10
Tola
1 Loyabagame Abimeleki, nakalawila Tola mwana wa Pua, mwana wa Dodo, wa nhanzi ya Isakali kuwalohola wanhu wa Isilaeli. Tola nayali yochikala ako Shamili kuli isi ya vidunda vya Efulaimu.
2 Ayo nayali yokola mijito ja utagusa kuli isi ya Isilaeli kwa miyaka makumi meli na gadatu. Hamba nakabagama na kutiligwa ako Shamili.
Yaili
3 Loyabagame Tola, nakalawila Yaili, Mgileadi na ayu kahi nayali yokola mijito ja utagusa kuli isi ya Isilaeli kwa mhela wa miyaka makumi meli na mbili.
4 Ayo Yaili nayali na wana walume makumi gadatu, wawele wokwina midogowi makumi gadatu. Hewo nawali na miji makumi gadatu, jilinguchemigwa Hawoti-yaili mbaka lehano. Miji ajo ja kuli isi ya Gileadi.
5 Yaili nakabagama na kutiligwa ako Kamoni.
Waamoni wanguwabunza Waisilaeli
6 Hamba Waisilaeli nawadita wihe kahi hali Mkulu Nguluwi kwa kujifugamila Mibaali na Maashitaloti na milungu ja Shamu na milungu ja Sidoni na milungu ja Moabu na milungu ja Amoni na milungu ja Wafilisti. Nawamleka Mkulu Nguluwi ne kumfugamila heye.
7 Ahyo, Mkulu Nguluwi nakawazudila ng'hatu Waisilaeli, nakawawika mmoko mwa Wafilisti na mmoko mwa Waamoni.
8 Nawo nawawakoda ng'hatu na kuwaditila wihe Waisilaeli kuli mwaka awo. Nawawaditila wihe Waisilaeli weng'ha wawele wochikala kumwambu mwa lwanda lwa Yolodani kuli isi ya Waamoli, iwele ako Gileadi, kwa mhela wa miyaka kumi na nane.
9 Nawo Waamoni nawaloka lwanda lwa Yolodani leka kitowa na wanhu wa nhanzi za Yuda na Benjamini na Efulaimu. Lelo Waisilaeli nawali kuli kugazika lukami.
10 Lelo Waisilaeli nawamlilila Mkulu Nguluwi na kulonga, “Hetwe natukuditila gehile kwa vila tukuleka hegwe, Nguluwi wa hetwe na kujifugamila Mibaali.”
11 Mkulu Nguluwi nakedichila kwa kuwalonjela Waisilaeli, “Ndaze, hemwe hamloholigwe na heni kulawa kuli moko ga Wamisili na Waamoli na Waamoni na Wafilisti?
12 Kahi Wasidoni na Waamaleki na Wamaoni wawagazile hemwe, namwe namndilila, nani ndiwalohola kulawa kuli moko ga hewo.
13 Ila hemwe mndeka na kujifugamila milungu jinji. Lelo kwa chiwalo acho, heni hambe ndiwalohole kahi.
14 Lelo mlute mkajililile ajo milungu ja hemwe jomjihagule, jiwalohole hala lomuwa hali kugazika.”
15 Waisilaeli nawamlonjela Mkulu Nguluwi, “Natudita gehile, lelo utuditile goneche gougona ndo ganoga kwa hetwe, ila twangukudedeza utulohole zuwa lino lya lehano.”
16 Lelo Waisilaeli nawosa milungu ja hewo ja chijenzi jiwele hali hewo na kumfugamila Mkulu Nguluwi. Mkulu Nguluwi hawezile kulutilila kugona magazo ga Waisilaeli.
17 Mhela awo, Waamoni nawali weting'hane hamwe kwa ngondo, nawawika kambi ya hewo ako Gileadi. Nawo Waisilaeli naweting'hana na kuwika kambi ya hewo ako Misipa.
18 Wakulu wa Gileadi nawali wochiuza hewo kwa hewo, “Ndaze, munhu wachi yokwaluka kitowa na Waamoni? Heye kowa chilongozi wa walingikala Gileadi.”