19
Eliya kuli chidunda cha Holebu
1 Mndewa Ahabu nakamsimila Yesebeli, mche wake, mbuli zeng'ha zoyaditile Eliya na vyoyawakopole waloli weng'ha wa Baali kwa ipanga.
2 Yesebeli nakalajiza usenga kwa Eliya yolonga, “Milungu ajo jinditile ahyo na mzidi, wone ifiche mitondo mhela kota awu ndowa siuditile ukomu wa hegwe kota yumwe wa awo waloli.”
3 Eliya nakadumba, ahyo nakabilimila kuli muji wa Beeli-sheba ako Yuda kwa chiwalo cha kilohola, kuno yawele na chitumagwa wa heye. Hamba nakamleka ako chitumagwa ayo
4 na kujenda kwa zuwa limwe kuchiwala. Nakafika kuli igodi lya mletemu, nakekalisa hasi ha igodi alyo na kulanda leka yabagame. Nakalonga, “Ihega lelo, Mkulu Nguluwi, wuse ukomu wa heni, kwa vila siwele nojile kusinda wasekulu wa heni.”
5 Hamba nakegolola na kuwasa. Baho du mhilisi nakamdoliza na kumlonjela, “Winuche leka ulye.”
6 Eliya nakalola banzi zeng'ha, habehi na mutwi wa heye nakwali na ibumunda libanichigwe kuli makala ga chiluli na ibuli lya mazi. Nakalya na kunwa, hamba nakawasa kahi.
7 Yula mhilisi wa Mkulu Nguluwi nakamuyila kahi lwa keli, nakamdoliza na kumlonjela, “Winuche ulye kahi, leka uwe na mong'ho wa kulutilila na majendo.”
8 Eliya nakenuka, nakalya na kunwa. Loyawele na mong'ho kwa vila nakalya chila chilyo, nakajenda kwa mhela wa mazuwa makumi gane, nemisi na nechilo mbaka nakafika Holebu, chidunda cha Nguluwi.
9 Ako nakenjila kuli mhalika, nakawasa amo nechilo yila. Hamba, ulonzi wa Mkulu Nguluwi naumuyila Eliya na kumlonjela, “Kwangudita choni hano?”
10 Eliya nakedichila, “Mhela weng'ha nandikukolela mijito hegwe uliyeka, Mkulu Nguluwi Uwele na Mong'ho, ila Waisilaeli nawabena ilagano lya hegwe, nawabomola honhu ha hegwe ha kulavila nhambiko na kuwakopola waloli wa hegwe kwa ipanga. Ndo heni, heni ndiliyeka ndo sigale na wangumhala leka wandumye.”
11 Mkulu Nguluwi nakamlonjela, “Ulute kunze na kwima mchanya mwa chidunda hali heni Mkulu Nguluwi, kwa vila nda habehi kukola aho.” Hamba mbeho ng'hulu iwele na mong'ho naividita vila vidunda vikakame na kutula mitalawe, ila lizi lya Mkulu Nguluwi haliwele kuli yila mbeho. Vyoikolile mbeho nakwali na limachinyhina, ila lizi lya Mkulu Nguluwi haliwele kuli alyo limachinyhina.
12 Vyolikolile limachinyhina nakwali na chiluli, ila lizi lya Mkulu Nguluwi haliwele kuli chiluli acho. Vyochipulute chiluli, nalihulikwa lizi lisindamale na lya kupwepwa.
13 Eliya loyahuliche lizi alyo, nakegubika kumeho na ikanzu lya heye, nakalawa mgati na kwima hali mlomo wa mhalika. Lila lizi nalimlonjela, “Eliya, kwangudita choni aha?”
14 Eliya nakedichila, “Mhela weng'ha nandikukolela mijito hegwe uliyeka, Mkulu Nguluwi Uwele na Mong'ho, ila Waisilaeli nawabena ilagano lya hegwe, nawabomola honhu ha hegwe ha kulavila nhambiko na kuwakopola waloli wa hegwe kwa ipanga. Ndo heni, heni ndiliyeka ndo sigale na wangumhala leka wandumye.”
15 Mkulu Nguluwi nakamlonjela, “Uhiluche kwa kukolela kuchiwala mbaka Damasiko. Loufika, mbakalize mafuta Hasaeli yawe mndewa wa Alamu.
16 Naye Yehu, mwana wa Nimushi, umbakalize mafuta leka yawe mndewa wa Isilaeli. Kahi mbakalize mafuta Elisha, mwana wa Shafati wa Abeli-mehola, leka yawe mloli honhu ha hegwe.
17 Lelo yoneche yawele yosulupuka kuli ipanga lya Hasaeli, Yehu komkopola na yoneche yosulupuka kuli ipanga lya Yehu, Elisha komkopola.
18 Ila ndowaleka wakomu wanhu elufu saba kuli isi ya Isilaeli, wala wawele hawamfugamile Baali ne kujinonela jimalukolo ja heye.”
Elisha kanguchemigwa yawe mloli
19 Ahyo Eliya nakoka kulawa ako nakamfika Elisha, mwana wa Shafati. Nayali yolima kwa misenga makumi meli na jine ja kulimila, kuno heye yuye yojilongoza misenga ja kumbele. Eliya nakakola habehi na heye na loyamfichile nakamvaliza ikanzu lya heye.
20 Aho, Elisha nakajileka misenga ja heye, nakamuwinza Eliya yobilima na kumlonjela, “Ng'hundize tandi ndute ndikawalaje mamo na mhaza wa heni kwa kuwanonela, hamba ndikuwinze,” Eliya nakedichila, “Ulute, nandikuditila choni?”
21 Lelo Elisha nakamleka Eliya, nakahiluchila chilundo cha misenga, nakajidumula singo misenga ajo na kuteleka kwa migodi ja ngwamo kota ngodi, nakawapa wanhu nawalya. Hamba nakoka na kumuwinza Eliya na nakawa chitumagwa wa heye.