uerem nasge, kaka mari sererege.
12 Dudumge Lamar Zogo abi emarida soge purem.
13 Foate gaire gerger E soge purge emeri, Satana de abi mirem; abi dog gaire ebur marmar; angela giz abara memeg.
14 Emetu Ioane didbari, Iesu bakeamulu Galilaiaem, ko marau Ade ra debe merkem, kega,
15 Kerker ge tabarki, a Ade ra baselaia maike; uaba obazgeda, a debe merkem oituli.
16 E ekas keper dege Galilaia, E dasmer Simona a Anederea tabara keimer net gurem dikri: abelelam ui darali umele larem.
17 Iesu ui darali daratager, kega, Kari narmili, kaka uabi depegemelu ko le asaperem.
18 Ui darali dudum net dekaerei, a abi irmilei.
19 E ko kebikebi ekasereder, E dasmer Iakobo Zebedaio ra uerem, a Ioane abara keimer, nar ge muigi, a net euelei.
20 E sobkak ui darali ereretikrei: ui darali Zebedaio uiaba aba dekaerei nar tumge, a gaire memeg, a abi irmilei.
21 Uiaba Kapernauma tabakeuare; sabath ge E dudum sunago tabao, a ereuerem.
22 Tabara ereuerem uiaba damered: abelelam E uiabi ereuerem mokakalam le pardale, a nole mokakalam aotale giz.
23 Nerute le nagri sumes lamar muige abele sunago; E ereretikri, kega,
24 Iesu Nazaretalam, keriba nako marim? nako, mama tabarki keribi adem dipit? kaka mari opasereret, Ade ra Zogo.
25 Iesu abi daisumdalu, kega, Bamer, a teosmeda abielam.
26 Abele sumes lamar abi ezagri, a au ereretikri, epe teosmed abielam.
27 Uiaba uridili damered, a mer atager, kega, Nalu pedali? nako abele kerkar ereuerem? abelelam sumes lamar giz E sirdam adigir, uiaba abi asoli.
28 Epe sobkak E ekoseli gaire ged ge Galilaia deraueili.
29 Uiaba teosmeda sunagolam, sobkak uiaba tabarot kemem Ioane a Iakobo metaem, abele Simona a Anederea ra meta.
30 Simona kosker ra apu uteid, gem urueri: uiaba sobkak abi etomelu.
31 E keitekas abi tag erpeilu; sobkak urueri dekaida, E uiabi memeg le.
32 Kikem, lem baraigida, uiaba abim taraisare gaire, gim le, a gaire le sumes lamar nagri.
33 Gaire ged uridili netate gedim op meta.
34 E idigiri gaire tonar gim le, a imuda sumes lamar giz; E nole gaire demoni emarida ko mer egali, abelelam uiaba abi opasereret.
35 Nede be iuaokaer, E ekueilu a teosmeda, a nogutebem bakeamud, abele esorerapare.
36 Simona, a abara boai, abi irmilare.
37 Uiaba abi erdali, uiaba abi detager, kega, Ui uridili mari naraimeli.
38 E uiabim detaut, kega, Minabakeuare gaire maiged, a kaka marau abele; abelelam kara dorge dali.
39 E marau muige gaire uiaba sunago Galilaia uridili, a demoni giz imuda.
40 Abim keitoabuki nerute lepera, a abim ermeder, abi detager, kega, Ese mama laglag, mama umele kari nadgiri.
41 E abi omare, a tag itrimuda, a abi ituti, a abi detager, kega, Kara lag; ma idigiri
42 E emetu detager abele mer, sobkak lepera dekaida abielam, E idigir.
43 E abi mer tigri, a abi emarida,
44 A abi detager, kega, mamor dasmer, atager kak nerute le; bakeamuda, mabu natomelu abi zogo tarim le, a ikuar gaire lu Mose mer tigri uiabim; atamelam mama emetu idigir.
45 E bakeamuda, a ditimeda ko daratagerare, a detager deraueili, abelelam Iesu nole umer kak paret kak ekas abele ged, E soge purge emeri; gaire le abim tabakeuare abgedlam.