9
Ilagano lya wanhu wa Gibeoni
1 Wandewa weng'ha nawali kolizinjilaga isanya mwa lwanda lwa Yolodani vyowahuliche mbuli za Waisilaeli, wala wandewa wawele kuli isi ya vidunda na kuli ibalalika na honhu heng'ha ha mhwani ha bahali ya Mediteleniyani kulutila Lebanoni, wandewa wa Wahiti na wa Waamoli na wa Wakanaani na wa Wapelisi na wa Wahivi na wa Wayebusi,
2 nawekungajiza hamwe kwa chiwalo cha mbuli imwe ya kitowa ngondo na Yoshua na Waisilaeli.
3 Ila wenyeng'haye wa Gibeoni vyowahuliche mbuli kuwala kwa Yoshua vyoyajiditile miji ja Yeliko na Ayi,
4 nawamula kudita usugu. Nawawika goya vilyo, nawakwiniza migunila jilalile mchanya mwa idogowi lya hewo, chihako cha igozi cha kuwichila divai chilalile na kuhonigwa,
5 nawavala makwamba na nguwo zilalile na vilyo vya hewo vyeng'ha navyali vikalile viwele na lungwi.
6 Lelo nawamlutila Yoshua kuli kambi ako Giligali, nawamlonjela heye na Waisilaeli, “Hetwe natulawa isi ya kutali, twangulanda mdite ilagano na hetwe.”
7 Ila Waisilaeli nawawalonjela awo Wahivi, “Toweza ndaze kudita ilagano na hemwe? Hanji hemwe mwangikala kuli muji uwele habehi na hetwe.”
8 Nawo nawamlonjela Yoshua, “Hetwe twa vitumagwa wa hegwe.” Naye Yoshua nakawauza, “Hemwe mwa whaani na mwangulawila kohi?”
9 Nawamlonjela, “Hetwe twa vitumagwa wa hegwe, kulawa isi ya kutali. Tuya kwa hegwe mina natuhulika lutogo lwa itagwa lya Mkulu Nguluwi, Nguluwi wa hemwe. Natuhulika mbuli ya lutogo lwa heye na geng'ha goyaditile kula kuli isi ya Misili.
10 Natuhulika geng'ha goyawaditile wandewa weli wa Waamoli na wanhu wa hewo, wawele ubanzi wa kolilawilaga isanya mwa lwanda lwa Yolodani, mndewa Sihoni wa Heshiboni na mndewa Ogu wa Bashani nayawele yochikala ako Ashitaloti.
11 Aho ndo wasekulu wa hetwe na wanhu weng'ha wa isi ya hetwe, nawatulonjela tuhole chilyo cha majendo, tuye tuting'hane na hemwe na kuwalonjela hemwe kota hetwe twa vitumagwa wa hemwe, twanguwalanda mdite ilagano na hetwe.
12 Ulole mibumunda ja hetwe najali jipwituche kulawa vyotuholile mhela wotuchile kulawa kwa hetwe, ila lelo jikala na kota lungwi.
13 Vihako avi vya kuwichila divai navyali vinyale hotwaluche majendo, ila lelo vitulika vibi. Mbaka nguwo na makwamba ga hetwe galala kwa vila twaluka majendo kulawa kutali ng'hatu.”
14 Ahyo, Waisilaeli nawahola vilyo vya hewo ne kumuuza Mkulu Nguluwi mbuli ayo.
15 Yoshua nakelaha na hewo kwa kikala goya, nakadita ilagano kota kowakundiza kikala. Vilongozi wa Waisilaeli weng'ha nawelaha kudita gowalonjile kuli ilagano.
16 Zuwa lya kadatu kulawa vyoyawichile ilagano kwa wanhu awo, Waisilaeli nawahulika kota wanhu awa nawali wochikala habehi na hewo.
17 Lelo Waisilaeli nawaluka majendo. Lolifichile zuwa lya kadatu nawafika kuli miji ja Wagibeoni. Miji ajo najali Gibeoni na Kefila na Beeloti na Kiliati-yealimu.
18 Ila Waisilaeli nahawawakopole, mina vilongozi wa wanhu wa Isilaeli nawali wawalahile kwa itagwa lya Mkulu Nguluwi, Nguluwi wa Isilaeli. Ahyo lelo, wanhu weng'ha nawawang'ung'utila vilongozi awo.
19 Ila vilongozi wa Isilaeli nawawalonjela, “Kwa vila natilaha kwa itagwa lya Mkulu Nguluwi, Nguluwi wa Isilaeli, lelo hatuweza kuwadoliza hewo.
20 Towaleka wekale leka tulemeze kugazika kwa chiwalo cha kilaha kotilahile.
21 Muwaleche wekale.” Lelo nawawatemela ngodi na kuwadehela mazi Waisilaeli. Hino ndo kota vilongozi wa Waisilaeli weng'ha vyowalajize.
22 Yoshua nakawachema Wagibeoni na kuwauza, “Lekachoni namtuhada kota namlawa kuli isi ya kutali kuno hemwe mwangikala hali hetwe?
23 Lelo hemwe nampanjilwa na wayenu wamwe, weng'ha mowa wapogozi wa kutema ngodi na kudeha mazi mazuwa gose kwa chiwalo cha ng'handa ya Nguluwi wa heni.”
24 Nawamwidichila Yoshua, “Natuhulika kota kwa kukomya Mkulu Nguluwi, Nguluwi wa hemwe, nakamlonjela chitumagwa wa heye Musa yawakopole wanhu weng'ha wa isi ayo na kuwapa hemwe isi ayo iwe ya hemwe. Ahyo natudumba kwa chiwalo cha kikala kwa hetwe na ndo mina natudita mbuli ayi.
25 Lelo hetwe twa mmoko wa hegwe, utuditile kota vyoulingona ya goya.”
26 Lelo choyawaditile ndo kuwalohola hewo kulawa mmoko mwa Waisilaeli leka waleche kudumigwa, ahyo hawawakopole.
27 Ila kulawa zuwa alyo, Yoshua nakawadita awo wawe watema ngodi na wadeha mazi mbaka lehano kwa chiwalo cha wanhu weng'ha wa Isilaeli na kwa chiwalo cha honhu ha kulavila nhambiko ha Mkulu Nguluwi, honeche hala Mkulu Nguluwi hoyahagule.