21
Miji ja Walawi
1 Vyowawele ako Shilo kuli isi ya Kanaani, vilongozi wa ng'holo za Walawi nawawalutila mtambika Eleasali na Yoshua mwana wa Nuni na vilongozi wa wanhu wa nhanzi zeng'ha za Waisilaeli,
2 nawawalonjela, “Mkulu Nguluwi nakamlonjela Musa kota hetwe tupegwe miji ja kikala na honhu ha kudimila ming'holo na misenga ja hetwe.”
3 Lelo kwa malajizo ga Mkulu Nguluwi, Waisilaeli nawahagula kulawa kuli honhu ha isi, miji na honhu ha kudimila ming'holo na misenga ja hewo, nawawapa Walawi hawe uhalizi wa hewo.
4 Simbi ya mwaluko naiwagwila wanhu wa ng'holo za Kohati. Hali hewo, walelwa wa mtambika Aluni nawapegwa kwa kutowa simbi, miji jiwele hali honhu ha nhanzi ya Yuda na Simeoni na Benjamini. Miji jeng'ha jowapegwe najali kumi na jidatu.
5 Wanhu wa ng'holo za Kohati wowasigale nawapegwa kwa kutowa simbi miji kumi jiwele hali honhu ha nhanzi ya Efulaimu na Dani na kuli nusu ya honhu ha nhanzi ya Manase.
6 Wanhu wa ng'holo za Gelishoni nawapegwa kwa kutowa simbi miji kumi na jidatu kuli honhu ha nhanzi ya Isakali na Asheli na Nafutali na kuli nusu ya honhu ha nhanzi ya Manase ako Bashani.
7 Wanhu wa ng'holo za Melali nawapegwa miji kumi na mili kuli honhu ha nhanzi ya Lubeni na Gadi na Sebuluni.
8 Waisilaeli nawawapa Walawi miji ajo hamwe na honhu ha kudimila ming'holo na misenga ja hewo kwa kutowa simbi, kota Mkulu Nguluwi vyoyamlajize Musa.
9 Aga ndo matagwa ga miji kulawila kuli honhu ha nhanzi ya Yuda na Simeoni ndo nailavigwe
10 kwa walelwa wa mtambika Aluni, wawele wanhu wa ng'holo za Kohati, yawele nayali wa nhanzi ya Lawi. Honhu ha hewo nawapegwa aho mwaluko kwa vila simbi ya hewo naiwagwila aho mwaluko.
11 Nawapegwa Kiliati-aliba, mina ndo Hebuloni. Aliba nayali mhaza wa Anaki kuli isi ya vidunda vya Yuda, hamwe na honhu ha kudimila.
12 Ila migunda ja muji awo hamwe na vijiji vizungulute, nayali yapegwe Kalebu mwana wa Yefune viwe vya heye.
13 Hamba nakawapa walelwa wa mtambika Aluni muji wa Hebuloni na honhu hake ha kudimila, muji awo nawali kahi ubaguligwe kuwa muji wa kubilimila, nawawapa kahi mji wa Libuna hamwe na honhu hake ha kudimila
14 na Yatili hamwe na honhu hake ha kudimila na Eshitemoa hamwe na honhu hake ha kudimila
15 na Holoni hamwe na honhu hake ha kudimila na Debili hamwe na honhu hake ha kudimila
16 na Aini hamwe na honhu hake ha kudimila na Yuta hamwe na honhu hake ha kudimila na Beti-shemeshi hamwe na honhu hake ha kudimila. Miji jeng'ha ndo tisa, jiwele kuli nhanzi azo mbili.
17 Kuli honhu ha nhanzi ya Benjamini nawapegwa miji jiyage, jiwele ndo Gibeoni na honhu ha kudimila na Geba hamwe na honhu ha kudimila
18 na Anatoti hamwe na honhu ha kudimila na Alimoni hamwe na honhu ha kudimila. Miji jeng'ha jowapegwe, najali jine.
19 Miji jeng'ha ja walelwa wa Aluni wowawele watambika, najali kumi na jidatu hamwe na honhu ha kudimila.
20 Wanhu wa ng'holo za Kohati wasigale, wawele kahi wanhu wa nhanzi ya Lawi, nawapegwa miji kuli honhu ha nhanzi ya Efulaimu.
21 Nawapegwa Shekemu, muji wa kubilimila hamwe na honhu hake ha kudimila kuli isi ya vidunda vya Efulaimu na Geseli hamwe na honhu hake ha kudimila
22 na Kibisaimu hamwe na honhu hake ha kudimila na Beti-holoni hamwe na honhu hake ha kudimila. Miji jeng'ha jowapegwe, najali jine.
23 Kuli honhu ha nhanzi ya Dani, nawapegwa Eliteke hamwe na honhu hake ha kudimila na Gibetoni hamwe na honhu hake ha kudimila
24 na Aiyaloni hamwe na honhu hake ha kudimila na Gati-limoni hamwe na honhu hake ha kudimila. Miji jeng'ha jowapegwe, najali jine.
25 Kuli nusu ha honhu ha nhanzi ya Manase, nawapegwa Taanaki hamwe na honhu hake ha kudimila na Gati-limoni hamwe na honhu hake ha kudimila. Miji jeng'ha jowapegwe, najali mili.
26 Lelo miji jowapegwe wanhu wa Kohati wasigale najali kumi hamwe na honhu ha kudimila.
27 Kwa Wagelishoni kahi, lukolo lumwe lwa Walawi, nalupegwa miji mili kuli honhu ha nusu ya nhanzi ya Manase, muji wa Golani, ako Bashani, muji wa kubilimila hamwe na honhu hake ha kudimila na Beeshitela hamwe na honhu hake ha kudimila.
28 Kuli honhu ha nhanzi ya Isakali, nawapegwa Kishioni hamwe na honhu hake ha kudimila na Dabelati hamwe na honhu hake ha kudimila
29 na Yalimuti hamwe na honhu hake ha kudimila na Eni-ganimu hamwe na honhu hake ha kudimila. Miji jeng'ha jowapegwe, najali jine.
30 Kuli honhu ha nhanzi ya Asheli, nawapegwa Mishali hamwe na honhu hake ha kudimila na Abidoni hamwe na honhu hake ha kudimila
31 na Helikati hamwe na honhu hake ha kudimila na Lehobu hamwe na honhu hake ha kudimila. Miji jeng'ha jowapegwe, najali jine.
32 Kuli honhu ha nhanzi ya Nafutali nawapegwa Kedeshi, muji wa kubilimila ako Galilaya, hamwe na honhu hake ha kudimila na Hamoti-doli hamwe na honhu hake ha kudimila na Kalitani hamwe na honhu hake ha kudimila. Miji jeng'ha, najali jidatu.
33 Miji jeng'ha ja ng'holo za Gelishoni, najali kumi na jidatu hamwe na honhu ha kudimila.
34 Walawi wayage wasigale, wawele ndo walelwa wa Melali, nawapegwa miji kuli honhu ha nhanzi ya Sebuluni. Najo ndo Yokineamu hamwe na honhu hake ha kudimila na Kalita hamwe na honhu hake ha kudimila
35 na Dimina hamwe na honhu hake ha kudimila na Nahalali hamwe na honhu hake ha kudimila. Miji jeng'ha najali jine.
36 Kuli honhu ha nhanzi ya Lubeni, nawapegwa Beseli hamwe na honhu hake ha kudimila na Yahasa hamwe na honhu hake ha kudimila
37 na Kedemoti hamwe na honhu hake ha kudimila na Mefaati hamwe na honhu hake ha kudimila. Miji jeng'ha najali jine.
38 Kuli honhu ha nhanzi ya Gadi nawapegwa, Lamoti kuli Gileadi, awo ndo muji wa kubilimila, hamwe na honhu hake ha kudimila na Mahanaimu hamwe na honhu hake ha kudimila
39 na Heshiboni hamwe na honhu hake ha kudimila na Yaseli hamwe na honhu hake ha kudimila. Miji jeng'ha najali jine.
40 Miji jeng'ha jowapegwe walelwa wa Melali, wawele ndo ivyazi lya Walawi lisigale, najali kumi na mbili.
41 Miji jeng'ha jiwele Walawi nawapegwa kuli honhu ha Waisilaeli, najali makumi gane na nane hamwe na honhu ha kudimila.
42 Chila muji umwe hali miji aji, nauzungulutwa na honhu hake ha kudimila.
43 Lelo Mkulu Nguluwi, nakawapa Waisilaeli isi yeng'ha iwele yelahile na wasekulu wa hewo. Nawaihola na kikala amo.
44 Mkulu Nguluwi nakawadita wekale goya chila honhu muisi, kota vyoyawalahile wasekulu wa hewo. Haduhu mng'honyo yoneche yawezile kuwahejelela kwa vila Mkulu Nguluwi nayali yawawichile wang'honyo awo mmoko mwa hewo.
45 Haduhu ne ilagano lyoneche linojile liwele Mkulu Nguluwi nakawalonjela Waisilaeli, hamba haliditigwe. Goyalonjile geng'ha nagenela.