☰ 1 Wandewa 20
20
Beni-hadadi kanguitowa Samaliya
1 Beni-hadadi, mndewa wa Alamu, nakakungajiza wamizi wa heye weng'ha, kuno yawele hamwe na wandewa wanji makumi gadatu na weli hamwe na falasi na mituka jawo ja kubulunwa. Nakaluta kuli wula muji wa Samaliya nakauzunguluta na kuutowa. 2 Hamba nakalajiza wasenga wa heye kuli muji kwa Ahabu, mndewa wa Isilaeli, nawamlonjela, “Mndewa Beni-hadadi kangulonga hino, 3 ‘Sendi na zahabu za hegwe, vyeng'ha ndo vya heni na wadala wa hegwe wanojile na wanago wanojile nawo ndo wa heni.’ ”
4 Mndewa wa Isilaeli nakedichila, “Mkulu wa heni mndewa, ilawile kota vyoulonjile. Heni na vyeng'ha vyombele navyo ndo vya hegwe.” 5 Wala wasenga wa hewo nawamhiluchila kahi Ahabu, nawamlonjela, “Mndewa Beni-hadadi kangulonga ahi, ‘Nandajiza usenga kwa hegwe umhe heni zahabu na sendi na wache wa hegwe na wanago. 6 Ila mitondo mhela kota awu, ndowalajiza vilongozi wa heni kukagula ng'handa ya hegwe ya chiundewa na ng'handa za vilongozi wa hegwe. Wohola chinhu chowalinguchigana lukami.’ ”
7 Aho ndo Ahabu, mndewa wa Isilaeli, nakawachema wasekulu weng'ha wa Isilaeli na nakawalonjela, “Ulole munhu ayo vyoyalingunyokoza. Mhela loyalajize yahilichilwe wache wa heni na wana wa heni na sendi za heni na zahabu za heni, nasimlemele.” 8 Wasekulu na wanhu weng'ha nawamwidichila, “Uleche kumhulichiza ne kukunda vyoyalingugana.”
9 Lelo Ahabu nakawalonjela wasenga wa Beni-hadadi, “Mumlonjele hino mkulu wa heni mndewa, ‘Chitumagwa wa hegwe kodita geng'ha goulonjile hamwande, ila howeza kudita choneche kuwala mbuli ayi ya sambi.’ ” Awo wasenga nawaluta na kumlonjela kahi mndewa Beni-hadadi. 10 Hamba Beni-hadadi nakalajiza usenga wunji kwa Ahabu, “Milungu jingalile kubagama kukulu, wone nhimbwisi ya Samaliya yohega igawo limwe lya chila munhu lya wala walingulongozwa na heni.”
11 Mndewa Ahabu wa Isilaeli nakedichila, “Mumlonjele mndewa Beni-hadadi kota yalinguvala mivalo ja ngondo kangitogolaga hoyolawa kitowa ngondo, haiwele yang'hali kitowa.” 12 Beni-hadadi nakabochela usenga awu wa Ahabu mhela heye na wandewa wanji nawali wogala kuli mihema ja hewo, ahyo nakawalajiza wanhu wa heye, “Miwiche goya kuutowa muji.” Nawo nawewika goya kuutowa muji.
13 Mhela wuwo mloli yumwe nakaluta kwa Ahabu, mndewa wa Isilaeli, nakamlonjela, “Mkulu Nguluwi kangulonga hino, ‘Kwangona winji wa wamizi awa? Lelo hano ndowegala mmoko mwa hegwe na hegwe kovizela kota heni ndo Mkulu Nguluwi.’ ” 14 Ahabu nakauza, “Kwa utanzi wa whaani?” Mloli nakalonga, Mkulu Nguluwi kangulonga hino, “Kwa utanzi wa wasongolo walinguwakolela mijito wamizi wakulu wa wilaya.” Naye mndewa nakauza, “Whaani yokwaluka kitowa?” Mloli nakedichila, “Hegwe.”
15 Lelo mndewa Ahabu nakawachema wasongolo walinguwakolela mijito wamizi wakulu wa wilaya, wanhu weng'ha nawali miya mbili na makumi gadatu na weli. Hamba nakawachema wamizi wa Isilaeli, nawali elufu saba.
16 Loifichile nemisi, mhela Beni-hadadi na wala wandewa wayage makumi gadatu na weli welumbile hamwe lowawele kuli ihema lya hewo wonwa na kugala, kitowa nakwaluka. 17 Wala wasongolo walinguwakolela mijito wamizi wakulu wa wilaya, nawalongola. Mhela awo, Beni-hadadi nayali yawalajize wamizi wa kupugajiza, nawo nawamha mbuli kota nakwali na chilundo cha walume woyile kulawa Samaliya. 18 Beni-hadadi nakamlonjela, “Muwebate wawele wang'hali wakomu, leka tuvizele kota nawoya kitowa ngondo ama kwa kikala goya.”
19 Lelo wala wasongolo walinguwakolela mijito wamizi wakulu wa wilaya nawalongola kuno wowinzigwa na wamizi wa Isilaeli kumbele kwa hewo. 20 Chila munhu nakamkopola mng'honyo yumwe. Wanhu wa Alamu nawadwina na wamizi wa Isilaeli nawawawinza, ila Beni-hadadi, mndewa wa Alamu, yawele yakwinile falasi, nakasulupuka na wamizi wamwe wakwina falasi. 21 Lelo mndewa wa Isilaeli nakasumya ngondo, nakahola falasi na mituka ja kubulunwa minji na kuwakopola wanhu wa Alamu wenji.
22 Hamba yula mloli nakaluta kwa mndewa wa Isilaeli, nakamlonjela, “Wiwiche goya na wijese kahi lya kudita. Mwaka ulinguya mndewa wa Alamu kokuya kitowa na hegwe kahi.”
Waalamu wangitowa kahi na Waisilaeli
23 Mhela wuwo vitumagwa wa Beni-hadadi nawamlonjela hino mndewa Beni-hadadi, “Milungu ja Waisilaeli ndo milungu ja kuli vidunda, ahyo natulemwela, ila towasumya wone tochitowa na hewo honhu hali ibalalika. 24 Sambi udite hino, wose wala wandewa makumi gadatu na weli na uwawiche wakulu wa wamizi honhu ha hewo. 25 Uwakungajize wamizi wanji kota wawala wouwalajize na falasi na mituka ja kubulunwa. Hamba, tochitowa na hewo honhu hawele na ibalalika na towa na mong'ho.” Mndewa Beni-hadadi nakahulika gowalonjile, nakadita hihyo.
26 Mwaka awo loukolile, mndewa Beni-hadadi nakawakungajiza wanhu wa heye, nakaluta kuli muji wa Afeka kitowa na wanhu wa Isilaeli. 27 Nawo wanhu wa Isilaeli nawakungajizwa na kupegwa migoha, nawaluta kitowa na Waalamu. Wanhu Waisilaeli nawawika kambi wochilola na Waalamu, nawoneka kota vilundo vili vidodo vya mhene, ila Waalamu nawenela kuli isi yeng'ha.
28 Hamba munhu yumwe wa Nguluwi nakamhejelela mndewa wa Isilaeli, nakamlonjela, “Mkulu Nguluwi kangulonga hino, ‘Kwa vila Waalamu wangijesa heni Mkulu Nguluwi nda Nguluwi wa kuli vidunda na siwele Nguluwi wa kuli ibalalika, ndokudita usumye hali chilundo achi chikulu cha wamizi, nagwe kovizela kota heni ndo Mkulu Nguluwi.’ ”
29 Wanhu wa Isilaeli na Waalamu nawawika kambi kwa mhela wa mazuwa saba, nawali habehi. Zuwa lya saba nawaluka kitowa. Zuwa lilyo wanhu wa Isilaeli nawawakopola wamizi wa kujenda kwa magulu lachi imwe (100,000). 30 Waponile nawabilimila kuli muji wa Afeka. Ako, ng'hanzi za muji naziwagwila na kuwakopola wanhu elufu makumi meli na saba (27,000) waponile. Beni-hadadi kahi nakabilima na kuluta kivisa kuli chihengo chimwe cha mgati mwa muji. 31 Vitumagwa wa heye nawaluta na kumlonjela, “Natuhulika kota wanhu wa Isilaeli ndo wanhu wawele na isungu. Lelo utukundize tiwohe migunila mchuno na ng'weso msingo kwa chiwalo cha kinyenyeteza, tulute kwa mndewa wa Isilaeli, hanji kouleka ukomu wa hegwe.”
32 Lelo nawewoha migunila mchuno na ng'weso msingo, nawaluta kwa mndewa wa Isilaeli, nawamlonjela, “Chitumagwa wa hegwe Beni-hadadi kangukudedeza yolonga ‘Dedede undechele leka ndikale.’ ” Ahabu nakalonga, “Yang'hali mkomu? Heye ndo kota mng'holozangu.” 33 Vitumagwa wa Beni-hadadi nawali wobeteza ulajilo woneche wula wa mbuli inojile. Lelo Ahabu loyalonjile ahyo, hewo nawedichila wolonga, “Ena, Beni-hadadi ndo kota mng'holoze.” Ahabu nakawalonjela, “Mlute mkamhole mmigale kwa heni.”
Lelo Beni-hadadi loyamuyile, Ahabu nakagana yekalise na heye kuli mutuka wa heye wa kubulunwa. 34 Hamba Beni-hadadi nakamlonjela, “Muji weng'ha uwele mhaza wa heni nakamsukula mhaza wa hegwe, ndokuhilusila. Koweza kwaluchiza masoko ako Damasiko kota vyoyaditile mhaza wa heni ako Samaliya.” Ahabu nakedichila, “Ndokulechela kwa chiwalo acho.” Ahyo, nakadita ilagano na heye na kumleka yelejehe.
Mloli kangumpanjila Ahabu
35 Kwa ulonzi wa Mkulu Nguluwi, yumwe wa waloli nakamlonjela myage, “Dedede unhowe.” Ila myage nakalema kumtowa. 36 Heye nakamlonjela, “Kwa vila nakulema kuhulichiza ulonzi wa Mkulu Nguluwi, lelo houlekana na heni isimba lyokukopola.” Baho du vyowalekane na heye, nakating'hana na isimba, nalimkopola.
37 Hamba mloli ayo nakamfika munhu yunji, nakamlonjela, “Dedede unhowe.” Munhu ayo nakamtowa na kumlumiza. 38 Lelo mloli nakoka nakaluta kikalisa hafungo ha nzila kumbeteza mndewa wa Isilaeli kuno yewohile chibende kumeho leka yaleche kuzeleka. 39 Mndewa loyawele yokola, mloli nakamlilila yolonga, “Mkulu, heni chitumagwa wa hegwe nandali kuli kitowa ngondo, nakoya mwamizi yumwe nakengalila munhu yumwe yebatigwe na kundonjela, ‘Mlolele munhu ayu, wone yasulupuche yokulapa hegwe kulipa kikala kwa hegwe ama kwa vihande elufu zidatu vya sendi.’ 40 Ila lombele ndikola mijito, munhu ayo nakasulupuka.” Mndewa wa Isilaeli nakamlonjela, “Ndo vyouwa utaguso wa hegwe, nakitagusa gwegwe.”
41 Ahyo mloli nakosa himahima chibende kumeho kwa heye na mndewa nakavizela kota nayali yumwe wa waloli. 42 Lelo mloli nakamlonjela mndewa, “Mkulu Nguluwi kangulonga ahi, ‘Nakumleka munhu yondonjile yakopoligwe. Ahyo, ukomu wa heye koulipa kwa ukomu wa hegwe na wanhu wa heye kwa wanhu wa hegwe.’ ” 43 Lelo mndewa wa Isilaeli nakaluta haluga ha heye Samaliya kuno yawele na usungu na ng'halazi.
☰