3
Kulanda kwa Habakuki
(Kwa yalingwaluchiza kwimba. Kwa vinhu vya muzichi vya ng'weso.)
1 Kulanda kwa mloli Habakuki.
2 Gwa Mkulu Nguluwi, nanyhulika mbuli zilinguwala lutogo lwa hegwe,
nani ndangudumba kwa madito ga hegwe.
Uzidite kahi mbuli azo kuli mhela wa hetwe,
zizeleche kuli awu mhela wa hetwe.
Houzudila, dedede ukumbuchile kutulajila isungu lya hegwe.
3 Nguluwi nakoya kulawa Temani,
heye yawele yelile kulawa kuli chidunda cha Palani.
Ukulu wa heye nauugubika ulanga weng'ha,
isi nayo naimema lutogo lwa heye.
4 Kupulika kwa heye ndo kota isanya lilingulawa,
milapi najilawa mmoko mwa heye,
kuwele mong'ho wa heye nauvisigwa.
5 Matamwa gangulongola kumwando kwa heye,
kumbele kwa heye kubagama kwanguwinza.
6 Loyemile, isi naitigasika,
loyawalolile wanhu wa isi, nawakakama.
Vidunda vya katali navibenigwa,
vigongo navigulumuka,
amo namwali na nzila za heye za mazuwa gose.
7 Nandijona mihema ja wanhu wa Kushani vyojilingugazika,
na mipaziya ja wanhu wa Midiani vyojilingukakama.
8 Gwa Mkulu Nguluwi, ndaze, nakuzizudila nzanda?
Ndaze, nakugazudila mazi ga bahali,
mbaka nakwendesa falasi wa hegwe
na mituka ja ngondo ja kusumya?
9 Nakuuwika goya upinde wa hegwe,
nakuwika misale ja hegwe kuli ng'weso.
Lumwemwesa lwa hegwe lwangumwemwesa na nzanda zangulawila.
10 Vidunda navikona, navikakama.
Mazi tendema nagakola amo.
Mgati ng'hatu mwa bahali nakubuma,
na kwinula nhigu zake.
11 Isanya na nyelezi navileka kujenda hali haluga hawo,
vyoijiwene misale ja hegwe vyojilinguluta himahima,
ena, vyoviliwene igoha lya hegwe vyolilingupulika.
12 Kwa ng'halazi nakukola mchanya mwa isi,
nakuwabiga wanhu wa isi kwa ng'halazi ya hegwe.
13 Nakuluta kuwalohola wanhu wa hegwe,
kumlohola yula umhagule kwa kumbakaliza mafuta.
Nakumtowa chilongozi wa wehile,
na kusa ludali lwa undewa wa heye.
14 Chilongozi wa wamizi nakumhoma kwa misale,
wamizi vyowoyile kota chivuluvumbi kutusambalula,
kuno wosangalala kwa kuwadumya wazunwa wevisile hali honhu hawo.
15 Kwa falasi wa hegwe nakujenda mchanya mwa bahali,
bahali ilingutunyigwa na nhigu.
16 Nanyhulika nani nandumba,
mlomo wa heni naukakama kwa lunhwinhwi,
mizeje ja heni najizilika,
magulu ga heni nagakakama.
Ila ndangulibeteza kwa kusindamala zuwa lila lya kubagama,
liwele lyanguya kwa wala walingututowa.
17 Hanga mitini joleka kulavya uluwa,
na mizabibu kuleka kulela,
na mizeituni kuleka kulavya zeituni,
na migunda kuleka kulavya mbena,
na wone ming'holo jokuka kuli ibani,
na migongolo ja kufujigwa jiwe haduhu kuli mibani,
18 ndolutilila kusangalala kwa chiwalo cha Mkulu Nguluwi,
kwa vila Mkulu Nguluwi ndo mlohozi wa heni.
19 Mkulu Nguluwi Yawele na Ludali ndo mong'ho wa heni,
kangugakangaza magulu ga heni gawe kota ga ibala,
kangunditaga ng'hole mchanya mwa chidunda.