21
Kwaluka kahi kwa nhanzi ya Benjamini
1 Lelo wanhu wa Isilaeli nawelaha ako Misipa kuno wolonga, “Haduhu yumwe hali hetwe yokunda mhinza wa heye yaholeche na munhu wa nhanzi ya Benjamini.”
2 Hamba wala wanhu nawafika Beteli, nawekala ako hali Mkulu Nguluwi mbaka matinazo, nawalila kwa kutowa iyowe.
3 Nawalonga, “Gwa Mkulu Nguluwi, Nguluwi wa Isilaeli, lekachoni mbuli ayi ya kuli Isilaeli, kota lehano nhanzi imwe ya haduhu kuli Isilaeli?”
4 Mitondo wala wanhu nawalilimka lufuku, nawazenga honhu ha kulavila nhambiko ako. Nawegala nhambiko za kulakazwa na nhambiko za kikala goya.
5 Waisilaeli nawalonga, “Kuli nhanzi azi zeng'ha za Isilaeli, nhanzi yachi haifichile kuli nhing'hano ya kumhejelela Mkulu Nguluwi? Mina nawawika chilaho chikulu kuwala ayo yohambe yamhejelele Mkulu Nguluwi ako Misipa kuno wolonga, ‘Kukomya, ayo kokopoligwa.’ ”
6 Waisilaeli nawesinza kwa chiwalo cha wang'holozawo Wabenjamini, nawalonga, “Nhanzi imwe hali Isilaeli nayajilila lehano.
7 Tudite ndaze kwa Wabenjamini walume waponile? Kwa vila natilaha kwa Mkulu Nguluwi kota hatuwapa wahinza wa hetwe leka wawahole.”
8 Lelo nawalonga, “Nhanzi yachi ya Isilaeli iwele haifichile hali Mkulu Nguluwi ako Misipa?” Hamba nawavizela kota haduhu ne yumwe yoyile kuli kambi kulawa Yabeshi-gileadi kuli nhing'hano ayo.
9 Mina hala wanhu lowawazigwe, hakuwele na munhu ne yumwe hali wenyeng'haye wa Yabeshi-gileadi.
10 Lelo nhing'hano nailajiza wanhu elufu kumi na mbili (12,000) wazidahe kitowa ngondo, nawawalonjela, “Muche mkawatowe wenyeng'haye wa Yabeshi-gileadi kwa ipanga, wadala na wana wadodo.
11 Mbuli yomdita ndo ayi, momkopola chila mlume na mdala yawasile na mlume.”
12 Nawo nawawafika wahinza miya zine ako Yabeshi-gileadi, wawele hawanating'hana na walume, nawawegala kuli kambi ya ako Shilo kuli isi ya Kanaani.
13 Lelo Waisilaeli weng'ha nawawalajiza wanhu kuluta kulonga na wanhu wa Benjamini wowawele kuli italawe lya Limoni, kuwawikulila kikala goya.
14 Wabenjamini nawahiluka mhela wuwo, hamba nawawapa wala wadala waponile kuli wala wadala wa Yabeshi-gileadi, ila wadala awo hawenele hebu.
15 Nawo wanhu nawawonela isungu Wabenjamini, kwa vila Mkulu Nguluwi nakambuza kwajilila kwa nhanzi imwe ya isi ya Isilaeli.
16 Hamba wasekulu wa nhing'hano yeng'ha nawalonga, “Ndaze, tudite ndaze leka tuwape wadala wala waponile kwa vila wadala wa nhanzi ya Benjamini nawabagamizwa?”
17 Nawalonga, “Igana kuwa na uhalizi kwa wala wanhu wa nhanzi ya Benjamini waponile, leka nhanzi ya Isilaeli ileche kwajilila.
18 Ila hetwe hatuweza hebu kuwaleka wahinza wa hetwe wawe wadala wa hewo kwa vila hetwe Waisilaeli natilaha kwa kulonga, ‘Yapanjilwe ayo yomgalila mdala munhu wa nhanzi ya Benjamini.’ ”
19 Hamba nawalonga, “Mlolele, hana mnvina ya Mkulu Nguluwi chila mwaka ako Shilo, muji uwele ubanzi wa kasikazini mwa Beteli, ubanzi wa kolilawilaga isanya mwa nzila ng'hulu ilingulawa Beteli kuza Shekemu, awo ndo ubanzi wa kusini mwa Lebona.”
20 Lelo nawawalajiza wanhu wa nhanzi ya Benjamini wolonga, “Lelo mlute chinyele kuli migunda ja mizabibu,
21 mbeteze leka wadala wa Shilo lowolawa mgati kuza kunze kuvina mhela wa mnvina, hamba mlawe kuli mizabibu na chila munhu yeholile mdala yumwe leka yawe mchewake na mhiluche kuli isi ya Benjamini.
22 Wahaza wa hewo ama wang'holozawo lowokuya kulonjeleza, natwe towalonjela, ‘Dedede, muwape uganililo kwa chiwalo cha hetwe, kwa vila hatuwaholile hewo kuwa wadala wa hewo kulawa kuli ngondo, kwa vila hamuwapele hewo na hamuwa na nongwa kuli chilaho cha hemwe.’ ”
23 Wala wanhu wa Benjamini nawadita ahyo, naweholela wadala kwa kiwhana na winji wa hewo kulawa kuli wala wawele wovina na kuhiluka kuli uhalizi wa hewo na kuzenga miji na kikala amo.
24 Wanhu wa Isilaeli nawaluta, chila munhu nakaluta kuli nhanzi ya heye na wanhu wa heye. Nawalawa ako na chila munhu nakaluta kuli uhalizi wa heye.
25 Mazuwa ago nakwali haduhu mndewa hali isi ya Isilaeli, chila munhu nakadita choyalinguchona kota ndo chinoga kwa heye yuye.