30
Ulonzi wa Aguli
1 Ulonzi wa Aguli, mwana wa Yake,
ulonzi uwele munhu ayu nakamlonjela Itieli, ena, Itieli na Ukali.
2 Heni nda mpoka lukami kusinda wanhu weng'ha,
ndahela nyhala ya chiwunhu.
3 Hambe ndilanguse luhala,
sivizelele chinhu choneche chilingumuwala Nguluwi Yelile.
4 Whaani yakwinile kuchanya kilanga hamba nakadulika?
Whaani yebatile mbeho mmoko?
Whaani yawohile mazi kuli chibende?
Whaani yajiwichile mbaka jeng'ha ja isi?
Kanguchemigwa whaani? Ndo lyachi itagwa lya mwanage?
Ndonjele wone kwanguvizela.
5 Ulonzi weng'ha wa Nguluwi ndo wenela,
heye ndo ngawo ya hewo weng'ha walingumbilimila.
6 Uleche konjeza ulonzi kuli ulonzi wa heye,
leka yaleche kukung'hanuchila, nagwe kokoneka kwa mdesi.
7 Gwa Nguluwi, ndangukulanda mbuli azi mbili,
uleche kundemela nding'hali bagama.
8 Umbusile udesi na uhadi,
uleche kumha heni uzunwa ne lufufu,
umhe heni chilyo cha chila zuwa,
9 wone ndahagutile, ndahakubelile
na kulonga, “Mkulu Nguluwi ndo whaani?”
Ama ndahawele mzunwa, hamba ndahahizile,
na kukubeza, gwa Nguluwi wa heni.
10 Uleche kumlonjeleza mpogozi kwa mkulu wa heye,
leka yaleche kukupanjila, woneche kuna nongwa.
11 Hana wanhu wawele wanguwapanjilaga wahaza wa hewo,
na kuleka kuwatambichiza wamamo wa hewo.
12 Hana wanhu wawele wangiwonaga kota wanoga,
kuno wang'hali kwelizwa wavu wa hewo.
13 Wabaho wanji walingidaya ng'hatu,
wangubezaga chila chinhu chowalinguchona.
14 Hana wanhu wawele ulonzi wa hewo ndo kota ipanga,
na mizino ja hewo ndo kota vimaje.
Nawewika goya kuwadakula wazunwa wa isi,
na walihela chinhu wawele hali wanhu.
15 Iluba lina wahinza weli walingulonga, “Umhe heni, umhe heni.”
Hana vinhu vidatu viwele hambe vigute,
ena, chinhu cha kane chohambe chilonje, “Ihega.”
16 Kuli isi ya wabagame,
munda wa mdala wohambe uponde,
misanga johambe jigute mazi,
na chiluli chohambe chilonje, “Ihega.”
17 Wone munhu yambeze mhaza wa heye,
na kubeza kuhulichiza kwa mayake,
mibondwa ja kibindi jodobola meho ga mtufi wa heye,
na kuligwa na ikungule.
18 Hana mbuli zidatu za kububuwaza kwa heni,
ena, mbuli ya kane yohambe ndiizelele.
19 Nzila ya ikungule kuli ulanga,
nzila ya izoka kuli italawe,
nzila ya meli kuli bahali,
na chilingumkwega mlume kwa mdala.
20 Madito ga mdala mng'hondwa ndo aga.
Kangulyaga na kibagusa mlomo,
na kulonga, “Siditile nongwa yoneche.”
21 Hana mbuli zidatu ziwele zilinguidita isi ikakame,
ena, mbuli ya kane iwele isi haiweza kwimilila.
22 Mpogozi yalinguwa mndewa,
mpoka yalingiguta chilyo,
23 mdala yohambe yaganigwe, hoyohesigwa,
na mpogozi mdala yalinguhola honhu ha mdala wa mkulu wa heye.
24 Hana vilumbigwe vine vidodo ng'hatu muisi,
ila vina nyhala ng'hatu.
25 Misisina ndo minhu jilihela mong'ho,
ila jangiwichila chilyo mhela wa chipalangule,
26 mhimbi, migongolo jilihela ludali,
ila jangigongomanyila honhu ha kikala hali mitalawe,
27 nzije zahela mndewa,
ila zeng'ha zangulutaga hamwe kwa vilundo,
28 limdusu, koweza kulibata mmoko,
ila lyangwinjilaga kuli ng'handa ya mndewa.
29 Hana vilumbigwe vidatu vilingujenda kwa kunojeza,
ena, cha kane chilingujenda kwa kunojeza.
30 Isimba ndo igongolo liwele na mong'ho kusinda jeng'ha,
halilingudumba igongolo lyoneche,
31 izogolo lilinguluta kwa kidaya,
na kahi ipongo,
na mndewa yalihela wang'honyo.
32 Wone nakudita upoka na kitogola gwegwe,
ama wone nawali uchijesa kudita gehile,
wamile mlomo wa hegwe.
33 Kwa vila wone utijetije matombo, kopata siagi,
wone umtowe munhu kuli mhenyelo, kolawa danda,
na kahi konjeza ng'halazi, kwangigalaga kilewa.