3
1 Kochona gwa Ninawi, muji ulingukopola!
Nakumema uhadi hela na vinhu vinji viholigwe kuli ngondo,
hulinguleka kuhola vinhu kulawa kuli ngondo.
2 Uhulichize! Lizi lya ng'hobwa ya ngozi,
lizi lya kujenda kwa maguludumu,
lizi lya kujenda kwa falasi
na kubuma kwa mituka ja ngondo.
3 Walingukwina falasi wangubilimisa falasi baho du,
wakopoligwe ndo wenji lukami,
mitufi minji ng'hatu,
mbaka wanhu wangikwang'hala mchanya mwa mitufi.
4 “Ninawi! Hegwe ndo kota mng'hondwa.
Nakuwakwega wanhu kwa kinoliga, gwa mhinza wa uhawi,
nakuwadita wanhu wa isi zinji wawe wapogozi kwa ung'hondwa wa hegwe
na kwa uhawi wa hegwe.
5 Lelo heni Mkulu Nguluwi Mbele na Mong'ho,
ndangitwanza na hegwe,
ndolikwiniza ivalo lya hegwe mbaka kumutwi,
ndowadita wanhu wa isi wawone umwanzi wa hegwe,
chila undewa uyone soni ya hegwe.
6 Ndokutozela wavu
na kukuditila kwa kubeza,
na kuwadita wanhu wakuseche.
7 Hamba weng'ha howokona wokubilima na kulonga,
‘Ninawi nakudumigwa,
whaani yolombocheza kwa chiwalo cha hegwe?
Whaani yokuhembuliza?’ ”
8 Ndaze, hegwe Ninawi ndo kunoga kusinda Tebesi,
muji uzenjigwe hafungo ha lwanda Naili?
Tebesi nauzungulutwa na mazi,
lwanda nalwali ngawo yake,
mazi nagali lukanzi lwake.
9 Kushi na Misili nazali mong'ho wa heye ulihela mbaka,
Puti na Libiya nawali hali wala welumbile na heye.
10 Ila nakaholigwa kota mpogozi,
wanhu wa heye nawahilikwa kuli isi zinji.
Mbaka wana wa heye nawabenangwa
kuli chila nzila,
wakulu wake nawaguzigwa
wang'hangala wake weng'ha nawawohigwa kwa minyololo.
11 Ninawi, nagwe kahi kogala,
kombilima mng'honyo na kujeza kivisa.
12 Ngome za hegwe zeng'ha ndo kota migodi ja tini,
jiwele mafuza gake ga mwaluko nagapya,
mhela hojitigaswa
tini zangugwilaga kuli mlomo wa yalingulya.
13 Lole wamizi wa hegwe,
walingudumba kota wadala.
Lwizi ja isi ya hegwe ja mwanzi hali wang'honyo wa hegwe,
chiluli nachilakaza ng'hatu lwizi jake.
14 Mdehe mazi leka miwiche goya kwa chiwalo cha kuzungulutwa kwa hemwe,
mziwiche nzinzili ngome za hemwe.
Mbiganje ilongo kwa chiwalo cha kulikolela mijito,
mliwiche goya itanuli lya kusomela matufali.
15 Ila ako kahi chiluli chowalakaza hemwe,
ipanga lyowakopola hemwe,
wowadumya kota nzije vyozilingulya.
Monjezeche kota nzije,
ena, monjezeche kota ndede.
16 Walinguguza vinhu wa hegwe nawonjezeka kusinda nhondwe,
ila wanguka kota ndede vyozilinguguluka na kuileka isi ne chinhu.
17 Wakulu wa hegwe ndo kota ndede,
vilongozi wa hegwe ndo kota chilundo cha nzije,
mhela wa chipute zangikala kuli lukanzi,
ila isanya holilawa, zanguguluka,
haduhu yalinguvizela hozilutile.
18 Hegwe mndewa wa Ashulu, wadimi wa hegwe nawawasa,
vilongozi wa hegwe nawasinzila.
Wanhu wa hegwe nawasambaluka kuli vidunda,
haduhu yoneche wa kuwakungajiza.
19 Haduhu wa kuhoza kulumila kwa hegwe,
vilonda vya hegwe vya kubagama.
Weng'ha walinguhulika mbuli za hegwe wangutowa luchenze.
Kwa vila haduhu yawezile kiwika kutali na nhumbula ya hegwe yihile ilihela kuduma.