20
Ngondo ya kuwatowa wanhu wa nhanzi ya Benjamini
1 Wanhu weng'ha wa Isilaeli kulawa Dani mbaka Beeli-sheba, hamwe na wanhu wa isi ya Gileadi na nhanzi yeng'ha naiting'hana hali Mkulu Nguluwi ako Misipa.
2 Wakulu weng'ha wa nhanzi zeng'ha za Isilaeli, nawafika hali nhing'hano ayo ya wanhu wa Nguluwi, walume lachi zine (400,000) walingujenda kwa magulu, wawele wawichigwe goya kwa ngondo.
3 Lelo wanhu wa Benjamini nawahulika kota wanhu wa Isilaeli nawakwina kuluta Misipa.
Wanhu wa Isilaeli nawalonga, “Mtulonjele, wihe awo nauditika ndaze?”
4 Ayo Mlawi, mlume wa mdala yakopoligwe nakedichila na nakalonga, “Heni nafika Gibeya, muji wa nhanzi ya Benjamini, mbele na mhawangu leka tuwase.
5 Wala walume wa Gibeya nawoya na kuizunguluta ayo ng'handa banzi zeng'ha mhela wa nechilo, wogana kung'hopola. Mhawangu nawamditila vibi mbaka nakabagama.
6 Lelo ndimhola yula mhawangu na kumdumula vihande na kuvihilika kuli isi yeng'ha ya uhalizi wa Isilaeli, kwa vila nawadita izudizo na upoka kuli isi ya Isilaeli.
7 Mlolele hemwe wanhu weng'ha wa Isilaeli, lelo mlongase na mwamule mwemwe baho.”
8 Lelo wanhu weng'ha nawenuka na kulonga kwa kikundiza, “Hambe tulute ne yumwe kuli ihema lya heye ne yumwe kuluta haluga ha heye.
9 Hino ndo vyotudita kwa wanhu wa Gibeya, toluta kuwatowa kwa kutowa simbi.
10 Towahagula wanhu kumi hali miya imwe kulawa nhanzi zeng'ha za Isilaeli na wanhu miya imwe kuli wanhu elufu imwe na wanhu elufu imwe kuli wanhu elufu kumi, leka walute kuwaholela wanhu vilyo, leka hala howofika Gibeya ya Benjamini, wahiluse chibida kwa chila chinhu cha kuwabasa soni chowaditile kuli isi ya Isilaeli.”
11 Lelo walume weng'ha wa Isilaeli naweting'hana hamwe hali muji awo wa Gibeya.
12 Hamba nhanzi za Isilaeli nazilajiza wanhu walute kuli nhanzi yeng'ha ya Benjamini, nawalonga, “Ndaze, ndo wihe wachi awu uwele hali hemwe?
13 Lelo muwalavye awo wanhu, awo wanhu wehile walingikala Gibeya, leka tuwakopole na kusa wihe hali Isilaeli.” Ila wanhu wa Benjamini hawakundile kuwahulichiza wang'holozawo wa Isilaeli.
14 Lelo wanhu wa Benjamini naweting'hana ako Gibeya, kulawa kuli miji ja hewo leka kitowa na wanhu wa Isilaeli.
15 Wanhu wa Benjamini nawawakungajiza wanhu zuwa lila kulawa kuli miji ja hewo, wanhu wazidahe kitowa ngondo nawali elufu makumi meli na sita (26,000) wawele wawichigwe goya kitowa ngondo na wenyeng'haye wa muji wa Gibeya nawekungajiza wanhu miya saba wahaguligwe.
16 Kuli wanhu wala weng'ha, nawali walume miya saba wahaguligwe na wawezile kutumiya moko wa kumoso na kutoza iganga kwa mhembeyo kuweza kutowa chinhu chido ng'hatu.
17 Nawo wanhu wa Isilaeli, kuleka wala wa wanhu wa Benjamini, nawawazigwa. Nawali walume lachi zine (400,000), wawele ndo wamizi wawichigwe goya kwa kitowa ngondo.
18 Lelo wanhu wa Isilaeli nawenuka na kuluta ako Beteli, nawamuuza Nguluwi, wolonga, “Nhanzi yachi yokwaluka kuwatowa wanhu wa Benjamini?” Mkulu Nguluwi nakawalonjela, “Nhanzi ya Yuda yokwaluka.”
19 Lelo wanhu wa Isilaeli nawaluta mitondo na kuwika mihema ja hewo leka kuuvaba muji wa Gibeya.
20 Wanhu wa Isilaeli nawewika goya ako Gibeya na kuluta kitowa na wanhu wa Benjamini.
21 Wanhu wa Benjamini nawalawa ako Gibeya, kuwatowa na kuwakopola wanhu wa Isilaeli. Nawawakopola wanhu elufu makumi meli na mbili (22,000) zuwa alyo ako Isilaeli.
22 Ila wanhu wa Isilaeli nawekangaza na kiwika goya kwa kitowa ngondo lwa keli kahi, honhu hahala wewichile goya hala hamwande.
23 Wanhu wa Isilaeli nawaluta na kumlilila Mkulu Nguluwi mbaka matinazo, womuuza Mkulu Nguluwi wolonga, “Ndaze, tulute kahi kitowa na wang'holozetu wanhu wa Benjamini?” Mkulu Nguluwi nakawalonjela, “Ena, mlute.”
24 Lelo wanhu wa Isilaeli nawaluta kitowa na wanhu wa Benjamini kuli zuwa lya keli.
25 Wanhu wa Benjamini nawalawa ako Gibeya zuwa lya keli kitowa na wanhu wa Isilaeli. Nawawakopola wanhu elufu kumi na nane (18,000) kulawa kuli wamizi wa Isilaeli.
26 Wanhu wa Isilaeli weng'ha nawakwina na kuluta Beteli na kulila. Nawekala aho hali Mkulu Nguluwi, nawaleka kulya zuwa alyo mbaka matinazo. Nawalavya nhambiko za kulakazwa za kikala goya hali Mkulu Nguluwi.
27 Hamba wanhu wa Isilaeli nawamlanda Mkulu Nguluwi, kwa vila isanduku lya Ilagano lya Mkulu Nguluwi nalyali ako mazuwa ago.
28 Finehasi, mwana mlume wa Eleasali, mwana wa Aluni, nayali yokwima hali isanduku alyo mazuwa ago, Waisilaeli nawalonga, “Ndaze, tulawe kahi kitowa na wang'holozetu wa Benjamini, ama tuleche?” Mkulu Nguluwi nakawalonjela, “Ena, mkwine kwa vila hamitondo ndowalavya na kuwawika mmoko mwa hemwe.”
29 Lelo Wanhu wa Isilaeli nawawawika wanhu kwa uviso kuzunguluta muji wa Gibeya banzi zeng'ha.
30 Wanhu wa Isilaeli nawaluta kitowa na wanhu wa Benjamini kuli zuwa lya kadatu. Nawewika goya kwa kitowa na wanhu wa Gibeya kota navyowaditile aho hamwande.
31 Wanhu wa Benjamini lowalawile kuluta kitowa, nawawawinza Waisilaeli mbaka nawafika kutali na muji. Hamba nawaluka kuwatowa na kuwakopola Waisilaeli kota makumi gadatu hino, kota navyowaditile aho hamwande kwa kuwakopola kuli azo nzila ng'hulu zilinguluta Beteli na Gibeya na kuli isi za ibalalika.
32 Wanhu wa Benjamini nawalonga, “Natuwasumya kota aho hamwande.” Ila wanhu wa Isilaeli nawalonga, “Lelo tubilime leka watuwinze na kuuleka muji awu na kuluta kuli nzila ng'hulu.”
33 Lelo wala wanhu weng'ha wa Isilaeli nawoka hali honhu aho na kiwika goya kwa ngondo ako Baali-tamali. Wanhu wa Isilaeli wevisile, nawalawa honhu aho howawele, kolizinjilaga isanya mwa muji wa Gibeya.
34 Hamba wanhu elufu kumi (10,000) wahaguligwe ako Isilaeli, weng'ha nawoya kuuvaba muji wa Gibeya na yila ngondo nayali ng'hulu lukami. Ila wanhu wa Benjamini hawavizelele kota kubagama kwa hewo kwa habehi kuwafichila.
35 Mkulu Nguluwi nakawadita Waisilaeli wawasumye wanhu wa Benjamini. Waisilaeli zuwa alyo nawawakopola walume elufu makumi meli na gahano na miya imwe (25,100), wawichigwe goya kwa kitowa ngondo.
36 Ahyo wanhu wa nhanzi ya Benjamini nawona kota wasumigwa. Waisilaeli nawahiluka kumbele kwa vila nawavizela kota wayawo wa kuko wevisile na kubeteza leka kuuvaba muji wa Gibeya.
37 Wala wapugajizi nawadita himahima na kwinjila kuli muji wa Gibeya na kuwatowa kwa ipanga wanhu weng'ha wa muji wula.
38 Lelo nawelagana ulajilo hali hewo Waisilaeli na wala wapugajizi, kota lowolyona iyosi kuchanya kulawa kuli muji,
39 Waisilaeli waluche kuhinduka na kuwatowa. Mhela awo nhanzi ya Benjamini nayali iwakopole Waisilaeli kota makumi gadatu hino, kwa vila nawalonga, “Natuwatowa kota aho hamwande.”
40 Ila hala du lila iyosi vyolyaluche kukwina kulawa kuli muji wula kota izengo lya ng'hungugu, aho ndo wanhu wa Benjamini nawalola kumbele, iyosi nalyali lyenele chila honhu kuli muji awo kulutila kilanga.
41 Wanhu wa Isilaeli nawahinduka na wanhu wa nhanzi ya Benjamini nawatinuswa kwa vila nawona kubagama kwa hewo nakwali habehi.
42 Ahyo nawahinduka hali Waisilaeli na kuluta kuchiwala, ila yila ngondo naiwawinza lukami na wala wanhu walawile kuli muji wula nawawakopola.
43 Nawawazunguluta Wabenjamini kuli banzi zeng'ha na kuwawinga kulawa Noha mbaka kolilawilaga isanya mwa muji wa Gibeya, kuno nawawakopola wenji wa hewo.
44 Nawawakopola Wabenjamini elufu kumi na nane (18,000) wawele wezidahe kitowa ngondo.
45 Hamba wanhu wanji wa nhanzi ya Benjamini nawahinduka na kubilimila kuchiwala kuli italawe lya Limoni. Wanhu wanji elufu zihano nawabagama kuli nzila ng'hulu lowawele wobilima. Waisilaeli nawalutilila kuwawinza lukami wanhu wa nhanzi ya Benjamini mbaka kuli muji wa Gidomu na kuwakopola kahi wanhu elufu mbili.
46 Lelo wanhu wa nhanzi ya Benjamini wabagame zuwa lila nawali wanhu elufu makumi meli na wahano (25,000) wazidahe kitowa ngondo.
47 Ila walume miya sita wa nhanzi ya Benjamini nawabilima mbaka kuchiwala kuli italawe lya Limoni, nawekala ako kwa mhela wa myezi jine.
48 Waisilaeli nawahinduka na kuwalutila wanhu wa nhanzi ya Benjamini. Nawawatowa kwa ipanga wanhu weng'ha wa miji jila na migongolo jawo na chila chinhu chowachiwene. Miji jeng'ha jowajiwene, nawajilakaza kwa chiluli.