31
Ulonzi kwa mndewa Lemweli
1 Ulonzi wa mndewa Lemweli.
Ulonzi woyalangusigwe na mayake.
2 Ndikulonjele choni mwana wa heni?
Ndikulonjele choni mwana wa heni hegwe yondikupondile?
Ndikulonjele choni hegwe yondikulandile kwa Nguluwi?
3 Uleche kitunya kwa chiwalo cha wadala,
uleche kuwapa lufufu lwa hegwe awo walinguwadumya wandewa.
4 Hailingutanza chinhu, gwa Lemweli,
haiwele goya wandewa kunwa divai,
ne wakulu konela maya ujimbi.
5 Wone wanwe wosemwa malajizo,
na kwajiliza hachi za wazunwa.
6 Umhe ujimbi munhu yawele habehi kubagama,
uwape divai wala wawele na masinzo ng'hatu,
7 wanwe na kusemwa uzunwa wa hewo,
leka waleche kukumbuchila kahi magazo ga hewo.
8 Ila hegwe, yangukulapa ulonje,
kwa chiwalo cha weng'ha wohambe waweze kulonga,
na kulewela hachi za weng'ha walihela ludali.
9 Ulonje kwa chiwalo cha hewo na kwamula kwa hachi,
wamile hachi za wazunwa na walihela chinhu.
Mdala yalingumdumba Mkulu Nguluwi
10 Mdala yawele na nhumbula inojile kangoneka kohi?
Ayo ndo yanojile ng'hatu kusinda johali.
11 Mlume wa heye kangumkundaga ng'hatu,
kwa heye kopata chinhu cha mzidi ng'hatu.
12 Halingumditila mbuli zihile mlume wa heye,
ila kangumditilaga ganojile kuli kikala kwa heye kweng'ha.
13 Kangupalaga sufu na kitani,
na kukola mijito kwa moko gake kwa kikangaza.
14 Heye ndo kota meli za kugula na kuguza,
kangigalaga chilyo cha heye kulawa kutali.
15 Kangwinukaga lufuku,
kanguliwichilaga goya ivyazi lya heye chilyo,
na kuwagawila mijito vitumagwa wa heye wadala.
16 Kangijesaga kugula mgunda, hamba kanguugulaga,
kwa kiwhana na choyalingupata kangunyalaga mizabibu kuli mgunda awo.
17 Kanguwaga goya kukola mijito kwa mong'ho,
na moko ga heye gana mong'ho kuli mijito ja heye.
18 Kanguvizela kota mijito ja heye jina chinhu cha mzidi,
kangukolaga mijito mbaka nechilo kwa lumuli lwa chenje cha heye.
19 Kangubotaga uzi kwa moko ga heye yuye,
kwa vidole vya heye kangutawaga nguwo za heye.
20 Kangugololaga moko wa heye kuwapa wazunwa,
na kuwatanza walihela chinhu.
21 Kahela lunhwinhwi kuwala wanhu wa heye hokuwa na chipute,
kwa vila chila yumwe kanazo nguwo za kuhega.
22 Kangigongomanyilaga micheka,
mivalo ja heye ndo ja kitani inojile ja lanji ya zambalau.
23 Mlume wa heye ka munhu yalingutogoligwa kuli lwizi lwa muji,
hoyochikalisa hali wasekulu wa isi.
24 Mdala ayo kanguwaga yogongomanya nguwo na kuguza,
kanguwaguzilaga misali walingugula na kuguza.
25 Mong'ho na kuhulichiza ndo lutogo lwa heye,
kangusekaga hoyochijesa kuwala mhela ulinguya.
26 Kangulongaga kwa luhala,
na malanguso ga igano lya kwimilila kwa umyango wa heye.
27 Kangupugajizaga geng'ha galingukoleka kaye kwa heye,
halingikalisa hihi hela ne hado.
28 Wana wa heye wangulilimkaga na kulonga malumbo kwa heye,
mlume wa heye kangwimbaga lutogo lwa heye.
29 Kangulongaga, “Wadala wenji nawadita mbuli zinojile,
ila hegwe nakuwasumya weng'ha.”
30 Ulonzi ulingunojeza wangudetaga na kunoga kwa kumeho kwangukolaga himahima,
ila mdala yalingumdumba Mkulu Nguluwi kotogoligwa.
31 Chituguti cha heye changuganigwa kulipigwa,
mijito ja heye janguganigwa kutogoligwa honeche.