20
Miji ja kubilimila
1 Hamba Mkulu Nguluwi, nakamlajiza Yoshua
2 yawalonjele Waisilaeli hino, “Mihagulile miji jiwele munhu yoweza kubilimila, miji jiwele nandimlonjela Musa yakulonjele.
3 Munhu yoneche wone yamkopole munhu ne kunuwila koweza kubilimila kuli muji woneche, ahyo koluta ako kwa chiwalo cha kumbilima yula munhu yalingugana kuhilula chibida.
4 Yakopole kobilimila kuli muji woneche na kwima hali lwizi lwa muji na kuwalonjela wasekulu wa muji awo nongwa ya heye. Wasekulu wombochela na kumha honhu ha kikala hamwe na hewo.
5 Wone yula munhu yalingugana kuhilula chibida komuwinza mbaka kuli muji awo, wasekulu wa muji awo hawomlavya munhu ayo yakopole kwa yula yalingugana kuhilula chibida kwa vila hamkopole myage kwa kunuwila kwa vila nayali hamzudile heye aho hamwande.
6 Mkopolaji kolutilila kikala amo mbaka aho hoyotagusigwa hali wanhu na kahi mbaka aho yula mkulu wa mtambika yawele yolongoza mhela awo hoyobagama. Kulawa aho munhu ayo koweza kuhiluka kaye kwa heye kuli muji wula woyalawile.”
7 Lelo kwa chiwalo acho, nawajibagula miji ja Kedeshi ako Galilaya kuluta kuli vidunda vya Nafutali na Shekemu kuli vidunda vya Efulaimu na Kiliati-aliba, mina ndo Hebuloni kuli isi ya vidunda vya Yuda.
8 Kumwambu mwa lwanda lwa Yolodani, kolilawilaga isanya mwa muji wa Yeliko nawauhagula muji wa Beseli uwele kuli chiwala kuli ibalalika, muji awo nawali ndo honhu ha nhanzi ya Lubeni. Kahi nawahagula Lamoti ako Gileadi kuwele na muji wa nhanzi ya Gadi na Golani ako Bashani kuli honhu ha nhanzi ya Manase.
9 Aji ndo miji jibaguligwe kwa chiwalo cha wanhu weng'ha wa Isilaeli na wajenzi wowawele wochikala hali hewo, leka wone munhu yoneche yomkopola myage ne kunuwila, wone yabilimile ako yaleche kukopoligwa na yalinguhilula chibida, mbaka aho hoyotagusigwa hali chilundo cha wanhu muji awo.