1 Ako Gileadi nakwali na munhu yumwe yezidahe ng'hatu kitowa ngondo yachemigwe Yefuta, mwana wa mdala yumwe mng'hondwa, mhaza wa heye nayali yochemigwa Gileadi. 2 Heye Gileadi nayali na mchewake yawele yochikala na heye. Lelo wana wa ayo mchewake lowawele wakulu, nawamuwinga Yefuta kuno womlonjela, “Hegwe huweza hebu kuhalila uhalizi wa mhaza wa hetwe, kwa vila hegwe kwa mwana wa mdala yunji.” 3 Aho ndo Yefuta nakawabilima wang'holoze na kuluta kikala kuli isi ya Tobu. Lelo wanhu wajuvi nawamuwinza Yefuta na kilumba na heye.

4 Loukolile mhela umwenga, wana wa Amoni nawawatowa Waisilaeli. 5 Waamoni lowawele wochitowa na Waisilaeli, wasekulu wa Gileadi nawaluta kumhola Yefuta ako Tobu. 6 Nawamlonjela Yefuta, “Uye uwe chilingozi wa hetwe, leka titowe ngondo na Waamoni.” 7 Ila Yefuta nakawalonjela wasekulu wa Gileadi, “Hemwe hamnganile heni na kumbinga heni kuli ng'handa ya mhaza wa heni, lelo lekachoni mwanguya mhela awu wa kugaya kwa hemwe?” 8 Wasekulu wa Gileadi nawamlonjela Yefuta, “Ndo mina hetwe tuya kwa hegwe leka uche hamwe na hetwe kitowa na Waamoni, kowa mng'hangala wa hetwe na wenyeng'haye weng'ha wa Gileadi.”

9 Yefuta nakawalonjela wasekulu wa Gileadi, “Wone mondihilusa heni kwa hemwe kahi leka titowe na Waamoni na wone heye Mkulu Nguluwi yawalavye hali heni, lelo ndowa chilongozi wa hemwe?” 10 Wasekulu wa Gileadi nawamlonjela Yefuta, “Heye Mkulu Nguluwi kowa mlolezi hali hetwe. Tukomya, todita kota vyoulingugana hegwe.” 11 Aho ndo Yefuta nakaluta hamwe na wasekulu wa Gileadi na wamdita yawe chilongozi na mng'hangala wa hewo. Naye Yefuta nakalonga ulonzi wa heye weng'ha hali Mkulu Nguluwi ako Misipa.

12 Lelo Yefuta nakalajiza wasenga walute kwa mndewa wa Waamoni yolonga, “Ndaze! Hegwe kuna choni na hetwe, mbaka kuya kwa hetwe na kitowa hali isi ya hetwe?” 13 Mndewa wa isi ya Waamoni nakawedichila wala wasenga wa Yefuta, “Kwa vila Waisilaeli nawali waiholile isi ya hetwe, hala lowalawile kuli isi ya Misili, kulawa Alinoni mbaka Yaboki mbaka Yolodani, lelo mhiluse azo isi kahi kwa kikala goya.”

14 Lelo Yefuta nakalajiza wasenga lwakeli watule kwa ayo mndewa wa Waamoni, 15 nakamlonjela, “Yefuta kangukulonjela kota Isilaeli haiholile isi ya Moabu ne isi ya wanhu wa Amoni. 16 Ila Waisilaeli lowalawile Misili nawajenda kuchiwala mbaka kuli Bahali ya Shamu na mbaka Kadeshi. 17 Aho ndo Waisilaeli nawalajiza wasenga walute kwa mndewa wa Edomu, wolonga, ‘Dedede, ndangukulanda ung'hundize kukola kuli isi ya hegwe.’ Ila mndewa wa Edomu hakundile hebu. Nawalajiza kahi wasenga kwa mndewa wa Moabu, ila mndewa ayu kahi nahawakundize kukola kuli isi ya heye. Lelo Waisilaeli nawapona kuli isi ya Kadeshi. 18 Hamba nawaluka majendo mbaka kuchiwala na kuzizunguluta azo isi za Edomu na Moabu, nawo nawakola kuli ubanzi wa kolilawilaga isanya mwa isi ya Moabu, nawawika kambi ya hewo kumwambu mwa lwanda lwa Alinoni. Ila hambe wenjile kuli honhu ha Moabu. Lwanda lwa Alinoni nalwali ndo mbaka wa Moabu. 19 Hamba Waisilaeli nawalajiza wasenga walute kwa Sihoni mndewa wa Waamoli ako Heshiboni, kumlanda yawakundize kukola kuli isi ya heye leka walute kuli isi ya hewo. 20 Ila ayo Sihoni nahawakundile Waisilaeli wakole kuli mbaka ja isi ya heye. Sihoni nakawakungajiza wanhu wa heye weng'ha, nawo nawawika kambi ako Yahasa, kitowa na Waisilaeli. 21 Ila Mkulu Nguluwi, Nguluwi wa Isilaeli, nakawadita wanhu wa heye wawasumye wanhu wa mndewa Sihoni. Lelo Waisilaeli nawaihola isi yeng'ha ya Waamoli wawele wochikala kuli isi ayo. 22 Nawahola honhu heng'ha ha Waamoli kulawa kuli lwanda lwa Alinoni mbaka kuli lwanda lwa Yaboki na kulawa kuchiwala ubanzi wa kolilawilaga isanya mbaka kolizinjilaga isanya. 23 Lelo Mkulu Nguluwi, Nguluwi wa Isilaeli nakawasukula isi ya Waamoli na kuwapa Waisilaeli. Nagwe kwangugana kuhola honhu ha hewo? 24 Wigute na chila choupegwe na mlungu wa hegwe Kemoshi. Ila isi yoneche iwele Mkulu Nguluwi, Nguluwi wa hetwe nakawawinga wenyeng'haye wake na kutupa hetwe, ayo ndo ya hetwe. 25 Nagwe kunoga ng'hatu kusinda Balaki mwana wa Sipoli, mndewa wa Moabu? Heye naketwanza na Waisilaeli ama kitowa na hewo? 26 Lekachoni hambe muigombole mhela wula, miyaka miya zidatu, mhela Waisilaeli lowawele wochikala ako Heshiboni na miji jake na Aloeli na miji jake na kuli miji jiwele hafungo mwa Alinoni? 27 Lelo heni, sikuditile gehile, ila hegwe nakunditila wihe heni kwa kitowa na heni, heye Mkulu Nguluwi, heye yalingutagusa, yataguse lehano hali Waisilaeli na Waamoni.” 28 Ila mndewa wa Waamoni nakaubeza usenga woyapegwe kulawa kwa Yefuta.

29 Aho ndo Muhe wa Mkulu Nguluwi naumuyila Yefuta, naye nakakola kuli Gileadi na Manase, kulawa aho Misipa ya Gileadi, nakakola kuwalutila wanhu wa Amoni. 30 Naye Yefuta nakelaha kwa chiwalo cha Mkulu Nguluwi yolonga kota wone kwangukomya, kowawika Waamoni mmoko mwa heni, 31 aho ndo yowa, chila chochilawa kuli lwizi lwa ng'handa ya heni kumbochela, hondihiluka na kusumya kulawa kwa hewo Waamoni, chinhu acho chowa ndo cha Mkulu Nguluwi, nani ndochigala chiwe nhambiko ya kulakazwa.

32 Lelo Yefuta nakaloka kuwalutila Waamoni leka yetowe na hewo, naye Mkulu Nguluwi nakamha Yefuta kusumya, nakawakopola Waamoni weng'ha. 33 Nakawatowa na kuwawinga kulawa Aloeli mbaka Miniti, miji makumi meli na mbaka Abeli-kelamimu, nakawatowa ng'hatu. Ahyo, Waamoni nawalemwela hali Waisilaeli.

34 Yefuta loyawele yohiluka haluga ha heye Misipa, mhinza wa heye nakoya kumbochela na matali kuno yovina, ayo mhinza nayali mwana wa heye wa udewele. Yefuta hawele na mwana yunji mlume ne mdala. 35 Hala loyamuwene mhinza yula, Yefuta nakadadula igwanda lya heye na kulonga, “Gwa, mhinza wa heni, nakundita heni ngozole, kwa vila nakungalila magazo makulu. Nani ndilaha kwa Mkulu Nguluwi, hambe mbene chilaho cha heni.”

36 Mhinza wa heye nakamlonjela, “Mhaza wa heni, hegwe nakulaha kwa Mkulu Nguluwi, lelo nditile kota vyoulahile, kwa vila heye Mkulu Nguluwi nakakuhilusila chibida kwa hewo wang'honyo wa hegwe Waamoni.” 37 Hamba, nakamlonjela mhaza wa heye, “Lelo ndangukulanda unditile chinhu chimwe, undeche ndiliyeka kwa mhela wa myezi mili, leka ndute kuli vidunda na wayangu, tolila hamwe kwa vila siweza kuholeka ne kuponda mwana.” 38 Mhaza wa heye nakamkundiza kwa kumlonjela, “Goya, lute.” Hamba nakamhilika kutali kwa mhela wa myezi mili, naye nakaluta na wayage, nakalombocheza kubagama kwa heye ne kuholeka ne kuponda mwana. 39 Lelo lojimalile jila myezi mili, nakahiluka kwa mhaza wa heye. Mhaza wa heye nakadita kota vyoyelahile, ayo mhinza nakabagama ne kumzela mlume. Mbuli ayo naiwa chihendo kuli isi ya Isilaeli, 40 kota wahinza wa Isilaeli walute chila mwaka kumkumbuchila mhinza wa Yefuta, Mgileadi, mazuwa gane kuli chila mwaka.