28
1 Sabath eseamulu, baneigiri abele kekiam gerger sefen, Maria Magadalena pako nerute Maria ui bakeamlam abi dasmer abele ao ge.
2 Dasmer, abele aukase demali: abelelam abele Opole ra angela kotorlam tarabu, E bakeam erbariklu adem abele baker ao telam, E egimulu abi tumge.
3 Abara op mokakalam perper ise, pako abara am uali au kakakak mokakalam kiona ise:
4 Uiaba asesered le au geum a durdur barki, uiaba tarbigrare mokakalam eud le giz.
5 Abele angela uiabi detager neis kosker, kega, Uaba nole geum kak; abelelam kaka umele uaba deraimer Iesu le, emetu satauroem.
6 E nole ike, abelelam E ko eded akaid, mokakalam E detager. Ua tabakeamlam abi dasmeram abele uteb abele Opole emetu uteid.
7 Ua bakeamlam dudum etomeret abara kaimeg giz, E akaid eudelam; dasmer, E kekiam bakeamulu Galilaiaem, uaba keubu; uaba ko abi erdali abele uteb: dasmer, kaka etomeret uabim.
8 Ui bakeamlei dudum abele aolam, ui geum a au sererege; a koreder etomeret abara kaimeg giz.
9 Ui bakeamlei etomeret abara kaimeg giz, dasmer, Iesu ui obapit a kega, Kaka uabi omare. A neis kosker tabakeamlam, a itut abara teter ge, a abi esorgiru.
10 Iesu uiabi detager, Uaba nole geum kak: ua bakeamlam etomeret kara keimer giz, uiaba ko bakeuare Galilaiaem, uiaba kari erdali.
11 Ui bakeamlei, dasmer, uader asesered le bakeuare abele uteb, a natomertare gaire zogozogo le giz abele gaire lu uridili ikerare.
12 A uiaba etami okakis gaire aule, uiaba mer atager, a ko nakuarare gaire mani uiabim abele gaire ares le,
13 A uiabi kega, Uaba natomertare abara kaimeg giz ki ge tabakeuare, a abi eruam, epe uaba uteid.
14 Ese opole asoli, a keriba abi idkubi, iaueakai uaba nagri debele.
15 A uiaba egardarare abele gaire mani, a uiaba ikelare mokakalam uiaba uiabi ereuerem: abele mer esali gaire Iudaia le giz bakedilu peirdi.
16 Abara kaimeg giz bekeuare Galilaiaem, eleuen gaire le, abele paser ge Iesu uiabi mer tigri.
17 Uiabi abi erdali, a uiaba abi esorgiru: epe uader le nole oatur kak.
18 Iesu tabarki, a uiabi detager, kega, Emetu kari nakuar abele sirdam uridili, abele kotor ge pako abele geseb ge.
19 Dasmer, uaba bakeuare gaire ged narida uridili ko uiabi ereuerem, pako uiabi bapataiso Babe ra nei ge, pako abele Uerem, pako abele Lamar Zogo:
20 Uaba uiabi ereuerem, a asesered gaire lu uridili kaka uabi detager: dasmer, kaka ko uabi kemem gaire gerger uridili, bakedilu abele geseb ra mop. Amen.