14
1 Mdala yawele na luhala kanguzengaga ng'handa ya heye,
ila mdala mpoka kangubomolaga kwa moko ga heye yuye.
2 Yalingudita mbuli zigoloche kangumdumbaga Mkulu Nguluwi,
ila yajilile kangumbezaga Nguluwi.
3 Mpoka kangigazaga yuye kwa kulonga kwa kidaya,
ila yawele na luhala kangwamilwaga kwa ulonzi wa heye.
4 Honhu halihela misenga ja kulimila, ng'hano za munhu zahela chinhu,
mbena nyinji zangulawa kwa chiwalo cha mong'ho wa misenga ja kulimila.
5 Mlolezi yalingukundigwa hambe yalonje udesi,
ila yohambe yakundigwe kangulongaga udesi.
6 Yalingubeza kangupalaga luhala na hambe yapate,
ila yawele na luhala kangupataga uwanzi kwa ubewe.
7 Wiwiche kutali na mpoka,
kwa vila aho hoyawele haduhu ulonzi wa luhala.
8 Luhala lwa yula yawele na nyhala lwangumlajila nzila ya heye,
ila upoka wa mpoka, wangumhada heye yuye.
9 Wapoka wangusechelelaga gehile ga hewo,
ila wagoloche nhumbula wangupataga kunoga kulawa kwa Nguluwi.
10 Chila nhumbula yanguuzela usungu wake,
haduhu yawele yoweza kihanza kuli kusangalala kwake.
11 Ng'handa ya mwihe yobomoligwa,
ila ihema lya yagoloche nhumbula lyoditigwa liwe nzinzili.
12 Hana nzila youlingijesa kota ya goya,
ila kuli kuduma yoweza kukulongoza kuli kubagama.
13 Masinzo goweza kivisa kuli kuseka,
usangalalo woweza kumalila kuli masinzo.
14 Munhu yajilile kobeta mafuza ga gala goyalingudita,
naye yanojile kopata chonolo cha madito ga heye.
15 Mpoka kangukundaga chila chinhu choyalingulonjelwa,
ila yawele na luhala kanguwaga na kilolela kuli nzila za heye.
16 Yawele na luhala ndo yalingilolela na kangiwikaga kutali na wihe,
ila mpoka hambe yelemeze ne kilolela.
17 Yalinguzudila himahima kanguditaga upoka,
naye yawele na nhumbula yihile kanguzudilwa.
18 Wasowile nyhala wanguhalilaga upoka,
ila wawele na luhala wangupegwa itaji lya uwanzi.
19 Walingudita gehile wofugama hali wanhu wanojile,
wehile hali lwizi lwa watanganiche.
20 Mzunwa kanguzudilwa mbaka na yowalingikalasa habehi,
ila yawele na lufufu kana goloko wenji.
21 Yalingumbeza yowalingikalasa habehi ndo yawele na gehile,
ila nakatambichizwa yawele na isungu kwa wazunwa.
22 Yalingiwika goya kudita gehile, ndangukomya kanguwifya.
Yalingiwika goya kudita ganojile, kangupegwa igano lya kwimilila na kukundigwa.
23 Kikangaza kuli chila mijito kwangigalaga chinhu cha mzidi,
ila ulonzi hela wangigalaga uzunwa.
24 Lufufu ndo chonolo kwa yula yawele na luhala,
ila upoka wa mpoka wangulelaga upoka.
25 Mlolezi wa kukomya kanguuloholaga ukomu,
ila yalingulonga udesi ka yalinguhada.
26 Yalingumdumba Mkulu Nguluwi kana kitumbila kwimile nzinzili,
na wana wa heye wopata honhu ha kubilimila hawele na kikala goya.
27 Kumdumba Mkulu Nguluwi ndo nzasa ya ukomu,
kwangumtanza munhu kiwika kutali na midiwa ja kubagama.
28 Lufufu lwa mndewa ndo winji wa wanhu wa heye,
ila ne wanhu chilongozi kangudumigwa.
29 Munhu yohawele wa kuzudila himahima kana luhala ng'hatu,
ila yalinguzudila himahima kangulajilaga upoka.
30 Kikala goya mnhumbula kwangumha munhu mong'ho,
ila maya gangujidita mizeje jole.
31 Yalingumbunza mzunwa kangumliga Yamlumbile heye,
ila yalingumonela isungu mzunwa, kangumtogola Nguluwi.
32 Mwihe kangudumigwa kwa madito ga heye ga wihe,
ila yatanganiche kangwamilwa na kugoloka kwa heye.
33 Luhala lwa kwa munhu yawele na nyhala,
ila hailinguzeleka hali wapoka.
34 Kutanganika kwanguwadita wanhu wa isi watogoligwe,
ila gehile ndo mbuli yihile kwa isi yoneche.
35 Mndewa kanguwaga yomha kunoga chitumagwa yalingudita kwa luhala,
ila ng'halazi ya heye yangumpataga yula yalingudita vibi.