5
Kulanda kuli mhela wihile
(Kwa yula yalingwaluchiza kwimba na kwa mluli. Zabuli ya Daudi.)
1 Gwa Mkulu Nguluwi, uhulichize ulonzi wa heni,
ulole kung'ung'uta kwa heni.
2 Uhulichize kulila kwa heni leka unhanze,
gwa Mndewa wa heni na Nguluwi wa heni,
kwa vila hegwe ndo ndilingukulanda.
3 Gwa Mkulu Nguluwi, hamitondo kwanguhulika lizi lya heni,
hamitondo ndangukuwichila goya kulanda kwa heni,
hamba ndangubeteza unyidichile.
4 Kwa vila hegwe hauwele Nguluwi ulingunojezwa na wihe,
wihe hauweza kikala na hegwe.
5 Walingidaya hambe weme hali hegwe,
hegwe kwanguwazudila weng'ha walingudita wihe.
6 Hegwe kwanguwadumya weng'ha walingulonga udesi,
gwa Mkulu Nguluwi, kwanguwazudila walingukopola na wahadi.
7 Ila, kwa winji wa igano lya kwimilila lya hegwe, ndokwinjila mng'handa mwa hegwe.
Ndofugama kwa kuhulichiza kuli ng'handa ya hegwe yelile.
8 Gwa Mkulu Nguluwi, undongoze kuli kutanganika kwa hegwe,
kwa chiwalo cha wang'honyo wa heni,
ugolose nzila ya hegwe hali heni.
9 Kwa vila kuli milomo ja hewo kwahela kukundigwa,
mnhumbula za hewo nakumema kudumya,
milomo ja hewo ndo kota chilaga chiwele mwanzi,
myango za hewo nazimema wihe.
10 Gwa Nguluwi, uwagaze kwa wihe wa hewo,
wagwe kwa mbuli zihile za hewo wawo.
Uwawinje kwa chiwalo cha winji wa gehile ga hewo,
kwa vila nawakubelenhuka hegwe,
11 ila weng'ha walingubilimila kikala goya kwa hegwe wasangalale,
wembe kwa kusangalala mazuwa gose.
Uwemile walinguligana itagwa lya hegwe,
leka wasangalale kwa chiwalo cha hegwe.
12 Kwa vila hegwe Mkulu Nguluwi kwanguwatambichiza wala watanganiche,
kwanguwamila kwa kunoga kwa hegwe kota ngawo.