19
Isi ya nhanzi ya Simeoni
1 Simbi ya keli naigwila kuli nhanzi ya Simeoni kota vyoziwele ng'holo za hewo. Isi yowapegwe nayali izungulutwe na yila nhanzi ya Yuda.
2 Nhanzi ya Simeoni naipegwa miji ja Beeli-sheba na Sheba na Molada
3 na Hasali-shuali na Bala na Esemu
4 na Elitoladi na Betuli na Holima
5 na Sikilagi na Beti-makilaboti na Hasali-susa
6 na Beti-lebaoti na Shaluheni. Miji jowapegwe najali kumi na jidatu hamwe na vijiji vyake.
7 Kahi nakwali na muji wa Aini na Limoni na Eteli na Ashani. Miji jowapegwe najali jine hamwe na vijiji vyake,
8 hamwe na vijiji vyeng'ha vizungulute miji ajo mbaka Baalati-beeli na Lama ya Negebu. Awo ndo uhalizi wa wanhu wa nhanzi ya Simeoni, kota vyoziwele ng'holo za hewo.
9 Kwa vila honhu hoipegwe nhanzi ya Yuda nahali hakulu ng'hatu kusinda nhanzi ayo vyoiganile, ahyo honhu hamwe ha hewo naipegwa nhanzi ya Simeoni.
Isi ya nhanzi ya Sebuluni
10 Simbi ya kadatu naigwila kwa wanhu wa nhanzi ya Sebuluni, kota vyoziwele ng'holo za hewo. Honhu ha hewo nahenela mbaka Salidi.
11 Kulawa ako, mbaka wa hewo nauluta kolizinjilaga isanya mbaka Maleali, naukolela hafungo ha Dabesheti na kuluta kuli chikolola chiwele kolilawilaga isanya ako Yokineamu.
12 Kulawa Salidi, mbaka naulutilila kuza kolilawilaga isanya kuza kuli mbaka wa Kisiloti-taboli. Kulawa ako naukola Dabelati mbaka Yafiya.
13 Kulawa Yafiya naulutilila kuza kolilawilaga isanya mbaka Gati-hefeli na Eti-kasini na kulutilila mbaka Limoni uhinduka kuluta Nea.
14 Ubanzi wa kasikazini mbaka nauhinduka kuza Hanatoni na kumalila kuli ibindi lya Yifitaheli.
15 Nawapegwa kahi miji ja Katati na Nahalali na Shimuloni na Yidala na Betelehemu, miji jeng'ha jowapegwe najali kumi na mili hamwe na vijiji vyake.
16 Awo ndo uhalizi wozipegwe kwa wanhu wa nhanzi ya Sebuluni kota vyoziwele ng'holo za hewo, miji ajo hamwe na vijiji vyake.
Isi ya nhanzi ya Isakali
17 Simbi ya kane naigwila wanhu wa nhanzi ya Isakali, kota vyoziwele ng'holo za hewo.
18 Honhu aho nahali na miji ja Yesileeli na Kesuloti na Shunemu
19 na Hafalaimu na Shioni na Anahalati
20 na Labiti na Kishioni na Ebesi
21 na Lemeti na Eni-ganimu na Eni-hada na Beti-pasesi.
22 Kahi mbaka wawo naufika Taboli na Shahasuma na Beti-shemeshi na kumalila kuli lwanda lwa Yolodani. Miji jowapegwe najali kumi na sita hamwe na vijiji vyake.
23 Awo ndo uhalizi wowapegwe wanhu wa nhanzi ya Isakali kota vyoziwele ng'holo za hewo, miji ajo hamwe na vijiji vyake.
Isi ya nhanzi ya Asheli
24 Simbi ya kahano naigwila kwa wanhu wa nhanzi ya Asheli, kota vyoziwele ng'holo za hewo.
25 Honhu ha isi ya hewo nahali na miji ja Helikati na Hali na Beteni na Akishafi
26 na Alameleki na Amadi na Mishali. Kwa ubanzi wa kolizinjilaga isanya, mbaka nauting'hana na Kalimeli na Shiholi-libinati.
27 Hamba nauhinduka kuluta kolilawilaga isanya kuluta Beti-dagoni kouting'hane na Sebuluni na ibindi lya Yifitaheli. Kulawa aho naulutilila kasikazini mbaka Beti-emeki na Neieli na kulutilila kuza kasikazini mbaka Kabuli
28 na Abidoni na Lehobu na Hamoni na Kana mbaka Sidoni Ng'hulu.
29 Aho, mbaka nauhinduka kuluta Lama na kufichila kuli muji wa Tilo uwele na lugagala. Hamba nauhinduka kuluta Hosa na kumalila kuli bahali ya Mediteleniyani. Miji jiyage ndo Mahalabu na Akisibu
30 na Uma na Afeki na Lehobu. Miji jeng'ha jowapegwe najali makumi meli na meli hamwe na vijiji vyake.
31 Awo ndo uhalizi wowapegwe wanhu wa nhanzi ya Asheli kota vyoziwele ng'holo za hewo, miji ajo hamwe na vijiji vyake.
Isi ya nhanzi ya Nafutali
32 Simbi ya sita naigwila wanhu wa nhanzi ya Nafutali, kota vyoziwele ng'holo za hewo.
33 Mbaka wawo nawaluchila Helefu kuli mwaloni wa Saananimu, naukolela Adami-nekebu na Yabineeli mbaka Lakumu na kumalila kuli lwanda lwa Yolodani.
34 Kulawa aho mbaka nauluta kolizinjilaga isanya kuluta Asinoti-taboli, kulawila ako nauluta Hukoki na kiting'hana na ubanzi wa kusini wa honhu ha nhanzi ya Sebuluni, kulawa aho uting'hana na nhanzi ya Asheli ubanzi wa kolizinjilaga isanya. Kwa ubanzi wa kolilawilaga isanya mbaka wokwinjilila hali lwanda lwa Yolodani.
35 Miji ja hewo jiwele na lugagala ndo Sidimu na Seli na Hamati na Lakati na Kineleti
36 na Adama na Lama na Hasoli
37 na Kedeshi na Edileyi na Eni-hasoli
38 na Yiloni na Migidali-eli na Holemu na Beti-anati na Beti-shemeshi. Miji jeng'ha jowapegwe najali kumi na tisa hamwe na vijiji vyake.
39 Awo ndo uhalizi wowapegwe wanhu wa nhanzi ya Nafutali kota vyoziwele ng'holo za hewo, miji ajo hamwe na vijiji vyake.
Isi ya nhanzi ya Dani
40 Simbi ya saba naigwila kwa wanhu wa nhanzi ya Dani, kota vyoziwele ng'holo za hewo.
41 Honhu ha isi ya hewo nahali na miji ja Sola na Eshitaoli na Ili-shemeshi
42 na Shaalabini na Aiyaloni na Yitila
43 na Eloni na Timuna na Ekiloni
44 na Eliteke na Gibetoni na Baalati
45 na Yehudi na Bene-belaki na Gati-limoni
46 na Me-yalikoni na Lakoni na isi iwele habehi na Yopa.
47 Wanhu wa nhanzi ya Dani vyowajilize isi ya hewo, nawaluta kuihola isi ya Leshemu. Nawawasumya na kuiboka vyowawakopole wanhu wa aho weng'ha. Vyowaubochile nawagalusa itagwa lya muji awo, uwa Dani, itagwa lyoliwele lya sekulu wa hewo Dani.
48 Awo ndo uhalizi wowapegwe wanhu wa nhanzi ya Dani kota vyoziwele ng'holo za hewo, muji awo hamwe na vijiji vyake.
Kigawila kwa kuduma
49 Vyowamalile kigawila honhu heng'ha ha isi kota uhalizi, Waisilaeli nawamha Yoshua, mwana wa Nuni, honhu ha heye hagati ha hewo.
50 Kota vyoyalajize Mkulu Nguluwi, nawamha muji uwele nakauhagula heye yuye, mina Timunati-sela, uwele nawali kuli isi ya vidunda vya Efulaimu. Na heye Yoshua nakauzenga kahi muji awo na kikala amo.
51 Lelo mtambika Eleasali na Yoshua, mwana wa Nuni, hamwe na vilongozi wa ivyazi lya nhanzi za Waisilaeli, nawagawa honhu aho kwa kutowa simbi hali Mkulu Nguluwi hali lwizi lwa ihema lya Nguluwi ako Shilo. Lelo naweneza kigawila isi.