16
Ahasi kangulongoza Yuda
(2 Mihela 28:1-27)
1 Kuli mwaka wa kumi na saba wa ulongozi wa Peka, mwana wa Lemaliya, mndewa wa Isilaeli, Ahasi mwana wa Yotamu, mndewa wa Yuda, nakaluka kulongoza.
2 Ahasi nayali na miyaka makumi meli loyaluche kulongoza. Nakalongoza ako Yelusalemu kwa mhela wa miyaka kumi na sita. Nakadita vilivinji na sekulu wa heye Daudi, heye haditile ganojile hali Mkulu Nguluwi, Nguluwi wa heye.
3 Nakawinza nzila ya wandewa wa Isilaeli na kumlavya mwanage leka yawe nhambiko kuli chiluli, yowinza vihendo vya kuzudiza vya wanhu wa isi wawele Mkulu Nguluwi nayali yawawinjile hali wanhu wa Isilaeli.
4 Ahasi nakalavya nhambiko na kufunyiza ubani honhu ha kufugamila milungu na mchanya mwa vidunda na hasi ha chila igodi liwele na mahamba madodi.
5 Hamba Lesini, mndewa wa Alamu na Peka, mwana wa Lemaliya, mndewa wa Isilaeli, nawaluta kitowa ngondo na wanhu wa Yelusalemu na kumzunguluta Ahasi kwa wamizi, ila nawalemwela kumsumya.
6 Mhela awo Lesini, mndewa wa Alamu nakauhilula muji wa Elasi kwa Waalamu kwa kuwawinga wanhu wa Yuda. Hamba Waedomu nawaluta kikala Elasi, nawo wangikala ako kulawa mhela awo.
7 Ahasi nakawalajiza wasenga kwa Tigilati-pileseli, mndewa wa Ashulu, yolonga, “Heni nda chitumagwa wa hegwe wakitumbila. Uye undohole kulawa kwa wandewa wa Ashulu na wa Isilaeli, walingunhowa.”
8 Ahasi kahi nakahola sendi na zahabu kuli ng'handa ya Mkulu Nguluwi na kuli ng'hano ya ng'handa ya mndewa na kuzilajiza kwa Tigilati-pileseli, mndewa wa Ashulu kota ndolendole.
9 Mndewa wa Ashulu nakamwidichila Ahasi kwa kuutowa muji wa Damasiko na kuuhola. Nakawalavya wenyeng'haye wa Damasiko mbaka Kili na kumkopola Lesini.
10 Hamba mndewa Ahasi nakaluta Damasiko kiting'hana na Tigilati-pileseli, mndewa wa Ashulu. Loyawele ako nakona honhu ha kulavila nhambiko, ahyo nakalajiza kwa mtambika Uliya kalatasi icholigwe honhu ha kulavila nhambiko, hamwe na malajizo ga ndaze vyowozenga.
11 Mtambika Uliya nakazenga honhu ha kulavila nhambiko kwa kiwhana na mndewa Ahasi vyoyalajize kulawa Damasiko. Nakasinda kuzenga mndewa Ahasi yang'hali kuhiluka.
12 Mndewa Ahasi loyahiluche kulawa Damasiko, nakahona aho honhu ha kulavila nhambiko, nakahahejelela na kulavya nhambiko mchanya mwake.
13 Nakalavya nhambiko ya kulakazwa na ya nyhule na ya kunwa na kumizila danda ya nhambiko za heye za kikala goya mchanya mwa aho honhu ha kulavila nhambiko.
14 Mndewa Ahasi nakahosa hala honhu ha kulavila nhambiko ha katali ha shaba hawele hali ng'handa ya Mkulu Nguluwi na kuhawika ubanzi wa kasikazini mwa honhu ha kulavila nhambiko hanyale hawele hagati ha lwizi lwa ng'handa ya Mkulu Nguluwi.
15 Hamba mndewa Ahasi nakalajiza hino kwa mtambika Uliya, “Kuwala aho honhu ha kulavila nhambiko hakulu hanyale, ulavye nhambiko ya hamitondo ya kulakazwa na ya matinazo ya nyhule na nhambiko ya mndewa ya kulakazwa na ya nyhule, hamwe na nhambiko ya kulakazwa ya wanhu weng'ha wa isi na nhambiko ya hewo ya nyhule na ya chakunwa. Umizile danda yeng'ha ya nhambiko za kulakazwa na nhambiko zinji mchanya mwa honhu ha kulavila nhambiko hanyale. Ila heni ndotumiya hala honhu ha kulavila nhambiko ha katali kwa kuuza ulonzi wa Nguluwi.”
16 Mtambika Uliya nakadita kota vyoyalajizwe na mndewa Ahasi.
17 Mndewa Ahasi nakosa mabamba ga hafungo gawele nagali gabatililwe na fulemu na kusa visaye kulawa kuli zila fulemu. Nakosa lila ibiga likulu kuli jila mibuguma ja shaba jilingubatilila na kuliwika kuli chikalilo cha iganga.
18 Kwa lutogo lwa mndewa wa Ashulu, kahi nakosa lila ihema liwele nalyali lyangutumiwa kuli zuwa lya kwesela na kusa kahi yila nzila ya chiundewa ya kwinjilila kuli ng'handa ya Mkulu Nguluwi.
19 Lelo Madito ganji ga ulongozi wa mndewa Ahasi, nagandichigwa kuli chitabu cha kukumbuchila kwa wandewa wa Yuda.
20 Ahasi nakabagama na kutiligwa kuli muji wa Daudi. Hesekiya, mwanage nakalongoza honhu ha heye.