9
Kulonga malumbo kwa Nguluwi
(Kwa yalingwaluchiza kwimba. Kwa kiwhana na Muti-labeni. Zabuli ya Daudi.)
1 Ndolonga malumbo kwa Mkulu Nguluwi kwa nhumbula ya heni yeng'ha,
ndogasimila madito ga hegwe ga kububuwaza.
2 Ndosangalala na kutowa luchenze kwa chiwalo cha hegwe,
ndolimbila lutogo itagwa lya hegwe, gwa Nguluwi Uwele Kuchanya.
3 Mhela naloulawile, wang'honyo wa heni nawahiluka kumbele,
nawekwang'wala na kudumigwa.
4 Nakuilewela hachi ya heni,
kulawa kuli chigoda cha hegwe cha undewa
nakulavya utaguso uwele wa hachi.
5 Nakuwang'hanuchila wanhu wa isi,
nakuwadumya wehile,
matagwa ga hewo nakugosa mazuwa gose.
6 Wang'honyo nawadumigwa mazuwa gose,
nakuwifya miji ja hewo,
mbaka kukumbuchilwa kwa hewo nakwajilila.
7 Ila Mkulu Nguluwi kangulongoza mazuwa gose,
nakawika chigoda cha heye cha undewa leka yataguse.
8 Kanguitagusa isi kwa hachi,
kangwamula kwa kutanganika hali wanhu wa isi.
9 Mkulu Nguluwi ndo ngome kwa walingubunzwa,
heye ndo honhu ha kikala goya mihela ja magazo.
10 Walingukuzela, gwa Nguluwi wangitumbila kwa hegwe,
kwa vila hegwe Mkulu Nguluwi huwalechile walingukupala.
11 Mumwimbile Mkulu Nguluwi yalingulongoza ako Siyoni.
Mugawikule kwa wanhu madito goyaditile.
12 Nguluwi kanguhilulaga chibida kwa kuboholigwa kwa danda,
halingusemwa hebu chililo cha walingubunzwa.
13 Uwe na isungu kwa heni, gwa Mkulu Nguluwi.
Ulole magazo gawele nagafika kwa heni, kulawa kwa walingunzudila,
hegwe nakunyasula lombele habehi kubagama,
14 leka sime lutogo lwa hegwe hali wanhu wa Siyoni,
leka sangalale kwa vila nakundohola.
15 Wanhu wa isi nawenjila kuli ikulubila lyowabawile wawo,
nawagwilizwa magulu kuli utandawala wowauvisile.
16 Mkulu Nguluwi nakelajila vyoyawele kwa kukolela utaguso wa heye wa hachi.
Wanhu wehile nawagwilizwa kwa madito ga hewo wawo.
17 Wehile wohiluka kuli isi ya wabagame,
ena, wanhu wa isi zeng'ha walingumsemwa Nguluwi.
18 Ila wazunwa hawosemwigwa mazuwa gose,
kitumbila kwa walihela chinhu hakukwajilila mazuwa gose.
19 Winuche, gwa Mkulu Nguluwi.
Uleche kumleka yehile yasumye.
Uwakungajize wanhu wa isi zeng'ha hali hegwe, uwataguse.
20 Uwakabuse, gwa Mkulu Nguluwi,
leka wanhu wa isi zeng'ha wavizele kota hewo ndo wanhu hela!