Habakuki
Chilongole
Chitabu achi china uloli wa Habakuki. Chitabu cha Habakuki cha vilivinji na vitabu vinji vya uloli, kwa vila chahela usenga ulingulonga kuwala Isilaeli na Yuda. Ila china mbuli ya kung'ung'uta kwili na kulanda kwa Habakuki. Nguluwi kahi kangwidichila kung'ung'uta kwa heye. Wasomile wangijesa kota Habakuki nakekala mhela wuwula woyekale Yelemiya na mihela ja ulongozi wa mndewa Yosiya na mndewa Yehoyakimu. Hachiwele chitabu cha Habakuki ne chitabu choneche cha Bibiliya chilingulonga nakekala kwa mhela wachi.
Hamwande Habakuki nakamng'ung'utila Nguluwi kota nakona kilewa na kubunza hachi na kota Nguluwi hedichile kulanda kwa Habakuki. Hanji Habakuki nakazona mbuli azi zilingulawila kuli isi ya Yuda. Nguluwi nakedichila kwa kulonga kota nayali yowenula Wababuloni kwa chiwalo cha kuidumya isi ya Yuda. Hamba Habakuki nakang'ung'uta kota Nguluwi nayali yowatumiya wanhu wehile kuwagaza wanhu wawele hawawele wehile ng'hatu. Nguluwi nakedichila kwa kulonga kota Wababuloni nawo wotagusigwa na kugazigwa hamba. Kuli kuduma, Habakuki kangumlanda Nguluwi yalajile isungu. Kangumtogola Nguluwi kwa mbuli ng'hulu zoyaziditile kuli mhela ukolile.
Gali mgati
1. Sula ya 1:1-4 ina kung'ung'uta kwa mwaluko kwa Habakuki.
2. Kuli sula ya 1:5-11 twangusoma kuwala kwidichila kwa mwaluko kwa Nguluwi.
3. Sula ya 1:12-2:1 zangutulonjela kuwala kung'ung'uta kwa keli kwa Habakuki.
4. Sula ya 2:2-20 ina kwidichila kwa keli kwa Nguluwi.
5. Sula ya 3 yanguwala kulanda kwa Habakuki kwa Nguluwi.
1
1 Ulonzi wa Nguluwi woyaubochele mloli Habakuki.
Habakuki kangwaluka kung'ung'uta
2 “Gwa, Mkulu Nguluwi, mbaka hanili ndokulanda utanzi,
lekachoni hulingunyhulichiza?
Lekachoni ndangulila, ‘Kilewa,’
ila hulingulohola?
3 Lekachoni kwangundita ndigone gehile na kubunza?
Kuwifya na kilewa vyangunzunguluta,
kitwanza na magazo vyangulutilila.
4 Ahyo malajizo gahela mong'ho,
na hachi hambe ikoleche.
Wehile wanguwazunguluta watanganiche,
ahyo utaguso wangulavigwa kwa kwajilizwa.”
Kwidichila kwa Nguluwi
5 Nguluwi nakalonga,
“Uwalole wanhu wa isi zinji!
Kobubuwala na kona vinduzanduza.
Kwa vila ndodita chinhu louwa ung'hali mkomu,
hanga wahalonjelwe, hawalikunda.
6 Kwa vila ndanguwapa mong'ho Wababuloni,
wanhu wa isi wawele na nhumbula zihile na walingudita chinhu himahima.
Walingukola kuli isi yeng'ha,
leka kuhola haluga ha wanhu wanji.
7 Ndo wanhu walingudumbigwa na walingukabusa,
kwa kidaya kwawo, utaguso wa hewo wangulawa mnhumbula za hewo wawo.
8 Falasi wa hewo ndo wabewe kusinda iduma,
wang'hang'hala kusinda mibwa ja kisolo jiwele na nzala.
Falasi wa hewo wangubilima ng'hatu kulawa kutali,
wangunyonzoka himahima kota ikungule lilinguhola upelembi.
9 “Weng'ha wangugana kilewa,
vilundo vya hewo vya wamizi vyangulutilila kumwando,
kota mbeho ya kolilawilaga isanya,
kuno wangukungajiza wapogozi wa ngondo kota sangalaza.
10 Wanguwabeza wandewa,
wanguwaseka vilongozi.
Chila ngome ndo idaba kwa hewo,
nawazenga chinhu cha misanga cha kukwinila kuli lukanzi na kuuhola muji.
11 Hamba wangukola himahima kota mbeho na kuluta kumwando,
ndo wanhu wawele na gehile,
kwa vila mong'ho wa hewo ndo mlungu wa hewo.”
Habakuki kangung'ung'uta kahi
12 Gwa Mkulu Nguluwi, ndaze, hegwe hauwele wa kulawa katali?
Hegwe ndo Nguluwi wa heni, Yelile wa heni, yohambe ubagame.
Gwa Mkulu Nguluwi, nakuwahagula Wababuloni watutaguse,
hegwe italawe, nakuwakangaza leka watugaze.
13 Hegwe kwa yelile ng'hatu, haulinguukunda wihe,
mazuwa gose haulingwimilila kulola gehile.
Lekachoni lelo kwanguwona walingudita gehile na kunyamalila?
Lekachoni kwangunyamalila wehile howowadumya
wala wanhu watanganiche kusinda hewo?
14 Nakuwadita wanhu wawe kota somba mbahali,
kota vilumbigwe vilingutambala vilihela chilongozi.
15 Wababuloni wanguwalowa wanhu kwa ndowano,
wanguwakwega kwa utandawala wa hewo,
wanguwakungajiza weng'ha kuli utandawala wa hewo,
hamba wangusangalala na kutowa luchenze.
16 Lelo wangulavya nhambiko kwa chiwalo cha utandawala wa hewo,
na kufunyizila ubani,
kwa vila kwa awo wanguweza kulya chilyo cha kuhega,
na kuwa na chilyo chinji lukami.
17 Ndaze, mazuwa gose hawoleka kukwega utandawala wa hewo?
Ndaze, wolutilila kuwagwiliza wanhu
na kuwadumya wanhu wa isi ne kuwonela isungu?