15
Usiya kangulongoza Yuda
(2 Mihela 26:1-23)
1 Kuli mwaka wa makumi meli na saba wa ulongozi wa Yeloboamu, mndewa wa Isilaeli, Usiya mwana wa Amasiya, mndewa wa Yuda, nakaluka kulongoza.
2 Nakaluka kulongoza loyawele na miyaka kumi na sita. Nakalongoza ako Yelusalemu kwa miyaka makumi gahano na mili. Mayake nayali yochemigwa Yekoliya, kulawa Yelusalemu.
3 Usiya nakadita ganojile hali Mkulu Nguluwi, kota vyoyaditile Amasiya, mhaza wa heye.
4 Ila hala honhu ha kufugamila milungu hahawifigwe. Wanhu nawalutilila kulavya nhambiko na kufunyiza ubani hali honhu aho.
5 Mkulu Nguluwi nakamtowa mndewa kwa utamwa wa ngozi mbaka loyabagame. Nayali yochikala kuli ng'handa ibaguligwe. Yotamu, mwana wa mndewa, nayali yoilolela ng'handa ya mndewa na kuwalongoza wanhu wa isi ayo.
6 Madito ganji ga ulongozi wa Usiya na geng'ha goyaditile, nagandichigwa kuli chitabu cha kukumbuchila kwa wandewa wa Yuda.
7 Usiya nakabagama na kutiligwa kuli muji wa Daudi. Yotamu mwanage, nakalongoza honhu ha heye.
Sekaliya kangulongoza Isilaeli
8 Kuli mwaka wa makumi gadatu na nane ja ulongozi wa Asaliya, mndewa wa Yuda, Sekaliya, mwana wa Yeloboamu, nakaluka kulongoza Isilaeli, nayali mndewa wa Isilaeli kuli Samaliya. Nakalongoza kwa mhela wa myezi sita.
9 Sekaliya nakadita gehile hali Mkulu Nguluwi, kota mhaza wa heye vyoyaditile. Hagalechile gehile ga Yeloboamu, mwana wa Nebati, yawele nakawambuza Waisilaeli kudita gehile.
10 Shalumu, mwana wa Yabeshi, nayali na majesa ga kumditila vibi Sekaliya. Ahyo nakamtowa hali wanhu mbaka nakamkopola, hamba nakalongoza honhu ha heye.
11 Madito ganji ga ulongozi wa Sekaliya, nagandichigwa kuli chitabu cha kukumbuchila kwa wandewa wa Isilaeli.
12 Lelo ulonzi wa Mkulu Nguluwi ulonjigwe kwa mndewa Yehu, kwa kulonga, “Walelwa wa hegwe wochikalisa kuli chigoda cha undewa cha Isilaeli mbaka lulelo lwa kane.” Nayali ahyo.
Shalumu kangulongoza Isilaeli
13 Shalumu, mwana wa Yabeshi nakawa mndewa kuli mwaka wa makumi gadatu na tisa ga ulongozi wa Usiya, mndewa wa Yuda. Nakalongoza ako Samaliya kwa mwezi umwe.
14 Hamba Menahemu, mwana wa Gadi, nakalawa Tilisa na kuluta Samaliya. Nakamtowa na kumkopola Shalumu, mwana wa Yabeshi, hamba nakawa mndewa honhu ha heye.
15 Madito ganji geng'ha ga ulongozi wa Shalumu na kukopola koyaditile, navyandichigwa kuli chitabu cha kukumbuchila kwa wandewa wa Isilaeli.
16 Mhela wula Menahemu loyawele mnzila kulawa Tilisa, nakautowa muji wa Tifusa na kuwadumya wanhu wawele mgati mwake na wala wawele honhu ha habehi, kwa vila nawalema kumchumulila lwizi lwa hewo. Nakaidumya Tifusa yeng'ha na kuwatumbula mida wadala weng'ha wawele na himila.
Menahemu kangulongoza Isilaeli
17 Kuli mwaka wa makumi gadatu na tisa wa ulongozi wa Usiya, mndewa wa Yuda, Menahemu mwana wa Gadi, nakawa mndewa wa Isilaeli. Nakalongoza ako Samaliya kwa mhela wa miyaka kumi.
18 Nakadita gehile hali Mkulu Nguluwi. Kuli mhela wa ulongozi wa heye weng'ha, halechile gehile ga Yeloboamu, mwana wa Nebati, yawele nakawambuza Waisilaeli kudita gehile.
19 Hamba, Tigilati-pileseli mndewa wa Ashulu, nakaitowa Isilaeli. Menahemu, mndewa wa Isilaeli, nakamha kilo elufu makumi gadatu na zine (34,000) za sendi leka yamtanze kwimiza nzinzili ulongozi wa heye kuli isi ya Isilaeli.
20 Menahemu nakapata sendi azo kwa lupichi kulawa Isilaeli. Chila yawele na lufufu nayali yoganigwa kulavya migwala makumi gahano ja sendi jiwele nakapegwa mndewa wa Ashulu. Ahyo mndewa wa Ashulu nakelavya na halutilile kikala Isilaeli.
21 Madito ganji geng'ha ga ulongozi wa Menahemu na geng'ha goyaditile, nagandichigwa kuli chitabu cha kukumbuchila kwa wandewa wa Isilaeli.
22 Menahemu nakabagama. Pekahiya mwanage, nakawa mndewa honhu ha heye.
Pekahiya kangulongoza Isilaeli
23 Kuli mwaka wa makumi gahano wa ulongozi wa Usiya, mndewa wa Yuda, Pekahiya, mwana wa Menahemu, nakawa mndewa wa Isilaeli ako Samaliya. Nakalongoza kwa mhela wa miyaka mili.
24 Pekahiya nakadita gehile hali Mkulu Nguluwi. Hagalechile gehile ga Yeloboamu, mwana wa Nebati, yawele nakawambuza Waisilaeli kudita gehile.
25 Peka, mwana wa Lemaliya, yawele ndo yumwe wa vilongozi wa wamizi wa Pekahiya, nayali yochijesa kumditila vibi Pekahiya. Nakawahola wanhu makumi gahano wa Gileadi na kumkopola Pekahiya, hamwe na Aligobu na Aliya, kuli ngome ya ng'handa ya chiundewa ako Samaliya. Ahyo, Peka nakamkopola Pekahiya, hamba nakawa mndewa honhu ha heye.
26 Madito ganji ga ulongozi wa Pekahiya na geng'ha goyaditile, nagandichigwa kuli chitabu cha kukumbuchila kwa wandewa wa Isilaeli.
Peka kangulongoza Isilaeli
27 Kuli mwaka wa makumi gahano na mili wa ulongozi wa Usiya mndewa wa Yuda, Peka mwana wa Lemaliya, nakawa mndewa wa Isilaeli ako Samaliya. Nakalongoza kwa mhela wa miyaka makumi meli.
28 Nakadita gehile hali Mkulu Nguluwi, hagalechile gehile ga Yeloboamu, mwana wa Nebati, yawele nakawambuza wanhu wa Isilaeli kudita gehile.
29 Mhela wa ulongozi wa Peka, mndewa wa Isilaeli, Tigilati-pileseli, mndewa wa Ashulu, nakoya na kuuboka muji wa Iyoni na muji wa Abeli-beti-maaka na muji wa Yanoa na muji wa Kedeshi na muji wa Hasoli na mkowa wa Gileadi na mkowa wa Galilaya, hamwe na mkowa weng'ha wa Nafutali, nakawosa wanhu na kuwegala Ashulu.
30 Hamba Hosheya, mwana wa Ela, nayali yochijesa kumditila gehile Peka, mwana wa Lemaliya. Nakamtowa na kumkopola Lemaliya, hamba nakawa mndewa honhu ha heye, kuli mwaka wa makumi meli wa ulongozi wa Yotamu, mwana wa Usiya.
31 Madito ganji ga ulongozi wa Peka na geng'ha goyaditile, nagandichigwa kuli chitabu cha kukumbuchila kwa wandewa wa Isilaeli.
Yotamu kangulongoza Yuda
(2 Mihela 27:1-9)
32 Kuli mwaka wa keli wa ulongozi wa Peka, mwana wa Lemaliya, mndewa wa Isilaeli, Yotamu, mwana wa Usiya, mndewa wa Yuda, nakaluka kulongoza ako Yuda.
33 Nayali na miyaka makumi meli na jihano loyaluche kulongoza. Naye nakalongoza ako Yelusalemu kwa mhela wa miyaka kumi na sita. Mayake nayali yochemigwa Yelusha, mhinza wa Sadoki.
34 Nakadita ganojile hali Mkulu Nguluwi, kota vila Usiya, mhaza wa heye, vyoyaditile.
35 Ila honhu ha kufugamila milungu hahosigwe. Wanhu nawalutilila kulavya nhambiko na kufunyiza ubani ako. Yotamu nakazenga kahi lwizi lwa kuchanya lwa ng'handa ya Mkulu Nguluwi.
36 Madito ganji ga ulongozi wa Yotamu na geng'ha goyaditile, nagandichigwa kuli chitabu cha kukumbuchila kwa wandewa wa Yuda.
37 Mhela wa ulongozi wa Yotamu, Mkulu Nguluwi nakaluka kuwalajiza Lesini, mndewa wa Alamu na Peka, mwana wa Lemaliya, mndewa wa Isilaeli, leka waitowe Yuda.
38 Yotamu nakabagama na kutiligwa kuli vilaga vya chiundewa kuli muji wa Daudi. Ahasi, mwanage nakalongoza honhu ha heye.