19
1 Zen kim hya gwesïk, ki zebë hwëna ngatan zi mo lang nakore zi beyam-bya de ol mamkam ëtakeran ola anakan sak,
“Haleluya! Nëre mae mo Alapsa nen boltere tan,
sap ëngaya gwen hap dena hen sosonna kïtak Zëbon onak.
Zen en teipsïnnï.
2 Sap zëno zisi de klis gunnu dam-dam en tangankam.
Bëjen mae tautek gun.
Zen mes ë yala Babelsa hëp tyaka,
sap zëwe de zini tïngare zisi yang tasïn alap-alapsa dikim ang gwibirida gwen hap yasik da gwibik.
Zep zini Alap mo nwenak kahalo soson we wal mo kim ënwe-mase gwe-gwek.
Zen hen Alap hon de syal ta gwen zisi damera gwek.
Zen in zep Alap zëno mae mo kala
zëbe mae hap ngëro gulzimnira.”
3 Etan ki zep mamkam ëgu anek,
“Haleluya! Alapsa nen boltere tan,
sap syauknu men zep ëna in hwei-swis gweꞌara,
zëno butna sa hëndep denaban sewese gwer.”
4 Alap mo alpnak de 24kam de teipsïn-teipsïn wenya hen dan-nër dan-nërkam de otweran makare zini in, zen dekam zep ëïk gwe hezak– Alap hap de anakan dawemsa golblan hap, “In eiwa tangan. Haleluya!”
Yohanis kim hamal hap Alap mo Domba Tane de ïrïk gïn hïp de tembane yawalak hlauludakake:
5 Ki zep Alap mo komal tum alpna in kon ola wet sok,
“Tïngare Alapsa de betek gweblan wenya,
nen boltere tan–
tïngan men zene Alapsa blikip eisïk gweblananke,
sap mam-mam wenya hen bete-tek wenya.”
6 Dekam zebë hwëna ola sak– san de sërkam de zi tra de ëtaken gwenna. Ol aukuna in san de hi de mamkam ngëp gwenna, ahaksa san de nglï de mamkam tadre song gwenna kiye. Zen man ëtaken gweꞌak,
“Haleluya! Alapsa nen boltere tan,
sap nëno mae mo Bian Alap Soson Zini
Zën angkam kïtak nësa ïrïk gïꞌïra!
7 Nen tërya ban isrip-sri gweblan.
Nen boltere tan, sap Zen en teipsïnnï.
Sap Alap mo Domba Tane hap de
we oto gulblun yaklanak mes zaunun,
hen we golgublun zem in
mes zëwe dep zënaka weir gulsunun.
8 Alap mes we zem in hap deyol dawemna
sërkam de ngap-ngap angtan-angtan naka teisyabirki–
dekam de zënaka weir gulsun hupye.”
Gulk sun de ola awe, Domba Tane mo wenya, zen tïngare Alapsa de betek gweblan zi. Hen deyol dawem zem, zëno enlalana, dawemna mensa Alapsa de betek gweblan zini syal nei gwibirinke.
9 Ki zep Alap mo dam taha nakore zini men etan asa gubluka,
“Ansa ale gul: Zini men desa Alap dam tasibirki, zen de Domba Tane hap de we oto gulblun tembane yawalak ang tan hap, zen hëꞌho gwibin tangan naka sa hla nul.”
Dekam zep etan abe hap ola mas gulbluka,
“Ola an eiwa de tanganna, Alap zëre onakorena.”
10 Ëe ki zebë Alap mo dam taha nakore zini in mo nwenak ïk gwe hezak– dekam de desa boltere tan hap. Hwëna ki zep asa gubluka,
“Asa bahem boltere tan. Alap ensa em boltere tan. Sap ëe hen Zëbon de babu gwen zi, eban apdenak. Hen aya-wal oso-wal om men zen Yesus hup de ol dawemna nolluwe gwenan, deban mae hen apdenak. Sap tïngan men zen Yesus hup de ol dawemna nolluwe gwenan, zen kïtak Alap mo Enho naban.”
Yohanis kim hamal hap Yesus de teipsïn zi mo kim kuda tahan nakon golëeijahal zannak hlauludakake:
11 Ki zebë hwëna kara gwek– ngatan zi mo langna mes dalusunun. Zao zebë kuda ngap-ngapna hla tak. Men zen kuda tahannak nikin aneꞌanka, bosena “eiwakam hen tatetekam de Alap hap denaka golluwe gwen hap de Zi.” Zen mae hap ki kirekam bose dak: Sap zëno zisi de klis gunnu hen goleijanna dam-dam enkam– Alap mo dwam gwibin en san.
12 Zëno nwena syauk hï-hïtïnnï kiye. Hen nolak de mire sigina beyam-byana. Hen mirenak alena man. Zen zëre mo aha bose, hwëna bosena in aha zi bëjen tame gun. Zen diki Zë-en tame guꞌura.
13 Baju blal zem, kal bles-bles nabare naka ala soka. Zini in mo aha bosena “Alap mo ola bare Zini.”
14 Ngatan zi mo langnak de jana nabare wenya man ang në sebla halzak. Zen hen kuda ngap-ngapnak teinikin halzak. Zëno mae mo pakeanna hen ngap-ngap tanganna.
15 Zëno mahala nëbok ben-ben makare nik te so gweblaꞌanka. Zen dekam sa tïngare zi ausuna karek tabiri. Zen Zen sa tïngare zi aususa tatete tangankam ïrïk gïlï. Hwëna men zen Teipsïn Zini Alap mo jalak lowehe gwenan, desa sa timbwas tabiri– men kiye, anggur dansa de tanakam de zaublun dankam na tanna.
16 Zëno bajunak, ik dan jam en, a kirekam mo zë zëre mo aha bosena ale nuk, “Teipsïn Zini Bian, tïngare teipsïn zi mo Teipsïnnï.”
17 Hwëna ki zebë Alap mo dam taha nakore zini ahana hla tak– yakla nwe tahannak de zauk anennak. Ol mamkam zep kon takenka,
“Tïngare mawana em in zen gulk sun ëihe nasenꞌanke, haen! Em tagam gwezan– tembane yawala ansa Alap ebe mae hap tehazimꞌirake, zëwe de ang tan hap!
18 Tïngare mawana, haen! Teipsïn-teipsïn wenyik mo tok-tok naka eka olgwenblandak– hen jana nabare zi mo tok-tok naka, sap mam-mam wenya hen bete-tek wenya, hen sap kuda tahan nakon de ëeija gwen wenya, hëndep kuda tok-tok zeban. Haen, tïngare lang nakore zi tok-toksa eka olgwenblandak– sap zi mo tana ïltïkïnnïk de teinikirin zi mo tokna, sap zisi de bi gwibiridan zi mo tokna, sap bose nabare zi mo, sap bose srëm zi mo tok-tok naka.”
19 Ki zebë hwëna etan otweran dowal yala insa hla tak. Auhu-kamanak de teipsïn-teipsïn wenya mes desa eijannak de mas gweblan hap tagam neisïblïk– hëndep zëre mae mo jana nabare zi niban. Zen dekam zep kuda ngap-ngap tahannak de nikirin Teipsïn Zini in han nëreijak.
20 Zen zep hwëna zëre mo jana nabare zi niban otweran dowal darena insa zibalk soka. Nonol hi mwa nakore otweran dowal yala insa zibalk taka. Etan domba mo nola kore hli nabare dowala insa zibalk taka– men zen boton gwekake, “Ëe an Alap mo olsa de ayang gul gwen hap de zi.” Zen in men zen owas-owasna syal gwe-gwibirkike– otweran dowala in osan dep dikim yasik ta gwibin hip. Men zen ang në gweblak, zen men zen otweran dowala in mo bose hap de nomora timnik makan dabiridak, hen men zen otweran dowala in mo nwe-masekam de yang tasïn dowala insa boklena kom da gweblakke. Hëndep dowal darena insa ki zep ngaya naka sërkam de syauk bla hï-hïtïn sal-salak hiri nososek.
21 Kuda tahannak de nikirin Zini in dekam zep zëno nik mo jana nabare zini zëre mo nëbok ben-ben makare mahalkam tamerasïkï. Mawana dekam zep zëno mae mo tok-tokna dwenblan dazak, hëndep man tangan sërkam ëïtrï gwek.