18
Yohanis kim hamal hap hlaulkuke– ë yala Babel de timbwas gwen hap dena:
1 Ki zebë hwëna etan Alap mo dam taha nakore zini hla ta guk– ngatan zi mo lang nakon kim ati gweꞌan zaka. Zëno sosonna mam tanganna, hen zëno timni ngatan tanganna. Dekon okamana hëndep man tangan ngatan gwek.
2 Ol mamkam zep isrip-sri naban gu ane zaka,
“Ë yala Babel mes timbwas gwera. Zen mes timbwas gwera– men zen bolte-bolte gwe-gwekaye! Angkam kirekam-kirekam dowal-dowal karek-karek en zë lowe heꞌan– hen kirekam-kirekam mawa karek-karek naban, zini mensa hwa dasïk gwibirinke.
3 In aïrïs, sap tïngare zi ausuna mes ë yala in mo lowehen karek san ang ta gwek, in zep ho mamaksa de otdeblanda gwen makan ëmamak gwe-gwek. Zen zëre mae mo boton yang tasibin alap-alapsa de ang gwibirida gwen hap wan-wan da gwibik. Zep tïngare zi ausuna mes Alap mo nwenak ëkun gwek– san de kahalo soson we walya ban de swi ënna kiye. Okamanak de teipsïn-teipsïn zini, hen kire-kiresa de lirak ta gwibin hip de zini man ë yala iwe kire-kirena lirak da gwibik. Zep ë yala in mo sërkam de hole-hle nakon, zëno mae mo te-alana ëbeya gwe-gwek. Zep zen ë yala in mo lowehen karek san ang ta gwek.”
4 Ki zebë etan ngatan zi mo lang nakore ola salsek kim anakan gu aneka,
“Haen, ëre mo bi gwibin wenya, em dekam ëna in kon wet so gwek! Zëno mae mo karek-karekna in mana ebon mae onak hliminnink, hen kareksa ema apdekam deban mae hla kulink!
5 Sap ëna in mo karek-karekna man tangan bwang gwenkam nglïnak de hatan hap alp gweꞌan, hen Ëe ama zëno mae mo kirekam-kirekam jal-jala aïtbir-zimꞌin.
6 Men kirekam ëna iwe de zini ëre mo walasna karek da gwibik, dikire desa hen kirekam karek dabik, hwëna zëbe mae hap etan sërkam mas ulzimk. Zen hëp nabare wiklom hosa aha zi hip nol gwizimk, zep dikire zëna hen kiresa sërkam tangan notdebik.
7 Zen man menkam ëbolte-bolte gwe-gwek, zep angkam zëno mae mo enlalana dikire dowe hana gwek. Zen menkam tahalha srëmkam lowehe gwek, zep angkam zen dikire ngalap naban lowehe gwek. Zen man zënaka nenbirida gwek, ‘Ëe an tïngan teipsïn-teipsïn enna. Ëe molyë ëtahalha gwek, hen ëe molyë we sem mo kim gona tak.’
8 Zen in zep, sap zen kirekam ëbolte-bolte gwe-gwek, zen zep sa aha-ere yaklakam Abon onakore hëpna hla nul– enlala dowe hanan hap dena, usak yala ban de lowehen hap dena, hen juwen hap dena. Zen sa syauknuk ëhweistïl, sap Ëe an Bian Alap Soson Zi nikë kirekam karek tabiꞌin!”
9-10 Kim ë yala Babel hweistïꞌïnka, auhu-kamanak de teipsïn-teipsïn wenya men zen ëna iwe kire-kirena lirak da gwibik, hen zëwe de zi mo lowehen san ang ta gwek, zen langa nakon butna sewennak kara nuk. Sal-sal aïrïn hïp hom zë ëgolek de gwek. Zen zep bunnu nawabik hen anakan sei gona taꞌak, “Ali tol! Kwasang! Ëna in menkam teipsïnnï hen tatete tanganna, hwëna aha-ere jamkam mes tol hwei-swis gwenda!”
11 Auhu-kamanak de kire-kire lirak ta gwibin zini hen ë yala insa gosa dablak. Sap aha ëna kirena hom– zao de etan kire-kiresa lirak ta gwibin hip denaye.
12 Sap menkam kire-kirena insa bulkum lirak ta gwibin hip kap dahal gwezak–
emas nakore kire-kirena, perakkam dena,
kaso lïlïngtïnnï, sasyan dawemna, hen kaen ngap-ngap dawem-dawemna,
ok eis makare kal-kala, hen sam dan kïl makarena, hen ahakon sin-sin tangan wenyaka.
Tenya kore kire-kire syal gwibinni hen ki lop dahal gwezak–
sap te irase dawem nabare tenya korena, hen sap sërkam de nwe awes tenya korena.
Ahakore kire-kirena zen srin makare ngap-ngap naka,
hen tembaga nakorena,
hen besi nakorena.
Hen ahakon kaso nwe-aweskam de syal gweblan dankam dena.
13 Tembanena hen menkam zëwe lirak da gwibik–
sap minyak, tepung dawem, hen gandum dan, sap kayu manis, hen tembanesa de dërek gun hup de kire-kirena.
Anggur hona hen ki.
Irase dawem nabare kire-kirena hen ki lirak da gwibik–
sap tim hip dena, hen ang gun hup dena.
Zen hen menkam otweran zahona man zë lirak da gwibik–
sap sapi hen domba.
Zen hen kudana lup nulhal gwezak– hëndep ahakon kereta zeban.
Hen zini man hen dahyohal gwezak– te-ala hap de zë lirak tabin hip, dekam de zëbon mae tana ïltïkïnnïk ëbabu gwe-gwen hap.
Hwëna angkam banak molya kirekam lirak da gwibik, sap ë yala in mes timbwas gwera.
14 Kire-kire lirak ta gwibin hip de zini in ki zep ëna insa enlwan hap nenblak,
“Sërkam de dawem kire-kirena mensa sap zini bi gweblandan hap dëblanda gwenan, zen mes tol ebon mae onakon ëjek-jak gwenda. Ali tol! Eno mae mo te-ala mamkam de lop tan kire-kirena mes tol zalta dep ëhwei-swis gwenda. Em molye etan hla landak.”
15 Zep kire-kire lirak ta gwibin zini men zen te-alana ëbeya gwe-gwek ëna iwe de lirak ta gwibinkim, zen langa en nakon ëzauk– syauk sal-sal aïrïn hïp. Zen man anakan gosa dabik,
16 “Ali tol! Ë yala in, kwasang tol! Zëwe de zini menkam kaen dawem-dawem ensa alala da gwek– dawemkam de ngap-ngap naka, hen ok eis makare kal-kalaka, hen sam dan kïl makare naka. Zëno mae mo wër gwen hap de kire-kirena menkam dawem-dawem tanganna– sap emaskam dena, sap kaso lïlïngtïnnï hen sasyan dawem-dawem maena.
17 Hwëna aha-ere jamkam kire-kirena in mes tol ëhwei-swis gwenda.”
Bul bina, hen golësek gwe-gwen hap de wenya, hen zëwe de syal ta gwen wenya, hen kïtak men zen buluk ang ta gwek, zen hen kirekam langa en nakon ëzauk.
18 Kim syauk butna insa sewe sennak hla nuk, zen hen ë yala insa gosa dablaꞌak– mae hap, “Okamanak ahana hom– kirekam de ë yawalaye.”
19 Zen dekam zep bunnu nawabik– anakare sei go naban,
“Ali tol! Ë yala in, kwasang tol! Zëwe de zini te-alana sërkam de beya tanganna. Ëe zebë kire-kirena desan dep kap lahal gwek– lirak ta gwibin hipye. Ëe hen dekam zebë te-alana ëbeya gwek. Hwëna zen mes tol aha-ere jamkam hwei-swis gwenda.”
20 Hwëna Alap mo dam taha nakore zini in kim kirekam hlaulku, dekam zep tangan anakan isrip-sri gweka,
“Ngatan zi mo langnak de wenya, em ëisrip-sri gwen, sap Alap mes ë yala insa timbwas tanda! Alap mo ïrïk gïnnïk de bïtï gwen wenya, hen em in zen zëre mo ola ol halada gwek hen ayang ulida gwekke, em kïtak ëisrip-sri gwen! Sap ëna iwe de zini man emsa karek da gwibik, zen in zep hwëna Alap desa heip guluda.”
21 Ki zep hwëna ahanik Alap mo dam taha nakore zini soson tangan nik kaso yawala gul ineka– sërkam de dohon-hon tangaran naka. Ki zep hinak tak gul ineka. Zen man hen anakan gu aneka,
“Ë yala Babelsa an kirekam sa Alap zer anera, hëndep karekkam sa tak ta inera, hëndep sa jek-jak tala.
22 Zëwe molya etan gitar maena nyublandak,
hen sulingni molya nenblandak.
Sramin aukuna hen molya etan zëwe ësane gwek.
Sap men zen kire-kire dawemna syal nëblanda gwek molya zë etan lowehek.
Hen gandum dan maesa de ïls tï gwibin aukuna molya zë etan ësane gwek.
23 Lampu ngatanna hen molya zë etan kara dak.
We-zi daresa de oto sonnak de isrip-sri ola molya zë etan ësane gwek.
Zëwe de kire-kire lirak ta gwibin zini man tangan sap okamanak ëteipsïk gwek,
hwëna zëno mae mo meiyerak de hlaun zini hen man boton owas-owassa syal nei gwibik,
hëndep zep okamanak de zini kïtak gwi nulsukink.
24 Sap zen Alap mo olsa de ayang gun hup de zisi hen Alap mo hlïl irin wenyaka tïngare lang san dameranda gwek, zep sa Alap ëna iwe de zi hip zëno mae mo kala ngëro gulzimdi.”