13
1 Mwana yawele na luhala kanguhulichizaga malajizo ga mhaza wa heye,
ila yalingubeza hambe yahulichize makanyo.
2 Munhu yawele na nhumbula inojile kangupataga ganojile kulawa kuli ulonzi wa heye,
ila wahadi wanguganaga kilewa.
3 Yalinguudima mlomo wa heye kangwamilaga kikala kwa heye,
yalinguhabuka kangiyambuzila yuye kudumigwa.
4 Mgata kanguwaga na maya ila hambe yapate choneche,
walingikangaza wangutambichizwaga chilyo kwa winji.
5 Yatanganiche kanguuzudilaga udesi,
ila mwihe kangigalaga soni na kudeula.
6 Kutanganika kwanguwamilaga wagoloche nhumbula,
ila gehile ganguwagwisaga wehile.
7 Wamwenga wangiditaga kota wana lufufu kuno wahela chinhu,
wanji wangiwonaga kota wazunwa kuno wana lufufu lwinji.
8 Lufufu lwa munhu lwoweza kumgombola,
kulawa kwa wanhu walingugana kumhola kwa chiwalo cha kugana lufufu lwa heye,
ila mzunwa halingudumba kuholigwa.
9 Watanganiche wangupulikaga kota chenje chilingwaka goya,
ila wehile ndo kota chenje chilinguzima.
10 Kidaya kwangwambuzaga kilewa hela,
ila walingukunda ulonzi unojile wana luhala.
11 Lufufu lwa himahima lwangwajililaga,
ila yalingukungajiza hadohado kolwonjeza.
12 Kitumbila kwa kubeteza ng'hatu kwangulumiza nhumbula,
ila kitumbila kwenele kwangigalaga kusangalala.
13 Yalingubeza ulonzi unojile kangigalila kudumigwa,
ila yalinguhulichiza mizilo kopegwa chonolo.
14 Malanguso ga wawele na luhala ndo nzasa ya ukomu,
gangumtanza munhu kiwika kutali na midiwa ja kubagama.
15 Yawele na kuvizela kangigalaga uganililo,
ila nzila ya wehile ndo ya magazo.
16 Yawele na luhala kanguditaga chila chinhu kwa nyhala,
ila mpoka kanguwikaga hazelu upoka wa heye.
17 Msenga yehile kanguwenjizaga wanhu kuli magazo,
ila msenga yalingukundigwa kangigalaga kikala goya.
18 Uzunwa na kudeula vyangumpataga yalingugabeza malanguso,
ila yalinguhulika makanyo kanguhulichizwaga.
19 Kwangusangalala hala houpata chila choulingugana.
Wapoka wanguzudilaga kiwika kutali na wihe.
20 Yalinguwa hamwe na wawele na luhala kangupataga luhala,
ila yalingilumba na wapoka kolumila.
21 Walingudita gehile wanguwaga na magazo ng'hatu,
ila watanganiche wopegwa ganojile.
22 Munhu yanojile kanguwalechelaga uhalizi walelwa wa heye,
ila lufufu lwa yawele na gehile nawawichilwa watanganiche.
23 Mgunda wa mzunwa wangulavyaga mbena nyinji,
ila ne hachi wanguholigwa.
24 Yohambe yamzape mwanage kwa makanyo hambe yamgane,
ila yalingumgana mwanage kangumkanyaga kung'hali.
25 Yatanganiche kanacho chilyo cha kuhega,
ila lida lya mwihe lyangugazika kwa nzala.