Sefaniya
Chilongole
Chitabu achi china uloli wa Sefaniya. Sefaniya nayali yolawa kuli lulelo lwa mndewa Hesekiya. Nakalavya uloli kuli mhela wa ulongozi wa mndewa Yosiya, mhela awo nawali hagati ha mwaka miya sita na makumi gane (640) na mwaka miya sita na tisa (609), Yesu yang'hali kupondigwa. Mhela awo nawali ndo wuwula uwele Yelemiya na Nahumu nawali wochikala. Kahi nawali ndo mhela uwele wanhu wa isi ya Ashulu nawali wang'hali kulemwela (2:13). Usenga wa Sefaniya nawali kwa chiwalo cha wanhu wa isi ya Yuda, mhela uwele wanhu wa isi ya Isilaeli lowalemwele na kuhilikwa kuli isi ya chijenzi.
Sefaniya nakalonga kuwala kuya kwa zuwa lya utaguso, liwele Nguluwi koigaza isi ya Yuda na wanhu wa isi zinji. Utaguso awu wahawawelize wanhu (3:9) na Nguluwi yahawahilule wanhu wamwenga, wawele nawali waliholile na walingunyenyetela.
Gali mgati
1. Kuli sula ya 1:1 Sefaniya kangizelesa.
2. Sula ya 1:2-2:3 zangulonga kota Nguluwi kowagaza wanhu wa Yuda.
3. Sula ya 2:4-15 yangulonga kota Nguluwi kowagaza wanhu wa isi zeng'ha.
4. Sula ya 3 yangulonga kota Nguluwi kowahilula wanhu wamwenga, wawele nawali walingunyenyetela.
1
1 Ulonzi wa Mkulu Nguluwi naumuyila Sefaniya, mwana wa Kushi, mwana wa Gedaliya, mwana wa Amaliya, mwana wa Hesekiya, mhela wa ulongozi wa Yosiya, mwana wa Amoni, mndewa wa Yuda.
Makanyo galinguwala kudumya kulinguya
2 Mkulu Nguluwi kangulonga,
“Ndovidumya vilumbigwe vyeng'ha viwele kuli isi.
3 Wanhu na migongolo na videje vya kilanga
na somba za mbahali,
na chinhu choneche chilinguwambuza wanhu kudita wihe,
vyeng'ha ndovidumya ng'hatu,
haduhu munhu yoneche yawele kosigala muisi.
Heni Mkulu Nguluwi nandonga.”
Magazo galinguwala isi ya Yuda
4 “Ndoigaza isi ya Yuda
na weng'ha walingikala kuli muji wa Yelusalemu.
Ndovidumya vinhu vyeng'ha vya Baali viwele navisigala kuli isi ayi,
na watambika walingujikolela mijito jimalukolo wosemwigwa.
5 Ndowadumya weng'ha walingufugama mchanya mwa vinduwiko,
kuvifugamila vinhu vya ulanga,
wala walingufugama na kilaha kwa itagwa lya heni Mkulu Nguluwi,
kahi wangilaha kwa mlungu Milikomu.
6 Ndowadumya kahi weng'ha walinguleka kumbinza heni Mkulu Nguluwi,
ne kumbuza na kundanda utanzi.”
7 Mnyamalile hali Mkulu Nguluwi Yawele na Ludali,
kwa vila zuwa lya utaguso wa Mkulu Nguluwi lya habehi.
Mkulu Nguluwi nakaiwika goya nhambiko ya wanhu wa heye,
nakaweliza wala wawele nakawalalika.
8 Mkulu Nguluwi kangulonga hino,
“Kuli zuwa lya nhambiko ya heni,
ndowagaza vilongozi wa wanhu,
na wana wa mndewa
hamwe na weng'ha walinguwinza vihendo vya chijenzi.
9 Kuli zuwa alyo ndowagaza weng'ha,
walingujifugamila milungu,
walinguimemeza ng'handa ya milungu ja hewo kwa vinhu vya uhadi na vya kubunza.”
10 Mkulu Nguluwi kangulonga,
“Kuli zuwa alyo chohulikwa chililo kulawa kuli lwizi lwa somba kuli Yelusalemu,
kulombocheza kulawa kuli honhu hanyale ha muji,
na kubuma kukulu kulawa kuli chidunda.
11 Mlombocheze hemwe mlingikala kuli honhu ha kuguzila na kugula vinhu!
Walinguguza na kugula vinhu wa hemwe weng'ha nawadumigwa,
weng'ha walingupima sendi nawadumigwa.
12 Mhela awo ndoupugajiza muji wa Yelusalemu kwa chenje,
na kuwagaza wala wawele wangikala kuli gehile ne kudumba ama kona soni,
kuno wolonga mnhumbula za hewo,
‘Mkulu Nguluwi hodita chinhu choneche, chiwe chinojile ama chihile.’
13 Lufufu lwa hewo loholigwa
na ng'handa za hewo zobomoligwa.
Wozenga ng'handa, ila hawochikala mgati mwake,
wonyala mizabibu, ila hawonwa divai.”
Zuwa likulu lya Mkulu Nguluwi lyanguya
14 Lila zuwa likulu lya utaguso wa Mkulu Nguluwi lya habehi,
lya habehi na lyanguya himahima.
Lizi lya zuwa lya Mkulu Nguluwi ndo usungu,
mbaka yazidahe kotowa iyowe.
15 Zuwa alyo lyowa zuwa lya kuzudila,
ndo zuwa lya magazo na kugazika,
zuwa lya kubomoligwa na uchiwa,
zuwa lya jiza na masinzo,
zuwa lya ng'hungugu na jiza totolo.
16 Zuwa alyo ndo lya lizi lya mhalamhanda ya ngondo,
hali miji jiwele na ngome na ng'hanzi ziwele ng'wemang'wema.
17 Kwa vila wanhu nawadita gehile hali Mkulu Nguluwi,
heye kowegalila magazo makulu,
ahyo wojenda kota wohambe walole.
Danda ya hewo yohumizwa kota mitunzi,
na ng'huli za hewo zokwenela kuli isi kota midohe.
18 Sendi ya hewo na zahabu ya hewo haviweza kuwalohola
kuli zuwa alyo lya kuzudila kwa Mkulu Nguluwi.
Kwa chiluli cha fihi ya heye
isi yeng'ha yolakazwa,
ena, baho du kochigala kuduma,
kwa weng'ha walingikala kuli isi.