10
Kulanda kwa chiwalo cha hachi
1 Gwa Mkulu Nguluwi, lekachoni kwangwima kutali?
Lekachoni kwangivisa mhela wa magazo?
2 Kwa kidaya wehile wanguwagaza wazunwa,
wazunwa walingugwilizwa na hewo.
3 Mwihe kangitogolaga kwa maya ga nhumbula ya heye,
kangumtambichizaga yawele na maya na kumliga Mkulu Nguluwi.
4 Kuli kidaya kwa heye halingumpala Nguluwi.
Kijesa kwa heye kweng'ha ndo, “Haduhu Nguluwi.”
5 Nzila za mwihe zangusumya,
kwa heye nhaguso za hegwe za kutali na majesa ga heye,
kanguwabezaga wang'honyo wa heye weng'ha.
6 Kangijesaga mnhumbula, “Siwa na lunhwinhwi,
sifichigwa na magazo kuli ukomu wa heni.”
7 Kumlomo kwa heye nakumema upanjilo na uhadi na kubunza,
kangulongaga ulonzi wa kuzudiza na wihe.
8 Kangivisaga kuli vijiji yobeteza,
yamkopole munhu yalihela nongwa.
Ka meho kumpugajiza ng'hochele,
9 kangubetezaga hali honhu ha kivisa kota isimba.
Kangupugajizaga leka yawebate wazunwa,
kanguwagwilizaga kuli idiwa lya heye na kuwahola.
10 Ng'hochele kanguhondigwa na kutozigwa hasi,
kangutozigwa kwa nhumbula yihile ya yula mwihe.
11 Mwihe kangijesaga mnhumbula ya heye,
“Nguluwi nakasemwa,
nakadinya kumeho kwa heye halingona chinhu.”
12 Winuche, gwa Mkulu Nguluwi, uwagaze,
uleche kuwasemwa awo walingubunzwa.
13 Gwa Nguluwi, lekachoni mwihe kangukubeza,
na kulonga kota humgaza?
14 Ila hegwe kwanguwonaga wawele kuli kutunywa na magazo,
nakukunda kuwabochela mmoko mwa hegwe.
Ng'hochele kangitumbila kwa hegwe, gwa Nguluwi,
hegwe kwanguwaga utanzi wa walekwa.
15 Ubene mong'ho wa munhu mwihe,
udumye wihe wa heye weng'ha, uleche koneka kahi.
16 Mkulu Nguluwi ndo mndewa mazuwa gose.
Wanhu wa isi zeng'ha wohawamzelele wokwajilila kuli isi ya heye.
17 Gwa Mkulu Nguluwi, kwangubochela kulanda kwa ng'hochele,
kwangumkangaza na kumhulichiza.
18 Kowaditila hachi walekwa na walingubunzwa,
leka munhu yawele ndo misanga yalemwele kigala lunhwinhwi kahi.